Պայծառակերպութեան տօնը Ատրպատականի հայոց թեմում եւ Վարդավառի ջրցանի աւանդութիւնը
Ատրպատական, Ազգային Առաջնորդարան, Թաւրիզ – Ամենակալ Փրկչի՝ Յիսուս Քրիստոսի Պայծառակերպութեան Տաղաւար տօնը մեծ շուքով նշւեց Ատրպատականի հայոց թեմում կիրակի, յուլիսի 12-ին, Թաւրիզ եւ Ուրմիա քաղաքներում մատուցւած Ս. եւ Անմահ Պատարագով, եւ ապա, իրարու վրայ ջուր ցանելու Վարդավառի ազգային աւանդութեան գործադրմամբ:
Թաւրիզի Լիլաւա հայաշատ թաղամասի Ս. Սարգիս եկեղեցում հանդիսաւոր սուրբ պատարագ մատուցեց եւ քարոզեց Տ. Գրիգոր արք. Չիֆթճեանը: Ս. Պատարագի քառաձայն երգեցողութիւնը կատարւեց «Կոմիտաս» երգչախմբի կողմից, ղեկավարութեամբ երաժիշտ խմբավար՝ Վարդան Վահրամեանի:
«Հայր մեր»-ից առաջ արտասանած իր քարոզում, Սրբազան հայրը յատկապէս անդրադարձ կատարեց Յիսուսի Պայծառակերպութեան տօնի այժմէական իմաստին, որի կարիքը ունի ամբողջ մարդկութիւնը. «Աստծուց մեզ պարգեւած շնորհքներին, բարիքներին, ու բոլոր արժանիքներին ծանօթութիւնը կորցրել ենք, որպէս միայն այս աշխարհի նիւթեղէն գանձերով հետաքրքրւած անձեր: Երկնային շնորհքները, որոնց ականատեսը դարձան Պետրոսը, Յակոբոսը ու Յովհաննէս առաքեալները, Պայծառակերպութեան այս տօնի առիթով մեզ են փոխանցում այդ: Տէ՜ր այստեղ մնանք եւ ցած չիջնենք…,- ասաց Պետրոս առաքեալը, երբ տեսաւ հոգեկան ու մտային այն բաւարարւածութիւնը, որը չկայ մեր սովորական կեանքում: Երանական կեանքի նախօրինակը տեսան երեք առաքեալները, եւ երբ սոյն իրավիճակից դուրս եկան, դարձեալ զգացին մարդկային կեանքի դժբախտութիւնը, առօրեայ տագնապներով ծանրաբեռնւած…»:
Սրբազանը բաղդատական կատարեց կեանքի ներկայ ապահովական խնդիրների, առողջական կացութիւնների, տնտեսական տագնապների, եւ հասարակական կեանքը վրդովող երեւոյթների միջեւ, որոնցից եւ ոչ մէկը չի կարող տիրութիւն ունենալ Աստծու պարգեւած երկնաւոր կեանքում: Վերջապէս, նա յուսադրեց հաւատացեալներին, երբեք չյուսալքւել մարդկային որոշումներով ընթացող կացութիւններից, այլ Աստծուց յուսալ պահպանութիւնը, եւ մարդկանց միջեւ եղած խնդիրների լուծումն ու դէպի բարին ելքը:
Պայծառակերպութեան տօնի առիթով, Ուրմիայի Սուրբ Ստեփանոս եկեղեցում Պատարագեց եւ քարոզեց Տ. Մարտիրոս քհնյ. Ղուկասեանը: Տէր Հայրը իր քարոզում Այլակերպութեան տօնը բացատրեց, աւետարանական դրւագի ներկայացումը կատարելով:
Թաւրիզում, Կանանց Խնամակալ մարմինը քաջալերեց բակը լցրած երեխաներին, որպէսզի ջրցանի աւանդութիւնը կիրառեն: Թեմական խորհրդի միջոցով յատուկ տակառով ջուր էր մատակարարւել եկեղեցու շրջափակը, որտեղ տեղի ունեցաւ իրար վրայ ջրցան կատարելու աւանդութիւնը, որը կտակւել էր Ս. Գրիգոր Լուսաւորչի ժամանակաշրջանից, երբ մեր հեթանոս նախահայրերից ժառանգւած սովորութիւնը, միացրել էր նա քրիստոնէական ազգային աւանդոյթներին, իսկ այս՝ Վարդավառի տօնին:
Ուրմիայում նոյնպէս, եկեղեցու շրջափակում տեղի ունեցաւ ջրցանի աւանդական խաղը, երբ նոյնիսկ մեծահասակներ թրջւեցին, զւարճանալով երեխաների հետ:
Պայծառակերպութեան տօնի խորհրդով լիացած, եւ Վարդավառի աւանդութեամբ խանդավառ, հաւատացեալները վերադարձան իրենց բնակարանները, ջրի լւացմամբ հոգեպէս մաքրւած ու սրբւած:
Երկուշաբթի, Մեռելոց Յիշատակի համար հոգեհանգստեան հանդիսաւոր արարողութիւն կատարւեց Թաւրիզի գերեզմանատան Ս. Շողակաթ եկեղեցում, նախագահութեամբ Թեմակալ առաջնորդի: Ապա, Տ. Մարտիրոս քահանայի միջոցով կատարւեց գերեզմանօրհնէք, հին թէ նոր հանգուցեալների շիրիմների շուրջը հաւաքւած հարազատների փափագով:
