2024 Նոր տարւայ առաջին պատարագը՝ Ատրպատականի հայոց թեմում

Ատրպատական, ազգային առաջնորդարան, Թաւրիզ – 2024 թւականի յունւարի 1-ին բացւող Նոր տարւայ սեմին, Ատրպատականի հայոց թեմի եկեղեցիներում՝ Թաւրիզում եւ Ուրմիայում մատուցւեց սուրբ եւ անմահ պատարագ:

Թաւրիզի Լիլաւա թաղամասի Ս. Սարգիս եկեղեցում, երեկոյեան ժամը 5-ին, Նոր տարւայ առաջին սուրբ պատարագը մատուցեց եւ իր պատգամը տւեց Ատրպատականի հայոց թեմի առաջնորդ՝ Տ. Գրիգոր արք. Չիֆթճեանը: Եկեղեցական երգեցողութիւնը կատարեց «Կոմիտաս» քառաձայն երգչախումբը, ղեկավարութեամբ դոկտ. Արա Մելիքեանի, եւ երգեհոնի ընկերակցութեամբ՝ Կարէն Սարգսեանի:

Եկեղեցու սարկաւագ բարեշնորհ Սեւան Ենովքեանը 2024 տարւայ առաջին զանգը հնչեցրեց, Ս. Սարգիս եկեղեցի հրաւիրելով հաւատացեալներին:

Իր մատուցած հանդիսաւոր սուրբ պատարագի ընթացքում, «Հայր մեր»-ից առաջ Սրբազան Հայրը քարոզեց, տարեգլուխը բոլոր ազգերի կեանքում կարեւոր անկիւնադարձ լինելու խորհուրդը բացատրելով: Նա յատկապէս անդրադարձաւ ազգային միասնականութեան հրամայականին. «Ուրախութիւնը մեր ազգի արդար իրաւունքն է, դա անառարկելի է: Սակայն անհատական մակարդակով իրար շնորհաւորելուց բացի, տարեգլուխը պիտի գիտակցութեան հրաւիրի մեզ, միասնական լինելու արտաքին ճակատի դիմաց: Այս է երաշխիքը մեր լինելութեան եւ գոյապայքարի: Այլապէս տարիները կը գան ու կանցնեն, մեր գոյութիւնը հարցականի տակ կը գնայ, իսկ մենք դեռ իրար կը շնորհաւորենք, ու բարեմաղթութիւններ կը կատարենք: Իւրաքանչիւր տարեգլուխ մեր միասնականութեան առաւել զօրացման առիթ պիտի հանդիսանայ: Սիրոյ բացակայութեան, միասնականութեան մասին մեր տւած բոլոր քարոզները ի զուր խօսած կը լինենք, իսկ սիրոյ վրայ հիմնւած միասնականութիւնը, կարող է ամէն տեսակի դժւարութեանց, անհասկացողութեանց ու հակառակութեանց դարմանը լինել»,- ասաց Սրբազան Հայրը:

Իր պատգամի աւարտին, Սրբազան Հայրը գօտեպնդեց Ատրպատականում ապրող հայութեան, միշտ կառչած մնալ իրենց ազգային աւանդութիւններին, առաւել եւս ծաղկեցնելով թեմի միութիւնների, կազմակերպութիւնների եւ յանձնախմբերի կեանքը, հզօրացնելու համար հայ Սփիւռքը, ի խնդիր յաւերժական հայրենիքի հզօրացման:

Ուրմիայի Ս. Ստեփանոս ծխական եկեղեցում, նոյն օրը երեկոյեան ժամը 5-ին, պատարագեց Տ. Մարտիրոս քհնյ. Ղուկասեանը: Յընթացս պատարագի, Տէր Հայրը ընթերցեց թեմակալ առաջնորդի Նոր տարւայ պատգամը ի լուր հաւատացեալ ժողովրդի:

Սուրբ պատարագի աւարտին, ներկայ ժողովուրդը շնորհաւորանք փոխանակեց, բարի Ամանոր եւ յուսալից օրեր մաղթելով միմեանց: