Մայրերի օրը նշւեց Ուրմիայի ՀՕՄ-ի կազմակերպութեամբ
Ատրպատական, ազգային առաջնորդարան, Թաւրիզ – Երկուշաբթի, մայիսի 12-ի երեկոյեան ժամը 4-ին, Ուրմիայի եկեղեցու «Արամ Մանուկեան» սրահում տեղի ունեցաւ հանդիսութիւն, նւիրւած «Մայրերի օր»-ւայ: Հովանաւորութեամբ եւ նախագահութեամբ Ատրպատականի հայոց թեմի առաջնորդ՝ Տ. Գրիգոր արք. Չիֆթճեանի եւ կազմակերպութեամբ ՀՕՄ-ի Ուրմիայի մասնաճիւղի վարչութեան, սրահում հաւաքւել էին Ուրմիայի տարբեր միութիւնների եւ կազմակերպութիւնների վարչական ներկայացուցիչներ, քաղաքում եւ գիւղերում բնակւող ազգայինների, ինչպէս նաեւ համայնքային աշխատանքները քաջալերող անհատներ: Սրբազան Հօր պաշտօնական սեղանի հրաւիրեալների շարքում էին Ուրմիայի Գործակալական խորհրդի ատենապետ Վանիկ Յակոբեանս, տիկինը՝ Անի, ազգային բարերար Էդիկ Մեջլումեանի տիկինը՝ Սանդրա, Պատգամաւորական ժողովի Բ ատենադպրուհի Սարինէ Մեջլումեան, ինչպէս նաեւ ՀՕՄ-ի վարչութեան ատենապետուհի Լալա Ֆարհադեան, որը բարի գալստեան եւ ողջոյնի խօսքով հանդէս եկաւ: Նա ողջունեց Սրբազան Հօր հայրական հովանաւորութիւնը եւ օրհնաբեր ներկայութիւնը, Միութեան կազմակերպած սոյն սքանչելի երեկոյին:
Օրւայ ծրագրի ներկայացումը կատարեց վարչութեան ատենադպրուհի Լինէթ Մեջլումեանը: Նա ողջունեց նաեւ ասորական համայնքի կանանց ներկայութիւնը եւ շնորհաւորեց նրանց մայրերի տօնը. «Սիրելի՛ մայրեր, թող ձեր լոյսը միշտ վառ մնայ», ասաց եւ եզրակացրեց Լինէթ Մեջլումեանը:
Միութեան վաստակաշատ անդամուհիներից Ծովիկ Կարապետեանը մօր նւիրւած ասմունքով հանդէս եկաւ, հանդիսականների զգացմունքը ծաղկեցնելով մայրերի նկատմամբ, երախտագիտական մօտեցումով: Ապա, Ցօղիկ Մուրադեանի կողմից ներկաներին ցուցադրւեց այն կանանց լուսանկարները, որոնք հայոց պատմութեան բեմում իրենց ազգային, ֆիդայական, գրական եւ արւեստի բնագաւառներում մեծանուն անձեր էին եղել, իրենց օրինակելի պահւածքով եւ նւիրական ծառայութեամբ: Մայրերի նւիրւած յատուկ խօսքով բեմ բարձրացաւ նաեւ Նարինէ Մեջլումեանը:
Առաջնորդ Սրբազանը մայրերի նւիրւած օրւայ առիթով, հայ բանաստեղծների սքանչելի տողերից մէջբերումներ կատարեց, մայրական սէրը, անսպառ հոգածութիւնը եւ ցմահ երկարող հովանաւորութիւնը վերստին արժեւորման ենթարկելով: Ի վերջոյ, նա բարձր գնահատեց ՀՕՄ-ի Ուրմիայի մասնաճիւղի անդամուհիներին, որոնք քաղաքի ազգային կեանքում իւրայատուկ ներդրում ունեն, յատկապէս տօնական օրերի առթիւ կազմակերպւած ծրագիրներով, եւ գնահատանքներով:
Ծրագրի ընթացքում մէկից աւելի վիճակախաղերով բազմաթիւ անձեր նւէրների արժանացան, մեծ խանդավառութիւն ստեղծելով սրահում: Թւերի բախտահանումը կատարեց տիրամայր Շուշան Չիֆթճեանը: Վարչութեան կազմակերպութեամբ տիրամայրը, բարերարուհի Սանդրա Մեջլումեանը եւ վարչութեան անդամուհիները միասնաբար հատեցին օրւայ կարկանդակը:
Մինչեւ երեկոյեան ժամը 7 տեւած ծրագիրը մեծ խանդավառութիւն ստեղծեց համայնքում, սիրալիր զրոյցներով, բարեկամական մօտեցումներով, շրջանային նիւթերով եւ ազգային կեանքը ծաղկուն պահելու վառ գիտակցութեամբ:
Ծրագրի աւարտին, առաջնորդ Սրբազանը դարձեալ բարձր գնահատեց ՀՕՄ-ի վարչութեան աշխատանքը, նորանոր յաջողութիւններ մաղթել նրանց, որպէսզի միշտ աշխոյժ եւ կայտառ պահեն ուրմիահայ կեանքն ու ազգային ոգին:
