Շաբաթ` մարտի 28-ի երեկոյեան, Սպահանի հաոյց թեմի առաջնորդական տեղապահ Հոգ. Տ. Արտաւազդ Վրդ. Շարոյեանը ընկերակցութեամբ Իրանի Իսլ. խորհրդարանում Սպահանի եւ հարաւային իրանահայութեան պատգամաւոր դոկտ. Գեղարդ Մանսուրեանի, թեմիս Պատգամաւորական ժողովի ատենապետ եւ փոխ-ատենապետ Նոէլ Մինասեանի ու Աշոտ Դաւթեանի, Թեմական խորհրդի ատենապետ Վաչիկ Հայրապետեանի եւ շրջանի Հայ Դատի յանձնախմբի ներկայացուցիչ Արբի Բաբայեանի այցելեց Իրանի դէմ Իսրայէլի եւ ԱՄՆ-ի յարձակումների հետեւանքով զոհւած համայնքիս անդամ Յովհաննէս (Ամիրխան) Սիմոնեանի բնակարան։ Պրն. Սիմոնեանը զոհւել է մարտի 26-ի առաւօտեան, Սպահանի Բահարեստան քաղաքամասի վրայ տեղի ունեցած ռմբակոծումների արդիւնքում` իր աշխատավայրում։
Պատւիրակութեան անդամներն իրենց վշտակցութիւնը յայտնեցին հանգուցեալի այրուն, զաւակներին ու հարազատներին եւ նրանց մաղթեցին տոկունութիւն եւ համբերութիւն, իսկ Հայր Սուրբն աղօթեց Բարձրեալին ննջեցեալի հոգու խաղաղութեան համար, հանգուցեալի որդին Սասուն Սիմոնեանը եւս կիսւեց իր հօր հետ ունեցած թանկագին յուշերով։
Ընթացքում դոկտ. Գեղարդ Մանսուրեանը ընդգծելով իրանահայութեան սերտ կապը Իրանի ժողովրդի միւս խաւերի հետ եւ յատկապէս երկրի հողային ամբողջականութեան պաշտպանութեան գործում հայ համայնքների դերակատարութիւնը` ցաւով անդրադարձաւ անցնող մէկ ամսւայ ընթացքում խաղաղ բնակչութիւնը թիրախաւորելու թշնամի ուժերի գործողութիւններին եւ խորը ափսոսանք յայտնեց Սիմոնեան ընտանիքի աշխատասէր հօր դաժանաբար զոհւելու համար։
Նշելի է, որ նոյն պահին Սիմոնեան ընտանիքին այցելեց նաեւ Սպահանի Նահատակների եւ անձնուրացների հիմնարկի տնօրէն Մասուդ Նիքբախտը։
Թղթակից (Նոր Ջուղա)
