Թաւրիզի «Տաթեւ» պարախմբի անդամների հաւաքոյթը

Ատրպատական, ազգային առաջնորդարան, Թաւրիզ – Շաբաթ, նոյեմբերի 16-ի երե­կոյեան ժամը 7:30-ին, ՀՕՄ-ի կենտրոնատեղիում, Թաւրիզի վարչութեան կազմակերպութեամբ սկսւեց «Տաթեւ» պա­րախմբին յատկացւած երեկոն, թէյասե­ղանի շուրջը:

Սոյն հաւաքին նախագահեց Ատրպատականի հայոց թեմի առաջ­նորդ՝ Տ.  Գրիգոր արք. Չիֆթճեանը, ընկերակցու­թ­եամբ Թեմական խորհրդի անդամների, գլխա­ւորութեամբ ատենապետ Գագիկ Ջորջեանի, գնահատելու հա­մար Թեհրանում կայացած պարային համոյ­թին, Թաւրիզի պարախմբի բերած մաս­նակ­ցու­թիւնը:

Նշենք, որ Թեհրանում տեղի ունե­ցած ելոյթին մասնակցել էին նաեւ թեհրա­նահայ պարախմբեր եւ բոլորն էլ ի­րենց նախապատրաստական աշխա­տան­­քը լաւա­պէս իրագործել էին, փառաշուք ելոյթ ունենալով բեմում: Ուս­տի, Թաւ­րիզի պարա­խմբի գործունէութ­իւնը եւ տքնաջան աշխատանքը քաջա­լերելու համար, ՀՕՄ-ի վարչութիւնը գնահատման սոյն ծրագիրն էր իրականացնում:

Բարի գալստեան եւ բացման խօսքով Նայիրի Դիլանեանը արտայայտւեց, ան­ցած տաս տարիների պատմութիւնը ներկայացնելով սոյն պարախմբին: Երախտագիտութեամբ յիշեց գեղարւեստական ղեկավար Կարինէ Մանուչերեանին, որ սկզբից մինչեւ այսօր անխոնջ հետեւում է պարախմբի փորձերին եւ յառաջադիմութեանը: Նա­յիրին նաեւ ներկայացրեց պարախմբի ելոյթները, Թաւրիզից մինչեւ Ս. Թադէի վանքում, Սպահանից մինչեւ Թեհրան, որը քաջալերական էր եղել բոլոր անդամնե­րին: Նա յատկապէս յիշեց պարերի դասատուներ Մարիա Գասպարեանին, Մանէ Նա­զարբէգեանին, Սեպուհ Անտոնեանին, Արինէ Բադալեանին, որոնք երկար ժամանակ են տրամադրում անդամների պարային կազմաւորմանը: Նայիրի Դիլանեանը յատ­կապէս յիշեց վարչական գործերի նւիրեալ պատասխանատուներ Արմոնդ Բադալեա­նին, Համլետ Նազարբէգեանին եւ Մելքոն Նաւասարդեանին, որոնք միշտ պատրաստակամ են ծառայութեան:

Առաջնորդ Սրբազան Հայրը գնա­հատական պատգամ ուղղեց բոլոր մաս­նա­կիցներին եւ յատկապէս պարախմբի անդամ-անդամուհիներին, նրանց գեղար­ւեստա­կան պարուսոյց Կարինէ Մանուչերեանին, կազմակերպիչ Նայիրի Դիլան­եա­նին, եւ փորձերի ծանր աշխատանքներին իրենց նպաստը բերող անդամներին. «Գնահատում ենք ձեր բոլորի նւիրեալ աշխատանքը: Մշակոյթը մեր ազգի յա­ւերժութեան ճանա­պարհն է: Հողային կորուստներ եթէ ունենանք, կարող է դարձեալ ձեռք բերել դրանք, նոր սերունդների անկոտրում կամքով: Բայց վա՜յ այն ազգին, որ իր մշակոյթը կոր­ցնում է. այն ատեն նա ձուլւում է այլ ազ­գերի մէջ, իր ինքնութիւնը պահպանել չկա­րենալու պատճառով: Մեր ինքնութ­եան թուղթը, մեր մշակոյթն է՝ գիր ու գրա­կա­նու­թեամբ, երգով ու պարով, նկարչու­թեամբ եւ քանդակագործութեամբ, եւ այս­պէս շա­րունակաբար…»,- ասաց Սր­բա­­զան Հայրը քաջալերելով բոլոր մասնա­կիցնե­րին: Նա կոչ ուղղեց համայնքում պարախմբին անդամակցելու կարողութ­իւն ունեցող երիտասար­դութեան, զօրակցե­լու Թաւրիզի պարախմբին, եւ նոր ելոյթ­ներով զարդա­րե­լու հայոց բեմը:

ՀՕՄ-ի վարչութիւնը յատուկ նւէրներ էր պատրաստել մասնակիցներին, ո­րոնք Սրբազան Հօր ձեռքից ստացան խմբի անդամները: Պարախմբի բոլոր անդամներին յատուկ գնահատագրեր նաեւ տրւեցին, յիշատակելով նրանց անձնւէր մասնակցութ­իւնը խմբի աշխատանքներին: Մասնաւոր յիշատակներ նա­եւ տւեցին «Տաթեւ» պա­րախմբին օժանդակած բոլոր անձերին, աննահանջ երթ մաղ­թելով խմբի հաւաքական ճիգին: Գնահատական յատուկ նւէրով պատւեց նաեւ Անի Դիլանեանը, որը կազմա­կերպչական գործում մնայուն ներկայութիւն է լինում: Վերջում, Սրբազան Հօր ձեռամբ ՀՕՄ-ի վարչութեան ատենապետուհի Անա­հիտ Մարգարեանին յանձնւեց, Թեհրա­նում ելոյթ ունեցած բոլոր խմբերի անունները կրող յատուկ յուշատախտակը:

Թէյասեղանն ու հաւաքը եզրափակ­ւեց գոհունակ սրտով, եւ նոր ելոյթներ վա­­յելելու սպասումով: