Ատրպատականի հայոց թեմի առաջնորդը շնորհաւորեց հիւանդանոցում պատսպարւած հայ հիւանդների Ամանորը եւ Ս. Ծնունդը
Ատրպատական, ազգային առաջնորդարան, Թաւրիզ – Ամանորի եւ Սուրբ Ծննդեան առիթով միշտ սպասելով իրենց առաջնորդ Սրբազան Հօր այցին, աչքերը դռան յառած սպասում են հիւանդանոցում պատսպարւած հայ հիւանդները:
Նոր տարւայ առիթով նրանց ուրախացնելու նպատակով, 2023 թւականի դեկտեմբերի 30-ին, Ատրպատականի հայոց թեմի առաջնորդ՝ Տ. Գրիգոր արք. Չիֆթճեանը այցելել է «Ռազի» հիւանդանոց, այնտեղ պատսպարւած հայ հիւանդների հետ հանդիպելու: Սրբազան Հօրը ընկերակցում էին հիւանդաց պաշտօնական Խնամակալ Գագիկ Յարութիւնեանը, եւ ազգային առաջնորդարանի պաշտօնեաներ:
Սրբազան Հայրը նախ հանդիպում էր ունեցել հիւանդանոցի ընդհանուր տնօրէն դոկտ. Ասկարզադէի, հիւանդանոցի գլխաւոր բժշկի դոկտ. Միրաբիի եւ հաստատութեան ներքին կառավարիչ Ֆէյզիի հետ, համայնքի անունից շնորհակալութիւն յայտնելու, որ տարիներից ի վեր յատուկ խնամքի կարօտ հայ հիւանդների նկատմամբ մեծ հոգածութիւն են ցոյց տալիս սոյն հաստատութեան յարկի տակ. «Մարդասիրական սոյն գործը առաջին հերթին Աստծու կողմից է գնահատւում, Նրա բոլոր բարիքներին արժանանալով: Մենք էլ մեր հերթին, մեր տկար ուժերով երախտագիտութիւն ենք յայտնում ձեզ, որ մեծապէս օժանդակում էք հայ համայնքին, մեր հիւանդներին ձեր հովանու ներքոյ պահելով ու խնամելով»,- ասաց Սրբազան Հայրը:
Նա երախտագիտութիւն յայտնեց նաեւ Իրանի Իսլամական Հանրապետութեան Առողջապահութեան նախարարութեան եւ փոքրամասնութեան գրասենեակի վարչութեան, որոնց ջանքերի շնորհիւ սոյն հիւանդանոցը երկար տարիներից ի վեր երկու հայ հիւանդներին խնամում է ամբողջութեամբ անվճար, հայ համայնքի նկատմամբ յարգանքի եւ հիւանդների նկատմամբ կարեկցանքի զոյգ մօտեցումներով:
Ընդհանուր տնօրէնը իր հերթին շնորհակալութիւն յայտնեց այցելութեան համար, վերաշեշտելով իր եւ ամբողջ հիմնարկութեան պատրաստակամութիւնը, օգնելու պատսպարեալներին, առանց ազգութեան կամ կրօնի խտրականութեան:
Այս առիթով, Սրբազան Հայրը յատուկ յուշանւէր յանձնեց ընդհանուր տնօրէնին, գլխաւոր բժշկին եւ ներքին կառավարչին:
Հիւանդանոցի դարմանատան մէջ, տնօրէնութեան յատուկ կարգադրութեամբ, Սրբազան Հայրը եւ նրա ընկերակիցները հանդիպեցին հայ հիւանդների՝ Էմիլ եւ Էմմա Այւազեաններին, աղօթելով նրանց հետ եւ Սուրբ Ծննդեան ողջոյնը փոխանակելով: Այս առիթով երգւեցին տօնի յատուկ «Խորհուրդ մեծ» եւ «Այսօր տօն է Սուրբ Ծննդեան» շարականները, ինչպէս նաեւ Ծննդեան յատուկ մեղեդիներ: Տօնական բարձր տրամադրութիւն ստեղծւեց պատսպարեալների համար, յատկապէս, երբ նւէրներ բաշխւեցին նրանց, ազգային իշխանութեան կողմից նախատեսւած:
Ազգային առաջնորդարանի պաշտօնեաները հիւրասիրեցին պատսպարեալներին խմորեղէնով, սուրճով եւ մրգերով, մտերմիկ մթնոլորտում զրուցելով նրանց հետ եւ փոխանցելով համայնքի սէրն ու բարեւները:
Հրաժեշտ առնելուց առաջ, «Կարգ հիւանդաց»-ի աղօթքով Սրբազան Հայրը առողջութիւն մաղթեց հիւանդներին:
Ամանորի եւ Սուրբ Ծննդեան ուրախ օրերի առիթով, պատսպարեալները եւս անմասն չմնացին հոգեւոր ցնծութիւնից, թէկուզ դարմանատան պատերից ներս, սակայն հարազատ անձերով շրջապատւած:
