Յեղափոխութեան 45-ամեակը նշւեց Թաւրիզի հայոց դպրոցում
Ատրպատական, ազգային առաջնորդարան, Թաւրիզ – Չորեքշաբթի, փետրւարի 7-ին, ժամը 11:00-ին, Թաւրիզի հայոց ազգային «Հայկազեան-Թամարեան-Սահակեան» դպրոցում տեղի ունեցաւ գեղարւեստական ծրագիր, նախագահութեամբ Ատրպատականի հայոց թեմի առաջնորդ Տ. Գրիգոր արք. Չիֆթճեանի, ներկայութեամբ ազգային իշխանութեան անդամների, ինչպէս նաեւ հայ եւ օտար ուսուցիչների, եւ նահատակների ընտանիքների:
Դպրոցի երգչախմբի միջոցով Իրանի քայլերգի երգեցողութիւն կատարւեց ղեկավարութեամբ ընդհ. հսկիչ՝ Վահիկ Բարոյեանի: Բացման խօսքը աշակերտութեան անունից կատարեց Արգամ Ոսկանեանը, ով հրաւիրեց Մարիամ Վարդանեանին, Դարել Նազարբէգեանին, արտայայտւել Յեղափոխութեան տօնի պատմութեան եւ խորհրդի մասին:
Դպրոցի տեսչուհի Սիլւա Աշըղեանը արտայայտւեց, բոլորի ուշադրութիւնը հրաւիրելով «Արեւածագ»-ի տասնօրեակի մեծ Յեղափոխութեան բերած բարիքների վրայ, որոնց յարատեւ վայելողն է եղել նաեւ իրանահայ համայնքը, աւելի քան չորս տասնամեակներ: Նա դպրոցի տեսչութեան եւ հոգաբարձութեան անունից շնորհակալութիւն յայտնեց բոլոր ներկաներին, հայոց դպրոցին զօրավիգ կանգնելու համար:
Աշակերտական երգչախումբը խանդավառ երգերով պանծացրեց մեծ յեղափոխութիւնը, խրախուսելով բոլոր ներկաներին: Իր պատգամը տալու հրաւիրւելով, Սրբազան Հայրը արտայայտւեց այն կրօնական ազատութեան եւ փոխադարձ հանդուրժողութեան մթնոլորտի մասին, որը յեղափոխութեան առաջին օրւանից տիրում է Իրանում. «Կրօնական ազատութիւնը եւ փոխադարձ հանդուրժողութիւնը ոչ միայն օրէնքի է վերածւել, այլ կեանքի ձեւ իբրեւ ընդունւել է Իրանում: Այն խօսքից գործի է վերածւել, մեր վանքերի ու եկեղեցիների վերաշինութեան եւ բարեզարդման աշխատանքով, որը աւելի քան խոր յարգանք է, այլ կրօնի նկատմամբ»,- ասաց Սրբազան Հայրը: Նա յատկապէս գնահատեց դպրոցի հսկիչ՝ Վահիկ Բարոյեանին, որ բազմազան գործերով իր ներկայութիւնը արժեւորում է կրթական այս յարկի տակ, մինչեւ իսկ երգչախմբի ղեկավարութիւնը ստանձնելով:
Աւարտին աշակերտութեան բաշխւեցին կիսամեայ վկայագրերը, եւ պարգեւներ տրւեցին առաջադէմ աշակերտներին, ինչպէս նաեւ գնահատականներ բոլոր ուսուցիչներին եւ պաշտօնէութեան:
