Հայաստանի ազգային ֆիլարմոնիկ նւագախումբն իր 100-ամեակը նշեց 2500-ամեայ Պերսեպոլիսում
Երկու ժողովուրդների բարեկամութեան մեղեդին՝ քաղաքակրթութեան մայրաքաղաք Պարսէում
«ԱԼԻՔ» – Իրանի եւ Հայաստանի ժողովուրդների միջեւ բարեկամութեան մեղեդայնութիւնը շաբաթ՝ սեպտ. 6-ի երեկոյեան Պերսեպոլիսում լսելի դարձաւ Հայաստանի ազգային ֆիլարմոնիկ նւագախմբի միջոցով, որտեղ հայերը «Էյ Իրան»-ը երգեցին, իսկ իրանցի հանդիսատեսը մի քանի րոպէ՝ երկար ու կրքոտ ծափահարել է, երբ «ֆիլարմոնիկը» հայկական ստեղծագործութիւններից մէկն է ներկայացրել։ Այս մասին իր յուզիչ թղթակցութեան մէջ նշել է ԻՌՆԱ-ի լրագրողը:
Նոյն՝ «Ազգերի դարպաս»-ով, որով 2500 տարի առաջ տարբեր մշակոյթներ ունեցող 23 ազգութիւններ համերաշխութեան խորհրդանիշեր էին նւիրաբերում, սեպտեմբերի 6-ին անցաւ Հայաստանի ազգային ֆիլարմոնիկ նւագախումբը, իր հիմնադրման 100-ամեակի տօնակատարութիւնն իրանցիների հետ կիսելու: Նւէր, որն Իրանում Հայաստանի Հանրապետութեան դեսպան Գրիգոր Յակոբեանի մեկնաբանութեամբ՝ «Այլ որակի գործ էր»:
Գրիգոր Յակոբեանը նոյն առիթով իր ելոյթում նշել է. «Երբ նայենք Պերսեպոլիսի անկրկնելի ցայտաքանդականերով ներկայացւած պատումներին, կը տեսնենք նաեւ Հայաստանը ներկայացնող պատւիրակութեան դրւագը: Պատկերում Հայաստանի պաշտօնեաները կանգնած են առաջին շարքերում եւ արժանապատւօրէն իրենց ընծաներն են մատուցում Իրանի արքային»:
Նա նշելով, որ այսօր նոյն վայրում եւ նոյն ոգով ու նոյն յարգանքի զգացողութեամբ, երկու ժողովուրդները կողք կողքի են հաւաքւել, յաւելել է. «Սակայն, մեր այսօրւայ ընծան այլ է լինելու։ Մեր նւէրը մեր պատմութեան անձնագրի վկայ՝ ստեղծագործականութիւնն ու ստեղծագործողի յաւերժական գոյութիւնն է»:
Ընթացքում Հայաստանի ազգային ֆիլարմոնիկ նւագախմբի 110 երաժիշտներ Էդւարդ Թոփչեանի ղեկավարութեամբ իրենց գեղարւեստական նւէրը բացեցին Իրանի ժողովրդի առաջ, Իրանի ազգային օրհներգի կատարմամբ, որին Պերսեպոլիսի կոթողների շեմին հաւաքւած շուրջ 1500 հանդիսատես հետւում էր ոտնկայս:
Միջոցառումը շարունակւել է Ֆարսի նահանգապետի, երկու երկրների Կրթութեան եւ Գիտութեան նախարարների մի քանի կարճ ելոյթներով։
ԻՌՆԱ-ի փոխանցմամբ՝ 60 անդամից կազմւած «Փարսէ Շիրազ» խորալը՝ Թէյէբ Ֆաղիհի գլխաւորութեամբ ընկերակցել է Հայաստանի ազգաին ֆիլարմոնիկ նւագախմբին կատարումների ժամանակ։
Եւրոպական, ասիական եւ աֆրիկեան 23 երկրների դեսպանների ու դեսպանատների ներկայացուցիչների, ինչպէս նաեւ ԻՒՆԵՍԿՕ-ի երկու ներկայացուցիչների ներկայութեամբ տեղի ունեցած երաժշտական իրադարձութեանը յատուկ հրաւէրով ներկայ են եղել նաեւ Իրան-Հայաստան խորհրդարանական բարեկամութեան խմբի նախագահ Արա Շահվերդեանը եւ նոյն խմբի անդամ, պատգամաւոր Գեղարդ Մանսուրեանը:
ԻՌՆԱ-ն նշել է նաեւ, որ Իրանի Իսլ. Հանարապետութեան օրհներգով բացւած նւէրը փակւել է «Էյ Իրան» էպիկական երգով:
