«Արարատ»-ի անդամական հաւաքոյթը Թաւրիզում՝ Ամանորի առիթով
Ատրպատական, ազգային առաջնորդարան, Թաւրիզ – Յունւարի 18-ին, Հ.Մ.Ա.Կ.-ի Թաւրիզի մասնաճիւղի վարչութիւնը անդամական հրաւէր էր տւել, կազմակերպութեան յարկի ներքոյ նշելու Ամանորը եւ գնահատելու այն անդամներին, ովքեր տօնական օրերին կազմակերպչական աշխատանք էին իրականացրել:
Սրահը լցւել էր «Արարատ»-ական անդամներով, նախագահութեամբ Ատրպատականի հայոց թեմի առաջնորդ Տ. Գրիգոր արք. Չիֆթճեանի: Սրբազան Հօրը ընկերակցում էին Թաւրիզի հոգեւոր հովիւ Տ. Մարտիրոս քհնյ. Ղուկասեանը եւ Թեմական խորհրդի անդամները, գլխաւորութեամբ ատենապետ Գագիկ Ջորջեանի:
Բացման ու բարի գալստեան խօսք ուղղեց կազմակերպութեան մասնաճիւղի նախագահ Նժդիկ Աբրահամեանը: Նա գնահատանքի խօսք ուղղեց բոլոր այն անդամներին, ովքեր տարբեր բաժանմունքներում իրենց նպաստն են բերում աշխոյժ գոծունէութիւն ծաւալելու եւ միութենական աշխատանքը կենդանի պահելու համար:
Անցնող շրջանի եւ յատկապէս համահայկական ու միջմասնաճիւղային մրցութիւններին մասնակցելու շուրջ զեկուցելով, Նժդիկ Աբրահամեանը երախտագիտական խօսք ուղղեց առաջնորդ Սրբազան Հօրը եւ բարերար Սմբատ Յակոբեանին, որի իշխանական նւիրատւութեան շնորհիւ կարելի էր դարձել մասնակցել Հայաստանում կայացած Համահայկական մարզախաղերին: Իր խօսքերի աւարտին, Նժդիկ Աբրահամեանը՝ Սրբազան Հօր ձեռամբ գնահատական նւէրներ ստանալու՝ հրաւիրեց այն անդամներին, ովքեր անցնող շրջանում օգտակար էին հանդիսացել միութենական աշխատանքներին, ինչպէս նաեւ Ձմեռ պապի դերն էին ստանձնել, Ամանորի աւետիսը տանելու թաւրիզահայերի բնակարանները:
Այնուհետեւ ծրագրի հանդիսավարութիւնը ստանձնեց Կարէն Սարգսեանը, բաժակաճառեր արտասանելով: Գեղարւեստական ծրագրով հանդէս եկան դոկտ. Յովիկ Գալստեանը եւ Վարդան Սարգսեանը, որոնց կատարած մեներգերին եւ զուգերգներին երգեհոնով ընկերակցեց Կարէն Սարգսեանը:
Ամանորի տորթը հատելու հրաւիրեց Սրբազան Հայրը, շրջապատւած դեկտեմբեր եւ յունւար ամիսներին ծնւած թաւրիզահայերով, մասնակցութեամբ Ձմեռ պապին, ով արդէն մուտք էր գործել սրահ եւ պարերով խանդավառել բոլորին:
Սրբազան Հայրը այս առիթով իր գնահատանքը յայտնեց բոլորին, սկսեալ Հ.Մ.Ա.Կ.-ի Թաւրիզի մասնաճիւղի վարչութիւնից, մինչեւ ամենափոքր տարիքով անդամին. «Վստահաբար ինձ հետ համաձայն կը լինէք, եթէ ասեմ, որ «Արարատ»-ը Թաւրիզում մեր խանդ ու եռանդն է: Տեսաք, թէ ինչպէս, մի քանի ժամւայ մէջ մեր առօրեայից կտրւեցինք մի պահ եւ ուրախ ու զւարթ մթնոլորտի թեւերին յանձնւեցինք»,- ասաց Սրբազան Հայրը, մաղթելով, որ 2024 թւականը նոր յաջողութիւնների դուռ կը բացի մեր թեմի բոլոր միութիւնների առջեւ:
Ծրագրի վերջին մասում հետաքրքիր էր Ձմեռ պապիի զրոյցը սրահում գտնւող անդամների հետ, որոնց հետ «նոր ծանօթացման» առիթ ունեցաւ նա: Ձմեռ պապիի դերը ստանձնած Ստիւ Գէորգեանը զւարճախօսութեամբ ու սրամտութեամբ մօտեցաւ իւրաքանչիւր ներկայ անձի, նրա յիշողութիւններն ու ներկայ աշխատանքները վեր հանելով:
Մինչեւ կէս գիշեր տեւած ծրագիրը առիթ հանդիսացաւ անդամներին, մէկ անգամ եւս համախմբւել կազմակերպութեան շուրջ, վերաշխուժացնելով դրա ներքին կեանքը:
