ԳաղափարականՀայաստան - ԱրցախՔաղաքական
ՀՅԴ Հայաստանի Գերագոյն մարմնի յայտարարութիւնը
ՀՅԴ Հայաստանի Գերագոյն մարմինը նախապէս հրապարակւած յայտարարութեամբ արտայայտել էր կուսակցութեան դիրքորոշումը Երեւանի աւագանու սեպտեմբերի 17-ին կայանալիք ընտրութիւնների շուրջ ստեղծւած իրավիճակի վերաբերեալ:
Դիտարկելով աւագանու ընտրութիւններին առաջադրւած ուժերի մինչ այժմ արտայայտած հրապարակային մօտեցումները.
- վերահաստատում ենք, որ Երեւանցին իր վճռական քւէով պէտք է թոյլ չտայ, որպէսզի անցնող հինգ տարիներին ինչպէս երկրի, այնպէս էլ մայրաքաղաքի կառավարումը տապալած, մեր Հայրենիքը օրհասական վիճակի հասցրած ՔՊ-ական իշխանութիւնը վերարտադրւի մայրաքաղաքում։ Երեւանի աւագանու ընտրութիւններում ՀՅԴ-ի համար հաւասարապէս անընդունելի եւ մերժելի են թէ՛ ՔՊ-ն, եւ թէ՛ նրան բացայայտ կամ քողարկւած կերպով աջակցող ուժերը,
- կոչ ենք անում ընտրութիւններին մասնակցող բոլոր առողջ ուժերին յստակ գնահատական տալ իշխանութեան կործանարար գործունէութեանը, հրապարակային եւ անվերապահ բացառել Երեւանի աւագանիում ՔՊ-ի հետ որեւէ միաւորման ձեւաւորումը կամ նրան աջակցելը, ինչպէս նաեւ յետընտրական համագործակցութեան պատրաստակամութիւն յայտնել միմեանց հետ,
- գնահատելով առ այս պահը հրապարակային արտայայտւած հիմնական դիրքորոշումներն ու հետապնդած նպատակի շուրջ արձանագրւած համապատասխանութիւնը, ՀՅԴ Հայաստանի Գերագոյն մարմինը կոչ է անում մեր հայրենակիցներին քւէարկել Անդրանիկ Թեւանեանի գլխաւորած «Մայր Հայաստան» դաշինքի օգտին։
Հ. Յ. Դաշնակցութիւնն ընտրական յանձնաժողովներում իր ներկայացուցիչների գործուն մասնակցութեամբ վերահսկելու է ընտրութիւնների ընթացքը։
ՀՅԴ Հայաստանի Գերագոյն մարմին
Երեւան, 30 օգոստոսի, 2023 թ.
«Arfd.am»
