Ատրպատականի առաջնորդը միջազգային զրոյցում Հայոց Ցեղասպանութեան անպատիժ մնալու նիւթը արծարծեց
Ատրպատական, ազզային առաջնորդարան, Թաւրիզ – Երեքշաբթի, ապրիլի 21-ին, երեկոյեան ժամը 6:30-ին, Թաւրիզ պետական Մշակոյթի կենտրոնի տնօրէնութեան գրասենեակից, Ատրպատականի հայոց թեմի առաջնորդ՝ Տ. Գրիգոր արք. Չիֆթճեանը մասնակցեց միջազգային հարթակի համացանցային զրոյցի:
Անգլերէն լեզւով տեղի ունեցած միջազգային զրոյցի ընդհանուր խորագիրն էր “Sacred voices against violence: an interfaith dialogue on the attacks on Iran”.
Աշխարհի տարբեր երկրներից՝ հիւսիսային եւ հարաւային Ամերիկաներից, Եւրոպայից եւ Միջին Արեւելքից մասնակցում էին շուրջ 10 անձեր, համալսարանի դասախօսներ, օտար հոգեւորականներ եւ քաղաքական փորձագէտներ:
Բացման եւ բարի գալստեան խօսքից յետոյ ձայն տրւեց Գրիգոր Սրբազանին, որը իր խօսքը բանաձեւել էր «Հաւասարութիւն, Արդարութիւն եւ Խաղաղութիւն» (Ecuality, Justice and Peace) բառերի շուրջը:
Սրբազան Հայրը Ապրիլեան օրերի խորհուրդը ուրւագծելով, ցեղասպանութիւն եզրի բացատրութիւնը տւեց: Նա շեշտեց, որ արդարութեան մոռացումից է առաջանում խաղաղութեան չգոյութիւնը եւ դրա ջնջւելը աշխարհի երեսից:
«111 տարիներ առաջ իմ ժողովուրդը ենթարկւել է օսմանցիների կազմակերպած կոտորածների, որը Ցեղասպանութիւն էր մէկ ու կէս միլիոն հայերի, իրենց ապրած հայրենիքում: Դրա գործադրողների անպատիժ մնալու հետեւանքն էին յաջորդող ցեղասպանութիւնները, մինչեւ Ռուանդա, որտեղ անձամբ մասնակցել եմ զոհերի յիշատակի ձեռնարկներին:
«Իսկ այսօր խօսւում է պաղեստինցի ժողովրդի դէմ իրագործւող Ցեղասպանութեան մասին, երբ աշխարհը լուռ է մնում եղածի դիմաց: Ահա այսպէս են կրկնւում պատմական սխալները, երբ չեն դատապարտւում այդ յանցանքները գործող ջարդարար ոճրագործները»,- շեշտեց Սրբազանը:
Սրբազանը մի քանի առիթներով խօսք առնելով, նաեւ պատասխանեց անձնապէս իրեն ուղղւած հարցերին: Մէկ ժամ տեւած զրոյցի նիւթերը յետագային հաւաքւեցին, հրատարակութեան համար:
