Ուխտի Ս. Պատարագ եւ անւանակոչութեան տօն՝ Գեարդաբադ գիւղի Ս. Գէորգ դարաւոր եկեղեցում
Ատրպատական, ազգային առաջնորդարան, Թաւրիզ – Հինգշաբթի, 24 սեպտեմբեր 2026-ին, օրացուցային նշմամբ Ս. Գէորգ Զօրավարի տօնի եւ Գեարդաբադ գիւղի եկեղեցու անւանակոչութեան առիթով, 26-րդ տարին լինելով, առաւօտեան ժամը 11:00-ին եպիսկոպոսական հանդիսաւոր Ս. Պատարագ մատուցւեց գիւղի Ս. Գէորգ եկեղեցում:
Գիւղում բնակւող բոլոր հաւատացեալները, ինչպէս նաեւ Ուրմիայից եւ Թաւրիզից ժամանած ուխտաւորները միասնաբար ներկայ գտնւեցին եկեղեցում եւ շրջափակում, միասնաբար աղօթելու, եւ իրենց խնդրանքները մատուցելու ամենակալ Աստծուն, Սուրբի բարեխօսութեամբ:
Հանդիսաւոր օրւայ Ս. Պատարագը մատոյց եւ իր պատգամը փոխանցեց, Ատրպատականի հայոց թեմի առաջնորդ՝ Տ. Գրիգոր արք. Չիֆթճեանը: Պատարագի սրբազան երգեցողութիւնը կատարւեց «Նարեկացի» երգչախմբի միջոցով, ղեկավարութեամբ խմբավար՝ Էլիզապէթ Սարհադեանի: Օրւայ Ճաշու ընթերցումը կատարեց Անահիտ Բաբախանեանը, իսկ «Հաւատամք»-ը կատարեց դոկտ. Արա Մելիքեանը:
Գեարդաբադ գիւղի եկեղեցու Հոգաբարձութեան եւ Խնամակալ մարմնի կանանց միջոցով, գլխաւորութեամբ՝ Մարտիկ եւ Լալա Ֆարհադեանների եւ Նորվարդ Անտոնեանի, դիմաւորւեցին բոլոր ուխտաւորները, եւ մասնակից դարձան Ս. Պատարագի արարողութեանը: Ս. Պատարագին ներկայ գտնւեցին Թեմի ազգային բարերար՝ եւ նւիրատու Էդիկ եւ Սանդրա Մեջլումեանները: Օրւայ մատաղի նւիրատուներն էին Սարօ եւ Հերմինէ Անտոնեանները, որոնք հեռաւոր Լոս Անջելէսից հետեւում էին ուխտի օրւայ Ս. Պատարագին:
Առաջնորդ Սրբազանը Ս. Պատարագի կէսին, «Հայր մեր»-ից առաջ իր պատգամը փոխանցելով, անդրադարձաւ սուրրբերի կեանքին, ու յատկապէս Գէորգ Զօրավարի կեանքին, որը բանակի հրամանատար լինելով հանդերձ, իր քրիստոնէական կեանքի վկայութիւնը տւեց, ու նահատակւելով Կոստանդիանոս կայսեր հրամանով, դասւեց քրիստոնէական եկեղեցու չորրորդ դարի սուրբերի շարքում: Սրբազան հայրը լայնօրէն անդրադարձաւ սուրբերի թողած ժառանգին, այն ոյժին, որը զօրացնում է բոլոր հաւատացեալներին, որոնք յատկապէս իրենց կեանքի դժւարին պահերին դիմում են սուրբերի բարեխօսութեանը:
Իր պատգամի աւարտին, առաջնորդ Սրբազանը իր բարձր գնահատանքը յայտնեց եկեղեցու Հոգաբարձութեան եւ Խնամակալ մարմնին, որոնք մեծ զոհողութեամբ ի կատար էին ածել ուխտագնացութեան բոլոր աշխատանքները, յատկապէս մատաղի պատրաստութիւնը: Սրբազանը գնահատեց նաեւ «Նարեկացի» երգչախմբին, որ ամէն Կիրակի պայծառացնում է Ուրմիայի եկեղեցին, իր հոգեզմայլ երգեցողութեամբ:
Սուրբ պատարագից անմիջապէս յետոյ, Սրբազան հօր գլխաւորած թափօրը դուրս եկաւ եկեղեցուց, եւ շրջափակում օրհնւեց մատաղը (Հալիմ), եփւած եկեղեցու Խնամակալ մարմնի կանանց միջոցով:
Խնամակալ մարմինը օրհնեալ մատաղով հիւրասիրեց Սրբազան հօրը եւ նրան ընկերակցող Թեմական խորհրդին, Պատգամաւորական ժողովի եւ երգչախմբի անդամներին, ինչպէս նաեւ ուխտաւոր ամբողջ ժողովրդին, եկեղեցու շրջափակում, սեղանների շուրջ նստած:
Սրբազան հայրը իր խօսքում գնահատեց գիւղի բոլոր բնակիչներին, որոնք իրենց նւիրեալ աշխատանքով ամբողջացրել էին ուխտագնացութեան բոլոր գործերը: Նա այս առիթով յայտարարեց Ատրպատականի հայոց թեմի Թեմական խորհրդի նիւթական աջակցութիւնը, քաջալերելու համար գիւղի տօնախմբութեան կազմակերպումին բերած նրանց ծառայութիւնը: Նշենք, որ Եկեղեցու Խնամակալ մարմնի անդամներից Սիլւա Վարդանեանը, դարաւոր եկեղեցուն նւիրեց Աստւածամօր իւղանկարը, որը օրհւեց Սրբազան հօր միջոցով:
Օրւայ լաւագոյն ժամերը միասնաբար անցկացնելուց յետոյ, բոլոր ուխտաւորները մեկնեցին իրենց տները, հոգեպէս զօրացած ու բաւարարւած զգացումներով:
