«Արցախ. վտանգւած ժառանգութիւն» պատկերագրքի 2-րդ հատորի շնորհանդէսը
Համազգային հայ կրթական եւ մշակութային միութեան Հայաստանի գրասենեակի նախաձեռնութեամբ Երեւանում՝ Արցախի ներկայացուցչութեան դահլիճում, կայացաւ «Արցախ. վտանգւած ժառանգութիւն» եռալեզու պատկերագրքի երկրորդ հատորի շնորհանդէսը։
Պատկերագրքի առաջին եւ երկրորդ հատորները՝ հայերէն, անգլերէն եւ ռուսերէն լեզուներով, ներկայացնում են Արցախի մշակութային ժառանգութիւնը, որն այսօր Ադրբեջանի կողմից ենթարկւում է ցեղասպանութեան։
Արցախի 44-օրեայ պատերազմից յետոյ Համազգայինի Հայաստանի եւ Արցախի գրասենեակները նախաձեռնեցին այդ կարեւոր հրատարակութիւնը՝ նպատակ ունենալով պատկերագրքի տարածման միջոցով աշխարհի ուշադրութիւնը սեւեռել այն փաստի վրայ, որ Արցախում վտանգւած է հայկական մշակութային հետքը։
«Արցախ. վտանգւած ժառանգութիւն» պատկերագիրքը կազմւել է Հայկական ճարտարապետութիւնն ուսումնասիրող հիմնադրամի տնօրէն Րաֆֆի Քորթոշեանի կողմից՝ հիմնւելով յստակ փաստերի եւ մասնագիտական ուսումնասիրութիւնների վրայ։ Այն նպատակ ունի փաստարկւած պատասխաններ տալու Ադրբեջանի կեղծ քարոզչութեանը։
Շնորհանդէսը բացւեց Համազգայինի Երեւանի գրասենեակի տնօրէն Ռուզան Առաքելեանի խօսքով։ Նա նշեց. «Գուցէ ժամանակին մենք ըստ արժանւոյն չենք հակադարձել Ադրբեջանի հակահայկական քարոզչութեանը, երբ նա տարիներ ի վեր փորձում էր աշխարհին ապացուցել, թէ Արցախում հայկական հետք չկայ։ Բայց այսօր իրաւունք չունենք այդ հարցում թերանալու։ Արցախում ոչնչացման վտանգի տակ են բազմաթիւ հնամեայ եկեղեցիներ եւ պատմական յուշարձաններ։ Ադրբեջանը շարունակում է քաղաքակիրթ աշխարհի աչքի առաջ իրականացնել նոր ցեղասպանութիւն։ Ոչ ոք չի սաստում եւ չի բռնում նրա ձեռքը։ Այս պատկերագիրքը գուցէ փոքր, բայց շատ կարեւոր քայլ է՝ հակազդելու մեր հարեւանների նկրտումներին եւ մեր մշակութային արժէքները աշխարհին ցոյց տալու համար»։
ՀՅԴ Բիւրոյի ներկայացուցիչ Արմէն Ռուստամեանն իր ելոյթում անդրադարձաւ արցախահայութեան հաւաքական վերադարձի եւ հայկական ժառանգութեան պահպանման հիմնախնդիրներին՝ ընդգծելով, որ նման գրքերի լոյս ընծայումն ու տարածումն այսօր, առաւել քան երբեւէ, կարեւոր են՝ միջազգային դիւանագէտների հետ փաստարկներով խօսելու համար։
«Ի տարբերութիւն ՀՀ ներկայ իշխանութիւնների, որոնք կարծում են, թէ Արցախի հարցը փակւած է, մենք շեշտում ենք` դա այդպէս չէ։ Արցախում մշակութային ցեղասպանութեան իրողութիւնը եւս մէկ անգամ ապացուցում է, որ հակամարտութիւնը գոյութիւն ունի եւ լուծւած չէ։ Քանի դեռ ժառանգութեան պահպանման հարց կայ, մենք պարտաւոր ենք միջազգային բարձր հարթակներում շարունակաբար բարձրաձայնել եւ հետապնդել այն։ Այդ նպատակին են ծառայում ՀՅԴ Հայ Դատի գրասենեակները եւ նրա ուղեկից կառոյցները, այդ թւում՝ Համազգայինը»,- նշեց Ռուստամեանը։
Ելոյթներով հանդէս եկան նաեւ պատմական գիտութիւնների դոկտոր, պրոֆեսոր Վահրամ Բալայեանը, պատկերագրքի հեղինակ Րաֆֆի Քորթոշեանը, ակադեմիկոս Աշոտ Մելքոնեանը, Համազգայինի Կենտրոնական վարչութեան անդամ Արտաշէս Շահբազեանը, Արցախի մարդու իրաւունքների պաշտպան Գեղամ Ստեփանեանը, բանասիրական գիտութիւնների դոկտոր Հայկազուն Ալւրցեանը։
Շնորհանդէսի աւարտին Ռուզան Առաքելեանը շնորհակալութիւն յայտնեց Համազգային հայ կրթական եւ մշակութային միութեան Կենտրոնական վարչութեանը եւ բոլոր հովանաւորներին, ովքեր աջակցել են պատկերագրքի առաջին եւ երկրորդ հատորների կեանքի կոչմանը։ Նա նաեւ երախտագիտութիւն յայտնեց Արցախի ներկայացուցչութեանը՝ նշելով, որ համագործակցութիւնը շարունակական բնոյթ է կրելու։
Համազգայինի Երեւանի գրասենեակ
