Անուրանալի է այս կուսակցութեան կարեւոր դերը Հայոց Ցեղասպանութեան ճանաչման գործում

Մայր Աթոռի Արտաքին յարաբերութիւնների եւ արարողակարգի բաժնի տնօրէն Տ. Նաթան արքեպիսկոպոս Յովհաննիսեանի խօսքը՝ ՀՅԴ 135-ամեակի հանդիսաւոր միջոցառմանը.

«Սիրելի հայրենակիցներ, սիրելի քոյրեր եւ եղբայրեր,

այս պահին պատիւը ունեմ փոխանցելու ազգիս Վեհափառ Հայրապետի՝ Ն.Ս.Օ.Տ.Տ. Գարեգին Երկրորդ Ծայրագոյն Պատրիարք եւ Ամենայն Հայոց Կաթողիկոսի Հայրապետական օրհնութիւնները եւ ջերմագին ողջոյնները Հայ Յեղափոխական Դաշնակցութեան 135-ամեակի նւիրւած այս հանդիսութեան բոլոր ներկաներիդ եւ, ընդհանրապէս, աշխարհասփիւռ բոլոր նրանց, ովքեր ուրախութեամբ, հպարտութեամբ եւ իրական եղբայրական սիրով նշում են այս յոբելեանը եւ ուրախանում մեր ազգի հետ միասին»։

Նաթան Սրբազանն ընդգծեց, որ ՀՅԴ առաքելութիւնը, որ սկսւել է 19-րդ դարի վերջին, այնուհետեւ անցել է ամբողջ դժւարին 20-րդ դարը, այսօր, 21-րդ դարի առաջին քառորդին էլ այդ առաքելութեան կարիքն ունենք։

«Ես, անձնապէս, երբեւէ առիթը չեմ բաց թողնում խօսելու Հայ Յեղափոխական Դաշնակցութեան կեանքի, կենսագրութեան, նրա արածների մասին, յիշատակելու յատկապէս կարեւոր մի առաքելութեան՝ մեր մատաղ սերունդներին դաստիարակելու ազգային ոգով, ազգային ինքնութիւնը պահպանելու եւ հայրենիքը պաշտպանելու մասին։

Որպէս հոգեւորական, իմ հոգեւոր առաքելութեան ընթացքում շատ եմ շփւել երիտասարդաց միութիւնների հետ, որոնց առաջնորդում եւ ուղղորդում է Հայ Յեղափոխական Դաշնակցութիւնը։ Անուրանալի է նաեւ այս կուսակցութեան կարեւոր դերը Հայոց Ցեղասպանութեան ճանաչման գործում տարբեր երկրների, տարբեր ազգերի կողմից, եւ այսօր էլ կան պայքարի առաջնագծեր, որոնք պէտք է տանեն նորանոր յաղթանակների։

Թող Տիրոջ լոյսը մշտապէս լուսաւորի մեր ժողովրդի կեանքի ճանապարհը եւ Տիրոջ Օրհնութեամբ ապրենք խաղաղ, բարոր, եւ որպէս հայ պահպանելով, պաշտպանելով մեր սեփական պատմութիւնը, մեր ինքնութիւնը, մեր ով լինելը եւ աշխարհը մշտապէս իմանայ, որ հայը եղել է, կայ ու կը լինի

Ամէն»։

Arfd.am