Անցնող տարիների ընթացքում իրարայաջորդ Թեմական խորհրդի կազմերը հայ նոր սերնդի բարձրագոյն կրթութիւն ստանալու խնդիրը կարեւորելով, փորձել են հնարաւոր բոլոր միջոցներով, ոչ-միայն քաջալերել՝ այլ նաեւ հովանաւորել եւ օժանդակել երիտասարդներին:
Այս ուղղութեամբ գործնական նշանակալից քայլերից է եղել Թեմական խորհրդի կողմից Ուսանողական ֆոնդի ստեղծումը, որը հիմնադրւել է «Շահվերդեան», «Պանիրեան» եւ «Դաւթեան» ֆոնդերի համատեղմամբ, որին ժամանակի Թեմական խորհուրդը եւս ներդրել է մի շօշափելի գումար, որպէսզի հնարաւոր լինի աւելի մեծ թւով ուսանողների օժանդակել:
Նշելի է, որ այս շրջանում եւս Ուսանողական Ֆոնդի անձնակազմը՝ Թեմական խորհրդի հովանաւորութեամբ, ոչ մի ջանք չի խնայում իրեն վստահւած առաքելութիւնը լաւագոյն կերպով իրագործելու ուղղութեամբ:
Շաբաթ՝ փետրւարի 8-ին, Թեմական խորհրդում մարմնի հետ կապ՝ Անի Միրզախանեանի ներկայութեամբ գումարւած Ուսանողական ֆոնդի հերթական նիստի ընթացքում ընդհանուր անդրադարձ է կատարւել Ֆոնդի գործունէութեանը եւ ապագայ ծրագրերին:
Նշելի է, որ ֆոնդի անձնակազմը վերջին ամիսների ընթացքում յաջողել է իր հովանաւորութեան ներքոյ գտնւող ուսանողների թիւը բարձրացնել եւ ներկայիս օժանդակում է շուրջ 40 ուսանող-ուսանողուհիների:
Թեմական խորհուրդը եւս երիտասարդութեան ուսման կարեւորութիւնից ելնելով ուսումնասիրել է ֆոնդին յատկացւած մայր գումարը բարերարների օժանդակութեամբ եւ հնարաւոր տարբերակներով յաւելելու ելքերը եւ 1403-1404 (2024-2025) ուս. տարեշրջանի Ա կիսամեակից սկսեալ տարեկան սակերը բոլոր մակարդակների համար 24.000.000 ռիալից բարձրացրել է 80.000.000. ռիալի, որը վճարւելու է երկու նւագով, իւրաքանչիւր կիսամեակ՝ 40.000.000 ռիալ:
Ուսանողական ֆոնդի անձնակազմը լիայոյս է, որ հնարաւորութիւն կունենայ աւելի մեծ թւով ուսանողների ներգրաւել եւ արդիւնաւէտ դերակատարութիւն ունենալ հայ ուսանող-ուանողուհիների բարձրագոյն կրթութիւն ստանալու ճանապարհում:
Ազգային առաջնորդարանի Հանրային կապ
