Թաւրիզի ազգային դպրոցների կազմակերպած նպաստընկալ ճաշկերոյթը

Ատրպատական, ազգային առաջնորդարան, Թաւրիզ – Ուրբաթ, նոյեմբերի 7-ի կէսօրին, Թաւրիզի հայոց ազգային «Թամարեան-Հայկազեան-Սահակեան» դպրոցի տեսչութեան յատուկ հրաւէրով, Ատրպատականի հայոց թեմի առաջնորդ՝ Տ. Գրիգոր արք. Չիֆթճեանի նախագահութեամբ, եւ հովանաւորութեամբ Թեմական խորհրդի, տեղի ունեցաւ պաշտօնական ճաշկերոյթ, նպաստընկալ բնոյթի, Ազգային առաջնորդարանի «Համազասպ Ոսկանեան» սրահում:

Տեսչութեան գլխաւորութեամբ եւ Ծնողական խորհրդի կազմակերպութեամբ սոյն ճաշկերոյթին հրաւիրւել էին Ազգային իշխանութեան կազմերի անդամներ, ինչպէս նաեւ թաւրիզահայ միութիւնների եւ կազմակերպութիւնների պատասխանատուներ, եւ մեծ թւով թաւրիզահայեր:

Համադամ կերակրատեսակների բոլոր հաւաքածոն պատրաստւել էր Ծնողական խորհրդի անդամուհիների միջոցով, տնային ճաշերի սքանչելի տեսականին մատուցելով ներկաներին:

Բացման եւ բարի գալստեան խօսքով հանդէս եկաւ դպրոցի տեսչուհի՝ Սիլւա Աշըղեանը: Նա հայոց դպրոցի հանդէպ բոլորի տածած սէրը յիշելով, իր անսահման երախտագիտութիւնը յայտնեց բոլոր ներկաներին, յիշեցնելով, որ Թաւրիզի հայոց դպրոցը բոլոր թաւրիզահայերի երկրորդ տունն է, իրենց հարազատ տան կողքին:

Ազգային իշխանութեան անունից խօսք յղեց Պատգամաւորական ժողովի ատենապետուհի՝ Արմինէ Վահրամեանը: Նա շեշտեց ազզայնականութեան հիմը հան-դիսացող հայոց դպրոցի հանդէպ բոլորի հոգածութիւնը եւ արագօրէն շտապելը, դէպի դրա կազմակերպած բոլոր ծրագրերը. «Բոլորդ գալիս էք, լինելու հայոց դպրոցի կողքին, գուրգուրելու այն, ձեր ջերմ ձեռքերի մէջ պահելու համար ձեր դպրոցը, պահպանելու համար նոր սերունդը»,- ասաց նա:

Առաջնորդ Սրբազանը հայրական խօսքով իր գնահատանքը յայտնեց բոլորին, կազմակերպիչներին՝ տեսչութեան, ծնողներին, եւ նոյնիսկ բոլոր ներկաներին, որոնք իմանում են արժէքը հայոց դպրոցին, որ դարերից ի վեր իր ներկայութեամբ, նոր սերնդի զարգացման է նպաստել եւ շարունակում է միեւնոյն առաքելութիւնը, արդիական բոլոր զարգացումներով: Սրբազանը կարեւորութեամբ շեշտեց հայոց դպրոցին միշտ հարազատի ոգով մօտենալու կարեւորութիւնը.

«Թաւրիզի դպրոցը մեր տունն է: Այս օրերին տեսնում էք, վստահաբար, թէ ինչպէս նա լինելու է մեր Թեմի հնութիւնների, մեր հայրերից ժառանգւած պատմական արժէք ներկայացնող յիշատակային գանձերի ամենամօտիկ հարեւանը: Դրանք բոլորը մեր նոր սերնդի զաւակների միտքը, հեռանկարները հարստացնող աղբիւրներ են հանդիսանալու», ասաց Սրբազանը եւ գնահատեց տնօրէնութեան Սիլւա Աշըղեանին, որ դպրոցի տեսչուհի առնթեր, սիրով ստանձնել էր «Մելիք Թանգեան» թանգարանի տնօրէնի պատասխանատու պաշտօնը: Նա շեշտեց, որ Թանգարանին ծանօթութիւնը առաւել հարստացնելու է հայոց դպրոցից անցած իւրաքանչիւր թաւրիզեցի աշակերտի, որը դեռեւս կենդանի է այս կեանքում. «Մեծահասակների ենք հանդիպել այս գաղութում, որոնք գաղափար իսկ չունեն, թէ մեր Թանգարանի փակ դռների ետին ի՞նչ ունենք, ի՞նչ ենք ժառանգել նախնիներից…: Այս երկրում պարագաների, եւ երբեմն անհատների ստեղծած պայմանների բերմամբ փակ մնացին մեր Թանգարանի դռները, իսկ հիմա Իրանի Իսլամական հանրապետութեան ցուցաբերած քաջալերանքով, եւ Աստծու օրհնութեամբ վերստին բացում ենք դրա դռները, որպէսզի մեր նոր սերունդը աւելի պատասխանատու զգայ պահպանելու, եւ յաջորդող սերունդներին կտակելու մեր ազգային անգին հարստութիւնը: Մեր դպրոցում ահա թէ ինչպէս հայեցի կրթութիւնը նոր մղումով, նոր վերելք է ապրելու», եզրափակեց Սրբազանը:

Մինչեւ ժամը 15:30-ը տեւեց քաղցրահամ եւ նպաստընկալ ճաշկերոյթը, ընկերական հաճելի մթնոլորտում, հարազատ տան պայմաններում կացուցւած հրաւէրի մտերմութեամբ: