Արսէն Համբարձումեան. «Դաշնակցութեան համար միշտ ուսանողական եւ երիտասարդական կազմակերպութիւններն ունեցել են առանձնայատուկ դեր»

Նոյեմբերի 15-ին Հայաստանի կինոգործիչների միութեան տանը տեղի ունեցաւ ՀՅԴ «Նիկոլ Աղբալեան» Ուսանողական միութեան 35-րդ ամեակին նւիրւած միջոցառում։

Այդ կապակցութեամբ ՀՅԴ Բիւրոյի անդամ Արսէն Համբարձումեանը, ով ժամանակին եղել է ՀՅԴ «Նիկոլ Աղբալեան» Ուսանողական միութեան ատենապետ, yerkir.am-ին տւած հարցազրոյցում ասել է. «Առիթից օգտւելով, ուզում եմ շնորհաւորել բոլոր այն մեր ընկերներին, ովքեր երբեւէ բախտ են ունեցել անդամակցելու Դաշնակցութեան «Նիկոլ Աղբալեան» Ուսանողական միութեանը, իսկ անցնող 35 տարւայ ընթացքում հարիւրաւոր, եթէ ոչ հազարաւոր, երիտասարդներ են անցել «Աղբալեան» Ուսանողական միութեան դպրոցով, բառիս բուն իմաստով դպրոցով, որտեղ ստացել են դաստիարակութիւն, կազմակերպւածութիւն, ընկերասիրութիւն եւ այն բոլոր անհրաժեշտ որակները, որոնք, կարծում եմ, հետագայում իրենց կեանքի ընթացքում շատ օգտակար են եղել։

Ինչ վերաբերւում է Ուսանողական միութեան հիմնադրմանը, Դաշնակցութեան հիմնադիրները եղել են ուսանողներ, Քրիստափորը, Ռոստոմը, Զաւարեանը, մեր հիմնադիր հայրերը իրենք եղել են ուսանող երիտասարդներ։ Դաշնակցութեան համար միշտ ուսանողական եւ երիտասարդական կազմակերպութիւններն ունեցել են առանձնայատուկ դեր, հակառակ մեր կանոնադրութեան գրւած ու չգրւած բոլոր օրէնքներին, եւ Դաշնակցութեան հիմնադրումից ընդամէնը տարիներ յետոյ արդէն տարբեր կազմակերպական շրջաններում ձեւաւորւել են ուսանողական միութիւններ եւ, ըստ էութեան, ուսանողական միութիւնները Հայաստանի Հանրապետութեան կազմակերպական կառոյցի անբաժանելի մասնիկն են եղել միշտ։  Մասնաւորապէս, օրինակ, Լիբանանի «Զաւարեան» Ուսանողական միութեան հիմնադրումից անցել է աւելի քան 100 տարի, ես չգիտեմ աշխարհում կա՞յ մէկ այլ ուսանողական կազմակերպութիւն, որ այդքան երկար կեանք է ունեցել։ Ուսանողական կազմակերպութիւններ Դաշնակցութիւնը միշտ է ունեցել թէ՛ ամերիկեան մայրցամաքում, թէ՛ Եւրոպայում, թէ՛ Թուրքիայի տարածքում, եւ 90 թւականին Հայաստանի անկախութեան ձեռբերումից յետոյ, երբ որ Դաշնակցութիւնը վերընձիւղւում էր հայրենիքում, բնականաբար, առաջին քայլերից մէկը եղաւ նաեւ ուսանողական միութեան ստեղծման նախաձեռնութիւնը, եւ Բիւրոյի որոշմամբ է ստեղծւել ժամանակին «Նիկոլ Աղբալեան»  Ուսանողական միութիւնը, որի հիմնադիր յանձնաժողովին մասնակցել է այն ժամանակւայ Բիւրոյի գործիչ երջանկայիշատակ Խաժակ Տէր-Գրիգորեանը։

Բնականաբար այդ ժամանակ Հայաստանում Դաշնակցութեան անդամակցած ուսանողների թիւը բաւականին փոքրաթիւ էր։ Հիմնականում այստեղ ուսանող սփիւռքահայ մեր ընկերների մասնակցութեամբ ձեւաւորւեց ուսանողական միութիւնը, բայց շատ արագ, ընդամէնը մէկ-երկու տարւայ ընթացքում, ուսանողական միութեան թիւն էապէս աւելացաւ եւ ուսանողական միութիւնը հէնց 91 թւականից ի վեր շատ լուրջ, էական մասնակցութիւն է ունեցել թէ՛ Արցախեան ազատամարտում, թէ՛ հանրապետութեան հասարակական- քաղաքական կեանքում, եւ ամենատարբեր ասպարէզներում մշտապէս եղել է առաջին գծի վրայ…  Մենք այսօր առիթ ունենք միմեանց շնորհաւորելու, մաղթելու, որ «Նիկոլ Աղբալեան» Ուսանողական միութիւնը այսուհետ եւս կարողանայ իր առաքելութեանը համապատասխան գործունէութիւն ծաւալի։

Այստեղ գալուց մտածում էի, որ երբեք մտքովս չէր անցնի 30-35 տարի անց ներկայ կը գտնւեմ «Աղբալեան» Ուսանողական միութեան հիմնադրման յոբելեանին եւ հետահայեացքով կը փորձեմ արժեւորել անցած ճանապարհը՝ թէ ուսանողական միութիւնն ինչ է տւել ինձ»,-ասել է Արսէն Համբարձումեանը։