Հ.Մ.Ա.Կ.-ի Թաւրիզի մասնաճիւղի Սկաուտական մարմնի կազմակերպած բացօթեայ նախաճաշը

Ատրպատական, ազգային առաջնորդարան, Թաւրիզ – Ուրբաթ, օգոստոսի 15-ի առաւօտեան ժամը 9:00-ից սկսած, ազգային առաջնորդարանի այգում բացօթեայ նախաճաշ էր կազմակերպւել Հ.Մ.Ա.Կ.-ի Թաւրիզի մասնաճիւղի Սկաուտական խորհրդի խմբապետական կազմի նախաձեռնութեամբ, բարձր ճաշակով յարդարւած սեղաններով, համադամ ուտեստների տեսականիով որին ներկայ գտնւեցին թաւրիզահայեր:

Ատրպատականի հայոց թեմի առաջնորդ՝ Տ. Գրիգոր արք. Չիֆթճեանը, ընկերակցութեամբ Պատգամաւորականի ատենապետուհի Արմինէ Վահրամեանի եւ Թեմականի ատենապետ՝ Գագիկ Ջորջեանի, ինչպէս նաեւ սոյն կազմերի անդամներին, ներկայ գտնւեց նախաճաշին, քաջալերելով Սկաուտական կազմը, որի նորանոր աշխատանքները քաջալերելու համար ներկաների մեծաթիւ մասնակցութիւնը բացայայտ էր: Սոյն նախաճաշին ներկայ գտնւեց նաեւ Իրանի Իսլ. խորհրդարանում Թեհրանի եւ հիւսիսային իրանահայութեան պատգամաւոր Արա Շահվերդեանը, ընկերակցութեամբ Ուրմիայի Գործակալական խորհրդի ատենապետ Վանիկ Յակոբեանսի եւ նրա կնոջ՝ Անիի: Ճոխ բուֆէի դասաւորումը տքնաջան աշխատանքով կատարել էին Սկաուտական կազմի երէց անդամ-անդամուհիները:

Սոյն առիթը եւ համայնքի զաւակների մտերմութիւնը բացայայտող խօսքերով, Սկաուտական խորհրդի խմբապետական կազմի անունից ներկաներին բարի գալուստ մաղթեց Արսինէ Բաբայեանը: Նա սկաուտական շարքերի ինքնութիւնն ու նպատակը պարզող տողերով ասաց. «Սկաուտութիւնը ապրելաձեւ է, որով անձը իր կեանքը կապրի այդ շնորհքով: Սկաուտութիւնը լինելով ոչ-կուսակցական եւ չքաղաքականացւած շարժում, սովորեցրել է մեզ ընդունել բոլորին, եւ մնում է մի նպատակի շուրջ՝ աշխատել. ինչպէս սկաուտը ասում է իր երդումում՝ հաւատարիմ մնալ Աստծուն, ազգին եւ հայրենիքին: Այսօր մեզ համար կրկնակի ուրախութեան եւ հպարտութեան օր է, որով սոյն աշխատանքը կարողացանք դասաւորել», ասաց նա եւ ապա անդրադարձաւ բաժանմունքի հիմնադրման պատմութեան. «20 տարիներից ի վեր մեր բաժանմունքը ծաւալել է իր գործունէութիւնը, պատրաստելով ապագայ սկաուտներ, փայլուն եւ պատւաբեր սերունդ հայ ազգին», ասա նա եւ եզրափակեց իր խօսքը երախտագիտական արտայայտութիւններով Միութեան նախագահ Նժդիկ Աբրահամեանին, մանկավարժ եւ սկաուտական դաստիարակ Սաթիկ Աբրահամեանին, որ իր «ուղեկցութեան, փոխանցումների եւ խորհուրդների շնորհիւ» նոր սերնդին սովորեցրել է հաւատարիմ մնալ սկաուտական նշանաբանին՝ «Բարձրացիր, բարձրացուր»-ին, ասաց նա:

Նախաճաշի ընթացքում խօսք առնողների շարքում էր Հ.Մ.Ա.Կ.-ի Թաւրիզի մասնաճիւղի նախագահ Նժդիկ Աբրահամեանը: Շնորհակալական սրտալից տողերով նա իր գոհունակութիւնը յայտնեց բոլոր նրանց, ովքեր միշտ «Արարատ»-ի կողքին են կանգնում, քաջալերելով հայասէր միութեան բոլոր ծրագրերը. «Մեր գործակիցներն են սկաուտական կազմի պատասխանատուները: Վստահ ենք, որ նոր սերնդի հետ համագործակցութեամբ, անպայման իրենց նպաստը ընծայաբերելու են մեր ազգին»,- ասաց նա:

Առաջնորդ Սրբազան Հօր սեղանօրհնութեամբ սկսւեց օրը, երբ հայկական մեղմ երաժշտութեան հաճելի կշռոյթի ներքոյ ժողովուրդը մօտեցաւ սեղաններին, վայելելու համար բազմատեսակ նախաճաշը:

Գնահատելու համար բարձրամակարդակ նախաճաշի սոյն առիթը, Սրբազան Հայրը իր քաջալերական խօսքը ուղղեց Հ.Մ.Ա.Կ.-ի վարչութեան եւ սկաուտական խորհրդի պատասխանատուներին. «Մի պահ այլ աշխարհ փոխադրեցիք մեզ: Աշխարհահռչակ պանդոկների մէջ զգացինք մի պահ մենք զմեզ, երբ միօրեայ նախաճաշի համար այսքան բծախնդիր աշխատանք էք իրականացրել: Հ.Մ.Ա.Կ.-ի Թաւրիզի մասնաճիւղը ոչինչից ինչ առաջացնելու մասնագիտութիւն ունեցող կազմակերպութիւն է: Մեր փոքրաթիւ համայնքի մէջ չյուսահատող, եւ ամէն ինչ իր բարձրութեան վրայ պահպանող միութիւն»,- ասաց Սրբազանը, յիշելով նաեւ վարչութեան կազմին, գլխաւորութեամբ Նժդիկ Աբրահամեանին:

Սրբազան Հայրը յատկապէս գնահատեց Թաւրիզի մասնաճիւղի Սկաուտական կազմի վերակազմակերպման աշխատանքներում կարեւոր դերակատարութիւն ունեցած Սաթիկ Աբրահամեանին. «Արարատ-ի շրջափակում իր կարգապահութիւն ուսուցանող ձայնով բոլորիս ծանօթ է Սաթիկը: Բազմաթիւ ուրբաթ օրեր իր նախանձախնդիր աշխատանքով չի՛ զլացել նոր սերունդ դաստիարակելու գործը վառ պահել»,- ասաց Սրբազանը եւ յատուկ յուշանւէրով պատւեց նրան, անցած աւելի քան 20 տարիների անձնւէր եւ անվճար ծառայութիւնը գնահատեց: Այս առիթով նա բարի աշխատանք մաղթեց նաեւ երիտասարդ Արենուշներին, որոնք շարունակում են հայ երիտասարդութեան մարմնամարզական հզօր աշխատանքը:

Համադամ նախաճաշից յետոյ շարունակւեց ժողովրդական խանդավառ հաւաքը, սկաուտական խաղերի կազմակերպումով: Բոլոր ներկաները, սկսած Սրբազան Հայրից, մասնակցեցին յատկապէս թոկ ձգելու խաղին, որոնք սկաուտներ իրենք ղեկավարում էին: Փուչիկները բաժակների մէջ ուռեցնելու խաղը եւս հետաքրքիր էր նոր սերնդի համար: Օրւայ վիճակախաղի յաղթող յայտարարւեց պատգամաւոր Արա Շահվերդեանը: Նոյն առիթով յայտարարւեց բոլոր այն նւիրատուների անունները, որոնք քաջալերական յատկացումներով զօրավիգ եղան միութեան:

Նախաճաշի օրւան վերջին բաժնով, ներկաները հրաւիրւեցին մրգերի եւ քաղցրեղէնի վայելքին յատկացւած անկիւնը շրջափակի, որտեղ ներկաները տնական խմորեղէնի եւ այլ քաղցրաւէնիքների ճաշակը ստացան: Հ.Մ.Ա.Կ.-ի վարչութիւնը նոյն օրը կէսօրին յատուկ ճաշով պատւեց բոլոր այն անդամներին, որոնք այնքան բծախնդրութեամբ պատրաստել էին նախաճաշի սոյն հանդիպումը թաւրիզահայութեան մտերմիկ շրջանակի համար: