Ատրպատականի հայոց թեմի առաջնորդը Քարբալայի ուխտաւորներին սահմանամերձ այց կատարեց
Ատրպատական, ազգային առաջնորդարան, Թաւրիզ – Հինգշաբթի, օգոստոսի 14-ին, Ատրպատականի հայոց թեմի առաջնորդ՝ Տ. Գրիգոր արք. Չիֆթճեանը, ընկերակցութեամբ Թեմական խորհրդի ատենապետ Գագիկ Ջորջեանի, առաւօտ արշալոյսին ուղղւեց դէպի Ուրմիա, գնալու համար Քարբալայի տարեկան ուխտաւորներին տեսութեան, եւ ոմանց բարի ուխտագնացութիւն, իսկ ուրիշներին բարի վերադարձ մաղթելու: Ուրմիայում Սրբազան Հօր շքախումբին միացան Իրանի Իսլ. խորհրդարանում Թեհրանի եւ հիւսիսային իրանահայութեան պատգամաւոր դոկտ. Արա Շահվերդեանը, Պատգամաւորական ժողովի փոխատենապետ Սաքօ Մեջլումեանը եւ Գործակալական խորհրդի ատենապետ՝ Վանիկ Յակոբեանսը:
Ուրմիայում, նախքան ճանապարհւելը, շքախումբը հանդիպեց ազգային բարերար Էդիկ Մեջլումեանի, նրա «Շենրիզ» ընկերութեան գրասենեակում, եւ ապա ուղղւեց դէպի Իրան-Իրաք սահմանամերձ գօտին՝ Փիրանշահր գիւղաքաղաքը:
Միջկրօնական երկխօսութեան շօշափելի օրինակ հանդիսանալով, առաջնորդ Սրբազանը շուրջ երկու ժամեր եղաւ մուսուլման ուխտաւորների հետ, հայ եւ ասորական համայնքների անունով հաստատւած վրանի տակ, նւիրատւութեամբ Էդիկ Մեջլումեանի: Սոյն այցը առիթ հանդիսացաւ հանդիպումներ ունենալու պետական եւ ի-րանցի ուխտաւորների հետ, ինչպէս նախագահ Փեզեշքեանի ազգականների, Ուրմիայի Փոքրամասնութեան պատասխանատուի, եւ քուրդական համայնքի ներկայացուցիչների հետ, որոնք հաւաքւել էին հայ-ասորական վրանի տակ: Յայտնենք, որ ասորիների պատգամաւոր Շառլի Էնւիէն եւս ներկայ էր, ուղեկցութեամբ ասորական համայնքի կեշէների (քահանաներ):
Առաջնորդ Սրբազանը թղթակիցների բոլոր հարցերին պատասխանեց, յատկապէս Իրանի իսլամական հանրապետութեան տարածքում կրօնների երկխօսութիւնից բացի, իբրեւ համագործակցութեան երեւոյթ գովաբանելով դրանց մէկտեղում նման առիթներով. «Կրօնները իւրայատկութիւններ ունեն, սակայն նրանք աւելի արժէքաւոր են լինում, երբ այլ կրօնների հետ ո՛չ միայն խօսում են, այլ գործակցում:
Աշխարհի գլխաւոր եւ վատագոյն խնդիրներից է թշնամութիւնը, պատերազմը, եւ որի հետեւանքով անմեղ մարդկանց մահը, լինեն նրանք բանակայիններ, եւ կամ սովորական ժողովրդի մեծ կամ փոքր զաւակներ: Իրանում մի քանի ամիսներ առաջ տեղի ունեցած յարձակումը Սիոնիստական կառավարութեան օդային ոյժի կողմից, բազմաթիւ աւերներ արձանագրեց: Դեռ աւելին, Պաղեստինում տեղի ունեցող ամենօրեայ անմեղ մարդկանց զոհերը քաղաքակիրթ աշխարհի չափն ու սահմանը անցացրել են: Որտե՞ղ են խաղաղութեան մասին արտայայտւող եւ դրա սկզբունքներին սիրահար երկրների ղեկավարները, երբ հազարաւոր երեխաներ սոված են, իսկ միւս կողմից հազարաւորներ դեռ կեանքի երեսը չտեսած, մահը ճաշակեցին: Այսօր, երբ դէպի Քարբալայի մուսուլման սրբավայրը քայլելով են գնում ուխտաւորներ, մենք քաջալերելու ենք եկել նրանց, որպէսզի Աստւած լսի նրանց աղօթքը եւ խաղաղութիւն պարգեւի աշխարհին»,- ասաց Սրբազան Հայրը:
Նշենք, որ հայ ասորական համայնքային սոյն յարգանքի մասին արտայայտւեցին նաեւ ասորիների կէշէն, ինչպէս նաեւ հայ եւ ասորի պատգամաւորները Իրանի Իսլ. խորհրդարանի:
Յայտնենք, որ Սրբազան Հայրը իր ընկերակիցների հետ կարճ այցելութիւն տւեց նաեւ քրիստոնէական վրանի դրացնութեան մէջ եղող մուսուլմանական վրաններ, մինչեւ Սուննի համայնքի գորգապատ ընդունարանը: Նա մօտեցաւ նաեւ ուխտաւորներին, եւ հաճելի զրոյց ունեցաւ նրանց աւագ եւ կրտսեր սերունդի ներկայացուցիչների հետ:
