Լոյս է տեսել ՀՅԴ պաշտօնաթերթ «Դրօշակ»-ի 2024 թ․ երրորդ համարը
Համացանցի էջին խմբագրութիւնը ներկայացրել է «Դրօշակ»-ի 2024 թւականի մարտեան համարը: Համարի «Առաջնորդողի» խորագիրն է «Ոտատակ ընկած Նիկոլ, ոտատակ եղող Հայաստան», ինչը ճշգրտօրէն արտայայտում է այսօրւայ Հայաստանի ղեկավարի քաղաքական վարքը, ինչի հետեւանքն էլ աշխարհաքաղաքական վտանգաւոր գործընթացների յորձանուտի մէջ ընկղմւող մեր երկիրն է:
Ի դէպ, ՀՅ Դաշնակցութեան Բիւրոն օրեր առաջ յայտարարութեամբ անդրադարձաւ իշխանութիւնների կործանարար քաղաքականութեանը, մասնաւորապէս, Արցախից յետոյ այժմ էլ Հայաստանից տարածքներ զիջելու անհեռատես եւ անպատասխանատու գործունէութեանը: Նշւած յայտարարութիւնը նոյնպէս ներկայացւած է «Դրօշակի» այս համարում:
Եթէ իշխանութիւնները ամէն ճիգ ու ջանք գործադրում են փակելու, մոռացութեան մատնելու Արցախ էջը, ապա ազգային եւ բանական հայ մարդկանց համար անընդունելի պէտք է լինի ազգային շահերի ոտնահարման այս բացայայտ դաւաճանական քայլը: «Դրօշակ»-ը սոյն համարում մի քանի յօդւածով անդրադարձել է Արցախի հարցին իրաւաքաղաքական տեսանկիւնից, քննելով թէ՛ այսօր Հայաստանի Հանրապետութիւնում ապաստանած արցախահայութեան առջեւ ծառացած իրաւական բնոյթի խնդիրները, թէ՛ անդրադառնալով Արցախի հանրապետութեան նկատմամբ Հայաստանի ստանձնած պարտաւորութիւններին: Այս շարքում ուշագրաւ է նաեւ պատմաբան Արմէն Մարուքեանի յօդւածը, որն անդրադարձ է միջազգային ասպարէզում Արցախի հարցի հետապնդման իրաւական հիմքերին:
Մօտենում է ապրիլի 24-ը, որն իհարկէ կարեւոր առիթ է, թէեւ առանց յատուկ առիթի էլ Ցեղասպանութեան եւ նրանից բխող Հայ դատի խնդիրները երբեք չպէտք է դուրս դրւեն հայկական օրակարգերից: «Դրօշակ»-ի այս համարում, մի քանի հեղինակներ, տարբեր դիտանկիւններից անդրադարձել են այս չսպառւող ցաւոտ թեմային:
«Դրօշակի» «Ընկերական զրոյցների» շարքը մշտապէս ներկայացնող գրող-հրապարակագիր Վրէժ-Արմէնը այս անգամ անդրադառնում է մի երեւոյթի, որը կարելի է կոչել «հասարակական մեր կեանքը կարգաւորող կանոններ» մասնաւորեցնելով ասելիքը «մեր ինքնութեան պահպանման» կանոնների եւ թելադրանքների վրայ:
Ինչպէս միշտ ընթերցողը ակնարկւած նիւթերի կողքին կը գտնի այլ հետքրքրական յօդւածներ եւս:
