Գնահատանքի երեկոյ՝ Ս. Թադէի ուխտագնացութեան նպաստած բոլոր անհատներին եւ կառոյցներին

Ատրպատական, ազգային առաջնորդարան, Թաւրիզ – Հոկտեմբերի 28-ի երեկոյեան ժամը 20:00-ին, ազգային առաջնորդարանի «Համազասպ Ոսկանեան» սրահում, նախագահութեամբ Ատրպատականի հայոց թեմի առաջնորդ՝ Տ. Գրիգոր արք. Չիֆթճեանի, նախաձեռնութեամբ՝ Թեմական խորհրդի եւ կազմակերպութեամբ Վանքերի ուխտագնացութեան Գործադիր յանձնախմբի, տեղի ունեցաւ գնահատման թէյասեղան ի պատիւ Ս. Թադէի վանքի տարեկան եռօրեայ ուխտագնացութեան իրենց նպաստը բերած անհատների եւ կառոյցների:

Մտերմիկ հաւաքին ներկայ էին բոլոր միութիւններն ու կազմակերպութիւնները, գլխաւորութեամբ Վանքերի ուխտագնացութեան Գործադիր յանձնախմբի, ինչպէս նաեւ այն անհատներ, ովքեր միշտ նեցուկ են կանգնել տարեկան ուխտագնացութեան կատարեալ անցկացմանը: Սրբազան Հօր կողքին ներկայ էին՝ Թաւրիզի հոգեւոր հովիւ Տ. Մարտիրոս քհնյ. Ղուկասեանը, Թեմական խորհրդի անդամները, Իրանի եկեղեցիների պահպանման կենտրոնի տնօրէն դոկտ. Շերլի Աւետեանը, «Կոմիտաս» երգչախմբի խմբավար՝ երաժիշտ Վարդան Վահրամեանը, եւ մի շարք անհատներ:

Բացման եւ բարի գալստեան խօսքը Թեմական խորհրդի անունից փոխանցեց ատենապետ Գագիկ Ջորջեանը, յիշելով բոլոր այն կառոյցներին ու անհատներին, որոնք նպաստել էին ուխտագնացութեան յաջող կայացմանը: Կազմակերպական ընթացքից մանրամասն բացատրութիւններ տւեց Գագիկ Ջորջեանը, ով նախապատրաստական աշխատանքներին ներկայ էր եղել Վանքում, մօտկից հետեւելով Վանքերի յանձնախմբի նւիրեալ երիտասարդների գործունէութեանը: Նա շեշտեց այն հաւաքական ջանքը, որը գործադրւել էր բոլոր միութիւնների եւ կազմակերպութիւնների կողմից, լաւագոյնը մատուցելու ուխտաւորներին: Գագիկ Ջորջեանը անդրադարձաւ նաեւ պետական յարաբերութիւններին, որոնք Թեմական խորհուրդը իրականացրել էր յատկապէս Փոքրամասնութիւնների գրասենեակի եւ Չալդրանի կուսակալութեան:

Արտայայտւեց նաեւ Իրանի եկեղեցիների պահպանման կենտրոնի տնօրէն դոկտ. Շերլի Աւետեանը, շնորհակալութիւն յայտնելով այն քաջալերանքին եւ զօրակցութեանը, որը Ատրպատականի հայոց թեմը ցուցաբերում է իր եւ իր ներկայացրած կենտրոնի աշխատանքների դիւրացման համար: Միշտ լաւատեսութեամբ նայելով ապագային, դոկտ. Աւետեանը յոյս յայտնեց, որ ուխտագնացութեան առաջիկայ 70-ամեակը, շատ աւելի շքեղ տեղի կունենայ:

Գնահատական խօսքերով հանդէս եկան նաեւ Վանքերի ուխտագնացութեան Գործադիր մարմնի անդամ Գագիկ Յարութիւնեանը, Հ.Մ.Ա.Կ.-ի Թաւրիզի մասնաճիւղի նախագահ Նժդիկ Աբրահամեանը, «Տաթեւ» պարային համոյթի պատասխանատու Նայիրի Դիլանեանը, «Կոմիտաս» երգչախմբի երաժիշտ ղեկավար Վարդան Վահրամեանը, նոյն խմբի անդամ Կարէն Սարգսեանը, որոնք բոլորն էլ բարձր գնահատեցին միութիւնների կատարած աշխատանքը, ի փառս Ս. Թադէի վանքի տօնին:

Սրբազան Հայրը գնահատանքի խօսք ուղղելով ներկայ շուրջ հարիւր հրաւիրեալներին, հերթով յիշեց հոգեւորականաց դասին, խորանին սպասարկող կիսասարկաւագաց եւ դպրաց դասերին, «Կոմիտաս» երգչախմբին, Վանքերի Ուխտագնացութեան յանձնախմբին, Խնամակալ մարմնին, Կարգապահների կազմին եւ Սկաւուտներին, որոնք իրենց ներդրումը ունեցել էին ուխտագնացութեան բարեյաջող ընթացման գործում: Սրբազան Հայրը գնահատանքով յիշեց նաեւ ազգային իշխանութեան անդամներին, որոնք յատկապէս ուխտագնացութեան օրերին, պետական յարաբերութիւնների միջոցով տնօրինումներ կատարել էին, ուխտաւոր ժողովրդի ապահովութիւնը հոգալով:

Սրբազան Հայրը յատկապէս յիշեց մեր ժողովրդի համար ներկայ դժւարին ժամանակահատւածը, շեշտելով մեր ունեցած արժէքները, սրբութիւններին տէր կանգնելու հրամայականը. «Մի բան կորցնելուց յետոյ դրա արժէքը իմանում ենք մենք: Այսօր Իրանի Իսլամական Հանրապետութեան հովանու ներքոյ ծաղկուն վիճակում են գտնւում Ատրպատականի մեր թեմի վանքերը: Նիւթական հսկայ ներդրում է կատարում կառավարութիւնը իր Մշակութային ժառանգութիւնների հիմնարկութեամբ, որպէսզի կանգուն մնան մեր վանքերը: Աշխարհի կոյր աչքերի առջեւ, այլ վայրերում, մեր դարերի հնութիւն եղող վանքերն ու սրբատեղիները աւերւում են ու կործանւում: Մենք ինչքան երախտապարտ պիտի լինենք այստեղ, որ մեր սրբավայրերը ոչ միայն յարգւում են եւ այցելւում, այլեւ վերանորոգւում ու պահպանւում, որպէս սրբազան աւանդ»,- ասաց Սրբազան Հայրը:

Նա իր խօսքի աւարտին մեծ ուրախութիւն յայտնեց, ասելով որ թէպէտ թւով քիչ, սակայն միասնական ջանքով հսկայական աշխատանք էին կատարել թեմի բոլոր միութիւններն ու կազմակերպութիւնները. «Մէկ ընտանիքի հասկացութեամբ աշխատեցիք եւ հազար փառք Աստուծոյ, պատւով աւարտեցիք ձեր գործը, ե՛ւ հոգեւոր, ե՛ւ մշակութային, ե՛ւ ժողովրդական ծառայութեան առումով»,- եզրակցրեց Սրբազան Հայրը:

Թեմական խորհուրդը յատուկ նւէրներ էր նախատեսել յատկապէս երիտասարդութեան համար: Արսինէ Բաբայեանը հերթաբար ընթերցեց ծառայութիւն մատուցած անհատների անունները, որոնք Սրբազան Հօր ձեռամբ ստացան իրենց նւէրը: Այդ անհատների թւում էին, Կարգապահական կազմի անդամները, Սկաւուտական կազմի ներկայացուցիչները, ինչպէս նաեւ խորանի վրայ ծառայութիւն մատուցած դպիրներն ու դպրուհիները:

Սրբազան Հայրը յատուկ նւէրներով պատւեց «Կոմիտաս» երգչախմբի ղեկավար Վարդան Վահրամեանին, դոկտ. Շերլի Աւետեանին եւ նրա ժրաջան օգնականներ Ալէն Գրիգորեանին եւ Կարէն Մկրտչեանին, Վանքերի ուխտագնացութեան Գործադիր յանձնախմբի երկար տարիների ատենապետ Ազատ Մատթէոսեանին, «Տաթեւ» եւ «Ակունք» պարախմբերի գեղարւեստական ղեկավար Կարինէ Մանուչերեանին, եւ համոյթի պատասխանատու Նայիրի Դիլանեանին, Կարգապահների պատասխանատու Բաբգէն Գասպարեանին, որոնք պանծացրին ուխտագնացութիւնը, իրենց կարեւոր դերակատարութեամբ:

Հոգեկան բաւարարութեան եւ ուխտագնացութեան բացառիկ առիթը վերյիշելու մի պահ հանդիսացաւ սոյն հաւաքը, առաջիկայ տարւայ համար նոր ծրագրերի մշակման եւս նպաստելով, փոխադարձ խորհրդակցութեան միջոցով: Աւարտին հաւաքաբար երգւեց «Կիլիկիա» մաղթերգը եւ Սրբազան Հօր «Պահպանիչ» աղօթքով եզրափակւեց երեկոն: