«Թէյի ժամ» նախաձեռնութեամբ ՀՕՄ-ի Թաւրիզի մասնաճիւղի «Տաթեւ» պարային համոյթի

Ատրպատական, ազգային առաջնորդարան, Թաւրիզ – Հովանաւորութեամբ Ատրպատականի հայոց թեմի առաջնորդ՝ Տ. Գրիգոր արք. Չիֆթճեանի եւ Թեմական խորհրդի ու նախաձեռնութեամբ ՀՕՄ-ի Թաւրիզի մասնաճիւղի «Տաթեւ» պարային համոյթի, Իրանի Իսլամական յեղափոխութեան յաղթանակին նւիրւած ձեռնարկների շրջանակում, հինգշաբթի, փետրւարի 1-ի երեկոյեան Թաւրիզի «Հ. Ոսկանեան» սրահում տեղի ունեցաւ ճոխ սեղանով «Թէյի ժամ»: Սրբազան Հայրը բացակայում էր ծրագրից, ուրմիահայ համայնքում պաշտօնական հանդիսութեան ներկայ գտնւելու պատճառով:

Ծրագրին ներկայ էին թեմի Պատգմաւորական ժողովի ատենապետուհի՝ Արմինէ Վահրամեանը, ժողովի անդամ՝ Արմոնդ Բադալեանը, Թեմական խորհրդի ատենապետ՝ Գագիկ Ջորջեանն ու խորհրդի անդամ Քաթրին Դիլանեանը, ՀՕՄ-ի Թաւրիզի մասնաճիւղի վարչութեան անդամները, միութեան երէց անդամուհիներ եւ աւելի քան 130 թաւրիզահայեր:

Միջոցառման ողջոյնի խօսքով արտայայտւեց ՀՕՄ-ի Թաւրիզի մասնաճիւղի «Տաթեւ» պարային համոյթի կազմակերպական աշխատանքների պատասխանատու՝ Նայիրի Դիլանեանը: Նա ներկաներին շնորհաւորեց Իրանի Իսլամական յեղափոխութեան յաղթանակի տարեդարձը եւ անդրադարձաւ Իրանի Իսլամական Հանրապետութեան հովանու ներքոյ հայ համայնքի կրօնական, մշակութային եւ ազգային-հասարակական կեանքի լայն հնարաւորութիւններին, որոնց շնորհիւ իրանահայ համայնքը համարւում է Սփիւռքի ամենակազմակերպւած համայնքներից մէկը: Նա մասնաւորապէս անդրադարձաւ Իրան հայրենիքի հզօրութեանը եւ դրա մեծ դերակատարութեանը տարածաշրջանային անվտանգութեան ապահովման հարցում:

Օրւայ առիթով խօսքն յանձնւեց Պատգամաւորական ժողովի ատենապետուհի՝ Արմինէ Վահրամեանին, որ իր հերթին բարձր գնահատեց կազմակերպւած ծրագիրն, որն ի մի էր բերել թաւրիզահայ համայնքի մեծ թւով անդամներին: Արմինէ Վահրամեանը շնորհաւորեց բոլորին Իրանի Իսլամական Յեղափոխութեան յաղթանակի տասնօրեակիի առիթով եւ անդրադարձաւ սփիւռքեան պայմաններում ապրող հայկական համայնքների հայի նկարագրի պահպանման կարեւորութեանը: Նա մատնանշելով ամբողջ աշխարհում տիրող ծանր պայմաններին՝ կապւած տնտեսական ոլորտին եւ դրանցից բխող թանկացումներին, բարձր գնահատեց մեր համայնքի անդամների մասնակցութիւնն ու ներդրումը համայնքից ներս աշխատող բոլոր միութիւնների, կրթական կառոյցների եւ կազմակերպութիւնների միջոցառումներին, շեշտելով, որ այդ կառոյցների պահպանումը համայնաքային պարտականութիւն է, քանի որ այդ կառոյցները համայնքի աշխոյժ կեանքն են ապահովում, իսկ աշխատանքները կեանքի կոչելու համար մեծ զոհողութիւններ են պահանջւում դրանք ղեկավարող անձանց կողմից, իսկ այդ բոլորը հնարաւոր է միայն հային յատուկ ուժեղ եւ անկոտրում կամքի դրսեւորմամբ:

Արմինէ Վահրամեանը բարձր գնահատեց «Տաթեւ» պարային համոյթի գեղարւեստական ղեկավար՝ Կարինէ Մանուչերեանի հետեւողականութիւնն ու նւիրւածութիւնը, համոյթը 10 տարիներ ղեկավարելու եւ այն գործունեայ պահելու առիթով, դրա կողքին գնահատելով նաեւ Նայիրի Դիլանեանին նոյն պարային համոյթի աշխատանքները կազմակերպելու համար:

Այդ միջոցառման ընթացքում պարգեւատրւեցին ՀՕՄ-ի Թաւրիզի մասնաճիւղի «Տաթեւ» պարային համոյթի անդամներ՝ Շաղիկ Գէորգեանը, Ալինա Նաւասարդեանը, Վրէժ Գրիգորեանն ու Սեւան Թարվերդեանը, որոնք ընդունւել էին գերլիսանսի մակարդակում իրենց համալսարանական կրթութիւնը շարունակելու համար: Նշեալներին յիշատակի նւէրները յանձնւեցին Պատգամաւորական ժողովի ատենապետուհի՝ Արմինէ Վահրամեանի, Թեմական խորհրդի ատենապետ՝ Գագիկ Ջորջեանի եւ ՀՕՄ-ի Թաւրիզի մասնաճիւղի նախագահուհի՝ Անահիտ Մարգարեանի միջոցով, իսկ օրւայ առիթով նկատի առնւած վիճակախաղը շահեց Արմինէ Վահրամեանը:

Աւելի քան երեք ժամ տեւած սոյն միջոցառման ընթացքում ճոխ սեղանների շուրջ համախմբւած ներկաները հիւրասիրւեցին ՀՕՄ-ի Թաւրիզի մասնաճիւղի «Տաթեւ» պարային համոյթի անդամ-անդամուհիների կողմից, որոնք ներկաներին հրամցրեցին հայկական սեղաններին յատուկ անուշահամ խմորեղէններ եւ ուտեստներ, որոնք պատրաստւել էին համոյթի անդամուհիների եւ ծնողական յանձնախմբի միջոցով:

Հայկական երաժշտութիւնը ուրախ մթնոլորտ էր ստեղծել սրահում, իսկ հայկական շուրջպարը աւելիով զարկ տւեց այդ ուրախ մթնոլորտին:

Ներկաները սրահը թողեցին ՀՕՄ-ի Թաւրիզի մասնաճիւղի «Տաթեւ» պարային համոյթի մի նոր միջոցառմանն մասնակից լինելու բուռն ցանկութեամբ: