Բարեկենդանի շքեղ ճաշկերոյթ՝ «Արարատ»-ի Թաւրիզի մասնաճիւղի կազմակերպութեամբ

Ատրպատական, ազգային առաջնորդարան, Թաւրիզ – Բուն Բարեկենդանի կենսուրախ տօնի առիթով, hինգշաբթի, փետրւարի 15-ի երեկոյեան ժամը 20:30-ից մինչեւ առաւօտեան ժամը 2:30, Հ.Մ.Ա.Կ.-ի Թաւրիզի մասնաճիւղը ազգային առաջնորդարանի «Համազասպ Ոսկանեան» սրահում կազմակերպեց Բարեկենդանը նշող յատուկ Ճաշկերոյթ-խրախճանք, մարդ էակի դրախտի կեանքը պատկերող ուրախ տրամադրութեամբ:

Ձեռնարկը հովանաւորում էր Ատրպատականի հայոց թեմի առաջնորդ՝ Տ. Գրիգոր արք. Չիֆթճեանը եւ Թեմական խորհուրդը: Ներկայ էին հրաւիրեալներ, մեծ թւով «Արարատ»-ականներ, եւ մշակութասէր թաւրիզահայեր: Մասնակիցների շարքին էին նաեւ ուրմիահայեր եւ թեհրանահայեր, մինչեւ իսկ Երեւանում հաստատւած նախկին թաւրիզահայեր:

«Արարատ»-ի Թաւրիզի վարչութեան հրաւէրով սահմանամերձ Սիւնիքի մարզից Թաւրիզ էր հրաւիրւել Մեղրի քաղաքի նւագախումբը, երգիչ Ստեփան Գրիգորեանի գլխաւորութեամբ, որը իր բարիտօնախառն թենոր ձայնով, մինչեւ լոյս հմայեց խրախճանքի մասնակից բոլոր հայորդիներին: Նրան ընկերակցում էին Գրիշա Յովհաննիսեանը (երգեհոն) եւ փողային գործիքների վարպետ Արման Մկրտչեանը: Սիրայինն ու ազգայինը, գաւառականն ու ռաբիզը անընդմէջ իրար էին յաջորդում, ո՛չ միայն ֆիզիկապէս ջերմացնելով մարմինները պարային կշռոյթով, այլեւ հոգիները՝ հայի հպարտ ապրումներով եւ զգացումներով:

Օրւայ հանդիսավար Կարէն Սարգսեանը բացման խօսքը կատարեց, յիշեցնելով, որ ամբողջ գիշերւայ համար բազմաթիւ անակնկալներ են վերապահւած բոլոր մասնակիցների համար: Ներկաներին ողջունեց Հ.Մ.Ա.Կ.-ի վարչութեան ատենապետ Նժդիկ Աբրահամեանը: Իր երախտագիտութիւնը յայտնելով՝ Սրբազան Հօրը եւ ազգային իշխանութեան սոյն ծրագիրը հովանաւորելու համար, նա շեշտեց «Արարատ»-ի ընդգծւած կարեւորութիւնը համայնքի երիտասարդութեան կեանքում: Նժդիկ Աբրահամեանը երախտագիտութեան ջերմ զգացումներով մի անգամ եւս շնորհակալութիւն յայտնեց ազգասէր մեծ բարերար Սմբատ Յակոբեանին, զօրավիգ էր կանգնել մասնաճիւղին, որպէսզի թաւրիզահայ մարզիկները կարողանային մասնակցել Երեւանում կայացած Համահայկական խաղերին: Այս առիթով պատրաստւած արծաթեայ նրա դիմաքանդակը ներկայացրեց նա, որը անձնապէս նրան էր տրւելու նոյն գիշեր, սակայն գործի բերմամբ նա չէր կարողացել ժամանել Թաւրիզ: Արծաթեայ դիմաքանդակը գործն էր թաւրիզահայ յայտնի արծաթագործ վարպետ փորագրիչ Զարեհ Բուդաղեանի:

Վարչութեան ատենապետը յատուկ շնորհակալութիւն յայտնեց Փոքրամասնութիւնների պետական գրասենեակի տնօրէնութեանը, որը բարեհաճել էր սոյն ձեռնարկի արտօնութեան եւ երաժիշտների ժամանման դիւրութիւնները ընծայել:

Ներկաներին բարի երեկոյ մաղթելով, հաղորդավար Կարէն Սարգսեանը անսասանութիւն մաղթեց թեմի եւ դրա հովանու ներքոյ գործող ազգային կառոյցներին: Նա ներկայացրեց նւագախումբն ու երգիչը, մնացեալ ժամանակը ամբողջութեամբ տրամադրելով աննահանջ երգին ու երաժշտութեան:

Երգի ու պարի մթնոլորտը առաջին իսկ րոպէից հայրենասիրական բարձր տրամադրութիւն ստեղծեց սրահում, երբ հայրենի երգիչն ու նւագախմբի անդամները կատարեցին «Կիլիկիա»-ն, բացւած յայտարարելով երգերի շարանը, որոնք գիշերը լուսացրին: Գիշերւայ կէսից յետոյ երբ սրահ մուտք գործեց ծաղրածուն, բոլորի ուշադրութիւնը կենտրոնացաւ նրա վրայ, տեսնելու թէ ո՞ւմ պիտի ձերբակալի եւ կապի չւանով:

Վերջապէս, իր մնջախաղերը աւարտելուց յետոյ, նա չւանով կապեց իր զոհին, սրահի կենտրոնում դրւած աթոռի վրայ նստեցնելով նրան, մինչեւ որ ներկայ բազմութեան մէջ գտնւող նւիրատուներ գումարներ խոստացան, իբրեւ նւիրատւութիւն «Արարատ» կազմակերպութեան Թաւրիզի մասնաճիւղին: Հանգանակութեան դժւարին բաժինը ղեկավարեց, դարձեալ տարիների փորձ ունեցող վարպետ հանդիսավար Կարէն Սարգսեանը:

Նւիրատուների անունից խօսք առնելով, Պատգամաւորական ժողովի անդամ դոկտ. Արա Մելիքեանը Սրբազան Հօրն ասաց. «Ձեր ոտքերի կապանքը բացելու համար ոչ միայն մեր քսակներից աւելի, մեր սրտերը բաց են Ձեզ համար», քաջալերելով ներկաներին, իրենց առատ նւիրատւութիւններով օժանդակել Հ.Մ.Ա.Կ.-ի Թաւրիզի մասնաճիւղին:

Սրբազան Հայրը խօսք առնելով, մասնաւոր գնահատանք յայտնեց՝ «Արարատ»-ի Թաւրիզի մասնաճիւղի վարչութեանը եւ բոլոր յանձնախմբերին, գլխաւորութեամբ ատենապետ Նժդիկ Աբրահամեանի, «Վստահ եմ ձեր մտքում էլ այս պահին նոյն մտածումը կայ, ինչ իմ մտքում, որ նման ծրագրեր կազմակերպելու եւ այն յաջողեցնելու մասնագիտութիւն ունի Հ.Մ.Ա.Կ.-ի Թաւրիզի մասնաճիւղը: Սրբազան Հայրը իր բարձր գնահատանքը յայտնեց բոլոր այն անձերին, որոնք նեցուկ են կանգնած «Արարատ»-ին, յատկապէս բարերար Սմբատ Յակոբեանը:

Կազմակերպւած ծրագրին ակնարկելով, Սրբազան Հայրը ասաց, որ ԻԻՀ եւ ՀՀ կապերի վերջին զարգացումներից՝ երկու սահմանամերձ քաղաքներում Կապանում եւ Թաւրիզում հիւպատոսութիւնների հաստատումից շատ առաջ, «Արարատ»-ը այս «կամուրջ»-ը հաստատել էր արդէն, ամէն տարի Բարեկենդանին Մեղրիից երգիչ ու նւագախումբ բերելով Թաւրիզ, եւ փոխադարձաբար տօնական օրերի առիթով Թաւրիզից այցելութիւն տալով Մեղրի…: Նա գնահատեց երգչին եւ նւագախմբին, «որոնք Սիւնիքից ժամանելով, մեր հայրենիքի սիրոյ կայծը բերեցին մեզ»,- եզրակացրեց նա:

Կէս գիշերից յետոյ դարձեալ շարունակւեց խրախճանական մթնոլորտը, իսկ վիճակախաղի թիւը սակառից դուրս բերելով, տիրամայր Շուշան Չիֆթճեանը, բախտաւոր յայտարարւեց Յասմիկ Գասպարեանը, որը ստացաւ իր նւէրը:

Բարեկենդանի սոյն յիշարժան ծրագիրը քաղցր յիշատակներ թողեց ներկաների սրտում, բոլորի մտքի մէջ դրոշմելով մինչեւ առաւօտեան ժամեր տեւած ազգային դաստիարակութիւնը, միասնականութեան ոգով զսպանակւած: