Փարիզի դատախազ. «Լուվրի կողոպուտը իրականացրել են մանր յանցագործներ, այլ ոչ թէ պրոֆեսիոնալներ»
«ԱԼԻՔ» – Փարիզի դատախազ Լոր Բեկկաուն յայտարարել է, որ անցած ամիս Փարիզի Լուվր թանգարանից 102 միլիոն դոլար արժողութեամբ պատմական գանձերի հանդուգն կողոպուտը իրականացրել են ոչ թէ կազմակերպւած յանցաւոր աշխարհի պրոֆեսիոնալներ, այլ մանր յանցագործներ, այս մասին ըստ Tert.am-ի հաղորդում է Reuters-ը։
Երկու շաբաթ առաջ՝ կիրակի առաւօտեան, երկու տղամարդ ներխուժել են Լուվր, կոտրել պատուհանը, անկիւնային յղկող սարքերով բացել ցուցափեղկերը, ապա փախուստի են դիմել սկուտերների հետեւի նստատեղերին՝ երկու համախոհների օգնութեամբ։ Կողոպուտը տեւել է եօթ րոպէից պակաս։
Քանի որ գողութեան մէջ կասկածւող չորս անձանցից երեքը, ըստ ենթադրութիւնների, կալանաւորւած են, իսկ գանձերը դեռեւս չեն գտնւել, իշխանութիւնները նշում են, որ նրանց նկարագրութիւնները յիշեցնում են ոչ թէ «Օուշէնի տասնմէկ ընկերները» ֆիլմի ոճով գանգստերների, այլ Փարիզի հիւսիսային արւարձաններից սերող մանր յանցագործների։
«Սա միանշանակ ոչ սովորական յանցագործութիւն է… բայց այն տեսակի յանցագործութիւն է, որը սովորաբար չենք կապում կազմակերպւած յանցաւորութեան վերին շերտերի հետ»,- ասել է Բեկկաուն franceinfo ռադիոյին։
Դատախազը նշել է, որ կասկածեալները «ակնյայտօրէն տեղացիներ» են։
Նա յաւելել է, որ այս պահին ձերբակալւած չորս անձանց՝ այդ թւում՝ կասկածեալներից մէկի ընկերուհու բնութագրերը բնորոշ չեն կազմակերպւած յանցաւորութեան պրոֆեսիոնալներին, որոնք ունակ են իրականացնել բարդ գործողութիւններ։
Ֆրանսիական լրատւամիջոցները ենթադրել են, որ կողոպտիչները սիրողական մակարդակի են եղել, քանի որ փախուստի ժամանակ գցել են ամենաթանկարժէք գանձը՝ կայսրուհի Եւգենիայի թագը, որը պատրաստւած է ոսկուց, զմրուխտներից եւ ադամանդներից, թողել են գործիքներն ու այլ իրեր յանցագործութեան վայրում եւ չեն կարողացել այրել բեռնատար մեքենան՝ փախուստից առաջ։
