Ատրպատականի հայոց թեմի առաջնորդը ընդունեց ՀՕՄ-ի Թաւրիզի վարչութեանը
Ատրպատական, ազգային առաջնորդարան, Թաւրիզ – Երեքշաբթի, մայիս 13-ին, կէսօրւայ ժամը 1:00-ին, Ատրպատականի հայոց թեմի առաջնորդ՝ Տ. Գրիգոր Արք. Չիֆթճեանը իր գրասենեակում ընդունեց ՀՕՄ-ի Թաւրիզի վարչութեանը, գլխաւորութեամբ ատենապետուհի Անահիտ Մարգարեանի:
Ատենապետուհին վարչութեան անունից երախտագիտական խօսք ուղղեց Սրբազան Հօրը, յատկապէս միութեան ծրագրերին եւ նախաձեռնութիւններին հովանաւորելու համար, որոնք միշտ գովաբանւում են նրա եւ Թեմական խորհրդի միջոցով:
Առաջնորդ Սրբազանը մի անգամ եւս իր բարձր գնահատանքը յայտնեց Միութեան միջոցով համայնքում կազմակերպւող կրթական ու մշակութային ծրագրերին, որոնք տեղի են ունենում ժողովրդի մասնակցութեամբ: Սրբազան Հայրը ընդունեց վարչութեան ներկայացրած խնդրագիրը, միութեան անդամներից ոմանց Հայրապետական բարձր գնահատման արժանացնելու հեռանկարը պարփակող: Նա միանգամ եւս բարձր գնահատեց նւիրեալ անձանց կատարած աշխատանքը, կրթական, մշակութային եւ բարեսիրական ծրագրերով:
Սրբազան Հայրը յոյս յայտնեց, որ նրանց խնդրագրի հիման վրայ յատուկ դիմում է ներկայացնելու Վեհափառ Հօրը, որպէսզի Նորին Սրբութիւնը հայրապետական գնահատանքի արժանացնի արժանաւորներին:
