Ատրպատականի հայոց թեմի առաջնորդը ընդունեց Հայաստանում ԻԻՀ նորանշանակ դեսպանին
Ատրպատական, ազգային առաջնորդարան, Թաւրիզ – Ուրբաթ, հոկտեմբերի 31-ի առաւօտեան ժամը 10:30-ին, Ատրպատականի հայոց թեմի առաջնորդ՝ Տ. Գրիգոր արք. Չիֆթճեանը, Ազգային առաջնորդարանի «Էմիլ Յակոբեան» դահլիճում ընդունեց պաշտօնական այցը Իրանի Իսլամական Հանրապետութեան կողմից Հայաստանի Հանրապետութիւնում նորանշանակ դեսպանին՝ Խալիլ Շիրղոլամիին: Նրան ընկերակցում էին Կապանում ԻԻՀ հաւատարմատար Աբեդինը, Արեւելեան Ատրպատականում Արտաքին գործերի նախարարութեան ներկայացուցիչ՝ Նաջաֆզադէն եւ Հայաստանի-Իրան յարաբերութեանց գրասենեակի պատասխանատու՝ Նազիֆը:
Պաշտօնական հանդիպմանը ներկայ գտնւեցին նաեւ Թեմական խորհրդի անդամները, գլխաւորութեամբ ատենապետ Գագիկ Ջորջեանի:
Առաջնորդ Սրբազանը շնորհաւորական խօսքով ողջունեց Հայաստանում Իրանի Իսլամական Հանրապետութեան նորանշանակ դեսպանին, յատկապէս ներկայ ժամանակներում նրա քաղաքական ու դիւանագիտական առաքելութեանը յաջողութիւն մաղթելով:
Վերջին ժամանակներին, Հայաստան եւ Արեւմուտք յարաբերութիւնների սերտացման շրջագծում, Սրբազան Հայրը պարզօրէն անդրադարձաւ Իրան-Հայաստան դարաւոր դրացնութեան բերած բարեկամական կապերին, որոնք սերտացել էին յատկապէս Հայաստանի անկախութիւնից յետոյ, սահմանային կապով, ու դիւանագիտական յարաբերութեամբ:
Թեմական խորհրդի ատենապետ Գագիկ Ջորջեանը խօսք առնելով, լայնօրէն բացատրեց Ատրպատականի հայոց թեմի եկեղեցական ու վանական ժառանգութիւնը, ինչպէս նաեւ այն դարաւոր առաքելութիւնը, որը հայ եկեղեցին շարունակում է կատարել Քրիստոնեայ աշխարհի հնագոյն վայրում: Նա Թեմական խորհրդի անունից պատրաստակամութիւն յայտնեց մնայուն կապի եւ փոխադարձ յարաբերութեան սերտացման համար: Ատենապետը ակնարկեց նաեւ Փոքրամասնութեան գրասենեակի աչալուրջ մօտեցումներին Ատրպատականի հայոց թեմին, եւ հնարաւոր բոլոր օժանդակութիւններին:
Դեսպանը յատուկ խօսքով իր ուրախութիւնը յայտնեց սոյն այցի եւ ծանօթացման համար, եւ խորապէս վերլուծեց կրօնի եւ քաղաքական կեանքի այն օրինակելի օրինակը, որը ցոյց է տալիս Իրանի Իսլամական Հանրապետութիւնը: Նա Իրան եւ Հայաստան կապերի սերտացման կարեւորութեանը անդրադարձաւ, ինչպէս նաեւ ժողովրդային փոխադարձ այցերի ակնարկեց, յատկապէս Իրանի տարբեր Թեմերի տարածքներում գտնւող հայոց վանքերի այցելութիւնները քաջալերական համարելով:
Առաջնորդ Սրբազանը եւ դեսպանը, Հայաստանում տիրող հակաեկեղեցական իրավիճակին անդրադարձ կատարեցին, հայ ժողովրդի ներազգային դրութիւնը մտահոգիչ եւ անբաղձալի համարելով:
Բարեմաղթութեան խօսք արտասանեց նաեւ Կապանում Իրանի հաւատարմատար Աբեդինը, յարատեւ համագործակցութեան եւ փոխադարձ այցելութեան խոր ցանկութեամբ:
