Հաստատւել է «Հրայր Մարուխեան» հիմնադրամի անդամակցութիւնն Առաջադիմական հետազօտութիւնների եւրոպական հիմնադրամին
Առաջադիմական հետազօտութիւնների եւրոպական հիմնադրամի (Foundation for European Progressive Studies/FEPS) գլխաւոր ասամբլեան նոյեմբերի 13-ին վաւերացրել է «Հրայր Մարուխեան» հիմնադրամի անդամակցութեան դիմումը։
FEPS-ը եւրոպական խոշորագոյն քաղաքական հիմնադրամներից մէկն է, իսկ սոցիալ-դեմոկրատական ուղղւածութեան՝ խոշորագոյնը։ Այն ունի 41 լիիրաւ անդամ ԵՄ անդամ երկրներից եւ 31 դիտորդ անդամ՝ ԵՄ եւ այլ երկրներից։
Այս յաջողութիւնն իր աշխատանքները վերաաշխուժացնող «Հրայր Մարուխեան» հիմնադրամին հնարաւորութիւն կը տայ շեշտակիօրէն ընդլայնել միջազգային համագործակցութեան շրջանակը, ներգրաււել ոլորտային կրթական, հետազօտական եւ գիտական ծրագրերում։ FEPS-ի անդամակցութիւնն էապէս կընդլայնի նաեւ «Հրայր Մարուխեան» հիմնադրամի վերլուծական ներուժը՝ վերջինիս հնարաւորութիւն ընձեռելով օգտւել FEPS-ի վերլուծական կարողութիւններից։
FEPS-ի գլխաւոր ասամբլեային մասնակցելու նպատակով Բրիւսէլում գտնւող «Հրայր Մարուխեան» հիմնադրամի տնօրէն Գէորգ Ղուկասեանը հանդիպել է FEPS-ի նախագահ Նիկոլաս Շմիդթի եւ FEPS-ի գլխաւոր քարտուղար Լասլօ Անդորի հետ եւ մտքեր փոխանակել առաջիկայ համագործակցութեան շուրջ։ Նախքան այդ՝ գլխաւոր ասամբլեայի ընթացքում տեղի ունեցած իր ելոյթում, նա ընդգծել է Հայաստանում սոցիալ-դեմոկրատական գաղափարների շուրջ մտաւոր, ակադեմիական եւ քաղաքական միջավայրի զարգացման կարեւորութիւնը։
Նրա խօսքով՝ սոցիալ-դեմոկրատիան Հայաստանի համար պարզապէս քաղաքական աւանդոյթ չէ, այլ երկրի ապագայի հրամայական, ինչպէս նաեւ ժողովրդավարական համախմբման, սոցիալական արդարութեան, տնտեսական զարգացման ու ազգային անվտանգութեան մարտահրաւէրներին արձագանգելու համապարփակ արժէհամակարգ։ Գէորգ Ղուկասեանն առանձնացրել է Հայաստանում սոցիալ-դեմոկրատական գաղափարների քաղաքացիական եւ մտաւոր միջավայրի ձեւաւորումը՝ որպէս հիմնադրամի գործունէութեան առանցքային ուղղութիւն։
Անդրադառնալով հիմնադրամի ռազմավարական առաջնահերթութիւններին՝ Գէորգ Ղուկասեանը նշել է, որ այն նպատակ ունի կամուրջ դառնալու հայաստանեան հասարակութեան եւ եւրոպական սոցիալ-դեմոկրատական ընտանիքի, ակադեմիական հետազօտութիւնների եւ քաղաքական որոշումների կայացման, ինչպէս նաեւ պատմական սոցիալիստական ժառանգութեան եւ արդի մարտահրաւէրների միջեւ։
