Մայրերը ընդունակ են.-
Տհաճութիւնը հաճելի դարձնել,
Վէրքերը ապաքինել,
Անկարգութիւնները կարգի բերել,
Արցունքները սրբել,
Ցաւի ու տառապանքի ժամանակ ժպտալ
Դժւար ու դաժան պայմաններում ասել.- կեանքը որքան էլ դժւար լինի, ես նրանից աւելի դժւարն եմ ու ամուր։
Թւականիս ապրիլի 7-ին Աւետումն Ս. Աստւածածնի՝ Մայրերի տօնի առիթով Հ. Մ. «Սիփան» միութեան «Նորայր Էլսայեան» մարզադահլիճում տեղի է ունեցել տօնակատարութիւն, միութեան նախաձեռնութեամբ եւ Սրբ. Թարգմանչաց եկեղեցու Կանանց եկեղեցասէր եւ «Հայ կին» միութեան կից «Արմենուհի» միութիւնների համագործակցութեամբ։
Նախապատրաստական աշխատնքներից սկսեալ մինչ տօնակատարութեան աւարտը երեք միութիւնները միասնաբար եւ որպէս մէկ ամբողջութիւն՝ յանձնախումբ անունը կրելով, ոչ մի ջանք չէին խնայել հայոց մայրերին արժանի գեղեցիկ եւ ջերմ մթնոլորտում մեծարելու եւ գնահատելու առումով։
Դաիլիճի մի կողմում ցուցադրութեան էին դրել Հայ կնոջ աշխատանքներն ու արժանիքները հայկական օջախի կենդանի պատկերը տեղադրելով։ Հայկական աւանդական մի օջախ որտեղ տեղադրւած էր ընտանիքի անդամներին իրար շուրջ բոլորող Քուրսին, Ս. Աւետարանն ու խնկենին, հայ կնոջ ձեռքով պատրաստւած գորգերն ու փռւածքներն, օջախը լուսաւորող լամպան, կարասները ու հիւրընկալ ընտանիքում անպակաս բաղաջն ու թէյի սպասները։ Իսկ միւս կողմում գունաւոր փուչիկներով զարդարւած յարդարանքը։
Ներկաները բաւականին հետաքրքրութեամբ մօտենում եւ յիշատակելի նկարներով անմահացնում էին իրենց պապենական տան գեղեցիկ յուշերն ու անցեալը։
Ձեռնարկի հաղորդավար Քարմէն Չարմահալեանը ողջոյնի խօսքերով բացւած յայտարարելով ձեռնարկը, բացատրեց Ապրիլի 7-ը Մայրերի օր՝ Գաբրիէլ հրեշտակապետի տիրամայր Մարիամին աւետիս բերելու յիշատակելու օրը։ Խօսքերի ընթացքում գնահատեց նաեւ հերոսածին եւ արհեստագործ հայ մայրերին։
Ապա Վանէ Մակարեանը Յովհաննէս Շիրազի «Ծնողական սէրը» բանաստեղծութիւնը արտասանելով, արժեւորեց հայոց մայրերի արժանիքները, եւ նրան անմիջապէս յաջորդեց Նորիկ Ղարաբեգեանը իր հայ մայրերին նւիրւած երկու մեներգներով։
Ներկաներին հրաւիրելով պատրաստւած հիւրասիրութիւններից օգտւելու եւ ուրախ պարեղանակներով հաճելի պահեր անցկացնելու ընթացքում, ներկաներին անակնկալ մատուցեց Թեհրանի հայոց թեմի առաջնորդ Տ. Սեպուհ արք. Սարգսեանի օգնական՝ Տ. Առաքել աբղ. Գատեհճեանը Հ. Մ. «Սիփան» միութեան վարչութեան նախագահ Հայկազ Շիրւանեանի ուղեկցութեամբ մուտք գործելով «Նորայր Էլսայեան» մարզադահլիճ օրւայ առիթով իր շնորհաւորանքները փոխանցելով Թեհրանի եւ սրահում ներկայ հայ մայրերին։
Հայր Սուրբը իր խօսքերում նշեց ապրիլի 7-ը մայրութեան տօնի վերածելու իմաստը, հայ մօր նւիրւածութեան եւ զոհաբերութեանը անդրադառնալով յատուկ շեշտը դրեց նեղութեան եւ դժւարութեան մէջ յայտնւելիս չարախօսներին եւ նեղացնողներին չհաւատացողն ու արդարութիւնը պաշտպանող հայ մօր առանձնայատկութեանը։ Աւելացնելով «… դարեր շարունակ հայ մայրը եղել է հայ ընտանիքի պահապան հրեշտակն հայկական օջախի ջերմացնող։ Հայ մայրը եղել է ընտանիքի սիւնն ու թագուհին ինչպէս ասել է Խրիմեան Հայրիկը … »։ Հայր Սուրբը իր խօսքի աւարտին աւելացրեց.- «Թող Աստւած ձեզ պարգեւի առողջութիւն, յաջողութիւն ու երկար կեանք»։
Ապա Հայր Սուրբը Հ. Մ. «Սիփան» միութեան վարչութեան նախագահի ընկերակցութեամբ մօտենալով զարդարանքներով եւ ուտեստներով պատրաստւած սեղաններին բոլոր մայրերին անձամբ շնորհաւորեց իրենց տօնը փոխանցելով թեմի բարեխնամ առաջնորդ Տ. Սեպուհ արք. Սարգսեանի եւ իր օրհնանքն ու բարեմաղթանքները։
Ձեռնարկը շարունակւեց խրախճանքի բաժնով, նւագի պատասխանատու Ադրիանի ուրախ պարեղանակներով, եւ ջերմ ու ուրախ մթնոլորտով։
ՌՀ եւ ԺՏՕ
