Յեղափոխութեան տօնի դասախօսութիւն՝ «Ալիք» հաստատութեան Թաւրիզի մասնաճիւղում

Ատրպատական, ազգային առաջնորդարան, Թաւրիզ – Երկուշաբթի, փետրւարի 5-ին, ժամը 18:00-ին, հովանաւորութեամբ Ատրպատականի հայոց թեմի առաջնորդ Տ. Գրիգոր արք. Չիֆթճեանի եւ Թեմական խորհրդի, «Ալիք» հաստատութեան Թաւրիզի մասնաճիւղի կենտրոնատեղիում Նայիրի Դիլանեանը դասախօսեց «Իրանի Իսլամական Յեղափոխութեան պատմական հիմքերը» նիւթով:

Սրբազան Հօր նախագահութեամբ տեղի ունեցած սոյն դասախօսութեան ներկայ էին հաստատութեան պատասխանատու մարմինը, Թեմական խորհրդի անդամներ, գլխաւորութեամբ ատենապետ Գագիկ Ջորջեանի, 11-15 տարեկան պատանիներ ու պարմանուհիներ, նրանց ծնողները եւ հաստատութեան անդամներ:

Պատմական ամբողջ հիմքը ներկայացնելով յեղափոխութեան, Նայիրի Դիլանեանը համապարփակ բացատրական տւեց արքայական տոհմերի գործելաոճին, իսկ յեղափոխութեան առաջին խմորումները համալսարանական յարկերում եւ ընդհանրապէս կրթական ոլորտում նկարագրելով, նոր սերնդի կազմաւորման քայլերը ներկայացրեց, որոնք այաթ. Խոմէյնիի կազմակերպ աշխատանքով յանգեցին արդար յեղափոխութեան: Նա շեշտեց, որ տարածաշրջանում Իրանը միակ հզօր պետութիւնն է, որի սահմաններում թիզաչափ փոփոխութիւն չի եղել դարերով, որը բացառիկ երեւոյթ է երկրների պատմութեան մէջ: Այս ծիրից ներս Նայիրի Դիլանեանը շեշտեց, որ նման հզօր պետութեան դարաւոր հարեւանութիւնը մեր հայրենիքի՝ Հայաստանի հետ, ինքնին ապահովութիւն է. «Նման երկիր դարերով անխախտ պահպանելը միայն մէկ երաշխիք ունի. իր սեփական ուժերին հաւատալ եւ ամուր մնալ: Այն ժողովուրդները որոնք իրենց մշակոյթից, իրենց կրօնից, իրենց պատմութիւնից կը հրաժարւեն, վստահ եղէք, որ կործանման ճանապարհը կը բռնեն»,- ասաց նա, յաւելելով, որ «Իրանը տարածաշրջանում անվտանգութիւն ապահովող մի հզօր երկիր է, որը իր դիւանագիտական խօսքը ունի ասելիք, ինչպէս նաեւ իր ասելիքն ունի ռազմական ուժով»,- եզրակացրեց նա, յուսադրելով, որ Իրանն է այսօր մեր հայրենիքի անվտանգութեան գլխաւոր երաշխիքը:

Սրբազան Հայրը փակման խօսքի հրաւիրւելով, նախ իր բարձր գնահատանքը յայտնեց «Ալիք» հաստատութեան Թաւրիզի մասնաճիւղի վարչութեան եւ պատասխանատուներին, որոնք սոյն առիթը ընձեռել էին համայնքին, յատկապէս նոր սերնդի առողջ կազմաւորման նպաստելու: Սրբազան Հայրը գնահատեց նաեւ Նայիրի Դիլանեանին, որը Իրանի հազարամեակների պատմութեան խորքից անցնելով, համապարփակ ներկայացրեց դրա անցեալը, Յեղափոխութեան հիմունքը, ինչպէս նաեւ հասարակական արդարութեան հոլովոյթը այս երկրում:

Սրբազան Հայրն իր խօսքի առանցքը դարձրեց «կամք» բառը, որը 45 տարիներ առաջ դրսեւորւեց իրանցի ժողովրդի մեծամասնութեան կողմից, եւ մինչեւ այսօր, հակառակ այս երկիրը շրջապատող բազմապիսի դժւարութիւնների, շրջափակման եւ տնտեսական ճգնաժանի, շարունակում է առանցքը հանդիսանալ ժողովրդի կեանքին ու հաւաքական առաքելութեան:

Դասախօսական ծրագրի աւարտին տեղի ունեցաւ հիւրասիրութիւն, որի ընթացքում շարունակւեց մտերմիկ զրոյցը՝ Սրբազան Հօր եւ օրւայ դասախօսի հետ: