Ազգային առաջնորդարանի պաշտօնէութիւնը հրաժեշտ տւեց 2023 թւականին
2023 թւականի դեկտեմբերի 30-ին, ազգ. առաջնորդարանի դահլիճում ներկայութեամբ Թ.Հ.Թ. Թեմական խորհրդի ատենապետ ճրտպ. Նորայր Արամեանի եւ խորհրդի անդամների՝ այս տարի ամբողջովին տարբեր մթնոլորտում տեղի ունեցաւ ազգ. առաջնորդարանի պաշտօնէութեան Նոր տարւայ դիմաւորման հանդիսութիւնը:
Ցաւօք այս տարւայ խրախճանքին, առողջական խնդրի պատճառով հնարաւոր չեղաւ վայելել թեմիս առաջնորդ Տ. Սեպուհ արք. Սարգսեանի ներկայութիւնը, սակայն փոխանցւեց նրա հայրական օրհնութիւնն ու ջերմ բարեմաղթանքները:
Սկզբում ազգ. առաջնորդարանի դիւանապետ՝ Զօրիկ Կարապետեանը պաշտօնէութեան անունից շնորհաւորեց Թ.Հ.Թ. Թեմական խորհրդի անդամներին՝ Նոր տարւայ եւ Ս. Ծննդեան տօների առիթով, ընդգծելով, որ պաշտօնէութիւնը՝ իբրեւ մէկ մեծ ընտանիք, գլխաւորութեամբ Սրբազան Հօր եւ Թեմական խորհրդի, պատրաստակամ է վերանորոգ եռանդով շարունակելու իրեն վստահւած աշխատանքը:
Թ.Հ.Թ. Թեմական խորհրդի ատենապետ՝ ճրտպ. Նորայր Արամեանը իր հերթին շնորհաւորելով գալիք Նոր տարին, անդրադարձաւ վերջին տարիների ընթացքում առաջնորդարանի դիմագրաւած տնտեսական եւ տարբեր պատճառներով գոյացած մարտահրաւէրներին եւ յոյս յայտնեց, որ այս տարի լինի բարեբեր ու արգասիքներով լի տարի։ Նա իր արտայայտութիւնների ընթացքում անդրադարձաւ Արցախի իրադարձութիւններին եւ արցախահայութեան դիմագրաւած ծանր պայմաններին եւ յոյս յայտնեց, որ Նոր տարում աւելի միասնական ջանքեր կը գործադրւեն ի խնդիր մեր քոյրերի ու եղբայրների ցաւերի ամոքման եւ նեղութիւնների ու դժւարութիւնների յաղթահարման:
Շնորհաւորական բարեմաղթանքներով ելոյթ ունեցան նաեւ Թեմական խորհրդի փոխատենապետ Վահէ Թարոյեանը եւ ատենադպիր Հայրիկ Աղանեանը:
Հարկ է նշել, որ այս տարի պաշտօնէութեան առաջարկութեամբ Նոր տարւայ առիթով նախատեսւած նւէրների գումարը յատկացւեց արցախահայութեան համար վառարանների գնմանը:
Ազգային առաջնորդարանի Հանրային կապի գրասենեակ
