Ատրպատականի հայոց թեմի առաջնորդը հանդիսապետեց Ուրմիահայոց Սուրբ Պատարագին

Ատրպատական, ազգային առաջնորդարան, Թաւրիզ – Կիրակի,  յունիսի 7-ին, Ատրպատականի հայոց թեմի առաջնորդ՝ Տ. Գրիգոր արք. Չիֆթճեանը ներկայ գտնւեց Ուրմիայի Ս. Ստեփանոս եկեղեցում մատուցւած Ս. եւ անմահ Պատարագին, եւ քարոզեց հաւատացեալ ժողովրդին:

Առաւօտեան ժամը 11-ին Ս. Պատարագը մատոյց հոգեւոր հովիւ՝ Տ. Մարտիրոս քհնյ. Ղուկասեանը, իսկ «Նարեկացի» երգչախումբը ղեկավարեց՝ երգեհոնահար Էլիզաբէթ Սարհադեանը: Օրւայ Ճաշու ընթերցւածը եւ «Մեղայ»-ն կարդաց Անահիտ Բաբախանին:

«Հայր մեր»-ից անմիջապէս առաջ, առաջնորդ Սրբազանը իր քարոզի բնաբանը վերցնելով օրւայ աւետարանական հատւածից, պատգամեց հաւատացեալներին այն, ինչ վերաբերում էր այդ օրւայ կեանքին: Փարիսեցիների ուղղած հարցումային քննադատութիւնը՝ «ասա մեզ ո՞վ ես դու», «մինչեւ ե՞րբ ես մեր հոգին հանելու» ժողովրդական արտայայտութիւնները ներկայացնելով, Սրբազան հայրը մեկնաբանեց այդ յարձակողական խօսքերը, նորօրեայ իմաստներով. «Նոյն արտայայտութիւնները մենք ենք կատարում, երբ մեր մարդկային տրամաբանութիւնը չի կարողանում յաղթանակել, եւ լուծել կեանքի դժւարութիւնները: Մեր մարդկային տկար բանականութիւնը չի կարող միջամտել աստւածային լուծումներին: Ուստի, մեր թուլութիւնը Աստծուն ներկայացնելով, Նրանից օգնութիւն ենք խնդրելու, որպէսզի կարողանանք դուրս գալ մեր դժւարութիւններից, յանձնւելով Աստծուն…»,- ասաց Սրբազանը:

Իր քարոզի երկրորդ բաժնում, առաջնորդ Սրբազանը անդրադարձաւ աշխարհում տիրող ներկայ քաղաքական վերիվայրումներին, պատերազմական մթնոլորտի ստեղծած անապահովութեան, եւ փառք տւեց Աստծուն, որ մինչեւ այսօր Թեմի զաւակներին պահպանել է անվտանգ, եւ աղօթք մատուցեց, որ Աստւած Իր աջի հովանին անպակաս անի բոլորի վրայից: Վերջապէս, նա արտայայտւեց ազգային, հայրենական իրավիճակին, յոյս յայտնելով, որ մեր ժողովուրդը եկեղեցու հանդէպ իր կապւածութեամբ, զօրանայ իր հաւատքի մէջ, եւ հեռու պահի մեր եկեղեցին, ազգն ու հայրենիքը ինքնակործան վտանգներից:

Սուրբ Պատարագից անմիջապէս յետոյ, Սրբազան հայրը մամլոյ ասուլիս տւեց Արեւմտեան Ատրպատականի հեռուստատեսութեան պետական կայանի թղթակիցներին, ներկայ քաղաքական իրավիճակի, եւ Իրանի Իսլամական Հանրապետութեան դէմ շղթայազերծւած յարձակումների մասին, մաղթելով, որ շուտով լուծումներ ի գործ կը դրւեն, համաձայնութիւն կայացնելու, եւ մարդկային կեանքեր խնայելու համար:

Եկեղեցու սրահում Խնամակալ մարմնի կանանց հրաւէրով հիւրասիրութիւն տեղի ունեցաւ: Ազգային բարերար Էդիկ Մեջլումեանի տիկինը՝ Սանդրան, ինչպէս նաեւ Գործակալական խորհրդի ատենապետ Վանիկ Յակոբեանը հովանաւորել էին ծրագիրը: Այս առիթով Սրբազան հայրը գնահատանքի խօսք ուղղեց Սանդրա Մեջլումեանին որ իր յաճախակի նւիրատւութիւններով պայծառ ու փայլուն էր պահում Աստծու տունը՝ Ս. Ստեփանոս եկեղեցին: Նա նշեց, որ տիկին Սանդրայի միջոցով եկեղեցուն նւիրաբերւած նոր երգեհոնը մեծ փոփոխութեան էր ենթարկել կրօնական մթնոլորտը իր տաճարային հիասքանչ ձայնով: Նոյն օրը, տիկին Սանդրան նաեւ ջուր մատակարարող յատուկ սառնարան էր նւիրել, ամռան եղանակին շրջափակում գտնւողներին զովացւած ջուր ապահովելու համար: Սրբազանը գնահատեց նաեւ Գործակալական խորհրդի ատենապետ Վանիկ Յակոբեանին եւ նրա տիկնոջ՝ Անիին, որ եկեղեցու սրահի խոհանոցին նւիրաբերել էին օդափոխիչ նորագոյն սարք:

Սրբազան հայրը բարձր գնահատեց նաեւ երաժիշտ խմբավար Էլիզաբէթ Սարհատեանի անձնւէր ծառայութիւնը եկեղեցուն, ինչպէս նաեւ Տէր հօր ամէն կիրակի Թաւրիզից Ուրմիա գալով Ս. Պատարագ մատուցելու հոգեւոր նւիրաբերումը:

Ներկայ ժողովրդի անունից խօսք առաւ երգեհոնահար եւ խմբավար Էլիզաբէթը, շնորհակալութիւն յայտնելով առաջնորդ Սրբազան հօրը իր բարձր գնահատանքի եւ մնայուն քաջալերանքի համար. իսկ սքանչելի երգեհոնի նւիրաբերումը մեծ փոփոխութիւն համարեց «Նարեկացի» երգչախմբի համար, որը շատ քաջալերական էր եղել երգողներին, համակարգելով բոլորի ձայնը:

Շուրջ մէկ ժամ տեւած սոյն հաւաքը ուրախալի էր ե՛ւ եկեղեցու սպասաւորների, ե՛ւ ամէն կիրակի եկեղեցի այցելող հաւատացեալների համար: