Լոյս է տեսել «Նեւեշթա»-ի 65-րդ համարը՝ ընդգծելով հայալեզու ստեղծագործական ժառանգութեան կենդանի ներկայութիւնը
«ԱԼԻՔ» – Լոյս է տեսել «Նեւեշթա» գրական-մշակութային միջազգային հանդէսի 65-րդ համարը։ Մաշհադ քաղաքում շուրջ 18 տարի հրատարակւող եւ Թեհրանում ու արտասահմանում լայն տարածում ունեցող «Նեւեշթա» գրական-գեղարւեստական քառամսեայ պարսկերէն հանդէսի նշւած համարը նւիրւած է հայալեզու բանաստեղծներին, գրողներին եւ արւեստագէտներին եւ հրատարակւել է Սուրբ Ծննդեան տօների առիթով:
Համարում ընդգրկւած են տարբեր սերունդների հայ եւ իրանցի հեղինակների ստեղծագործութիւններ: Յօդւածներով հանդէս են եկել «Նեւեշթա»-ի գլխաւոր խմբագիր՝ Մոհամմադհոսէյն Մոդելը, գրական բաժնի խմբագիր՝ անւանի վիպասան Հոսէյն Աթաշփարւարը, «Ալիք» օրաթերթի գլխաւոր խմբագիր Արամ Շահնազարեանը եւ այլ հայ եւ պարսկալեզու գրականագէտներ, այդ թւում՝ Գրիգոր Առաքելեանը, Ռոբերտ Բեգլարեանը, Վահան Տէրեանը, Եղիշէ Չարենցը, Զապէլ Եսայեանը, Համօ Սահեանը, Հոմա Ջասեմը, Սարա Հոսէյնին, Վիլիամ Սարոյեանը, Սիամանթօն (Ատոմ Եարճանեան), Համօ Սահեանը, Դանիէլ Վարուժանը, Ահմադ Նուրի Զադէն, Դեւ-ը, Համլետ Այւազեանը, Արեգ Բագրատեանը, Վալերի Բրիւսովը, Արա Աւանէսեանը, Անի Յովսէփեանը եւ այլ գրողներ։
«Նեւեշթա»-ի նշւած համարի նիւթերի հետ կապւած աշխատանքները նախաձեռնել, կազմել եւ խմբագրել է իրանահայ շնորհալի թարգմանիչ Անի Յովսէփեանը, որի համար հրաւիրւել եւ պատւոյ խմբագրի հանգամանքով յանձն է առել բացառիկ համարի աշխատանքները:
Խմբագրութեան նշումով՝ յատուկ այս համարն ուղղւած է հայ մշակոյթի, գրականութեան եւ արւեստի արժէքների վերարժեւորումին եւ պարսկալեզու լսարանին ներկայացնելուն՝ ընդգծելով հայալեզու ստեղծագործական ժառանգութեան կենդանի ներկայութիւնը։
