«ԱԼԻՔ», Կ. Դ. – Հայ մշակոյթի տօնը իր իւրայատուկ դրսեւորմամբ հոկտեմբերի 9-ի երեկոյեան ներկայացւեց Հայկական Բարեգործական Ընդհանուր միութեան յարկի տակ, «Ձայնից ձայն գրական գեղարւեստական երեկոյ» խորագրով, նախաձեռնութեամբ «Մարի Մանուկեան» դպրոցի ներկայի եւ շրջանաւարտ աշակերտուհիների։ Ազգային ոգով եւ գիտակցութեամբ հարստացած միջոցառման գեղարւեստական յայտագիրը յագեցած էր՝ Հայաստանից ու Արցախից պատկերներ ներկայացնող սհաիկների ցուցադրմամբ ասմունքային կատարումներով, երգերով ու մենապարով։
Ծրագիրը մեկնարկեց Տէրունակն աղօթքով, որից յետոյ ելոյթով հանդէս եկաւ դպրոցի փոխտեսչուհի Արսինէ Մկրտչեանը, նշելով որ այս տարի լրանում է նաեւ Հ.Բ.Ը.Մ.-ի հիմնադրման 120-ամեակը: Հրաւիրւեցին խօսքեր փոխանցելու Իրանի Իսլամական խորհրդարանում Թեհրանի եւ հիւսիսային իրանահայութեան պատգամաւոր դկտր. Արա Շահվերդեանը ով գնահատելով երիտասարդ սերնդի կատարումները կարեւորեց, որ նոր սերունդը մտածի հայերէն, գրի հայերէն եւ պահպանի իր ազգային ինքնութիւնը, ինչպէս ներկայացրեցին գեղարւեստական յայտագիրը իրականացնող երիտասարդները: Տ. Արիստակէս քահանայ Շահմիրեանը նախ փոխանցեց Թեհրանի հայոց թեմի առաջնորդ Տ. Սեպուհ արք. Սարգսեանի ողջոյնները ապա իր խօսքը շարունակելով կարեւորեց նոր սերնդի մօտ նմանօրինակ ազգային մտածողութիւնը, բարձր գնահատելով ուսուցչուհիների աշխատանքները, որի արդիւնքում հայ նոր սերնդի մօտ ազգային դաստիարակութիւն է սերմանւում եւ ոչ ոք չի կարող ազգային ոգով դաստիարակւածի հոգուց ջնջել Արարատ լեռը, Արցախը եւ հաւատքը հանդէպ Հայաստանեայց Առաքելական Սուրբ եկեղեցի: Խօսք փոխանցեց դպրոցի հայոց լեզւի ուսուցչուհի Մելինէ Սադեղին, անդրադառնալով նոր սերնդի մօտ հայեցի դաստիարակութեան սերմանելու կարեւորութեան:
Իր ողջոյնի եւ գնահատանքի խօսքը փոխանցեց միութեան վարչութեան նախագահ Վահէ Միրզաբէգեանը ընդգծելով, որ Հ.Բ.Ը.Մ.-ն այս տարի նշում է իր հիմնադրման 120-ամեակը եւ համապարփակ գծերով անդրադարձաւ Հ.Բ.Ը.Մ.-ի հիմնադրման մարդասիրական եւ հայապահպանման առաքելութեանը:
Ներկայ էին՝ Իրանի Հայ Աւետարանական եկեղեցու Համայնքապետ-հովիւ Վեր. դոկտ. Միշէլ Աղամալեանը, Թ. Հ. Թ. Կրթական խորհրդի ատենապետ Կարինէ Բալըքչեանը եւ հանդիսատեսներ:
