Սեփական իրաւունքներից հրաժարումը չի կարող հանգեցնել խաղաղութեան

Ապրիլի 3-ին Հրապարակ TV-ի Հինգշաբթի հաղորդաշարի հիւրն էր պատմաբան, ՀՅԴ «Դրօշակ» պաշտօնաթերթի նախկին խմբագիր Կարէն Խանլարեանը: Անդրադարձ է կատարւել Արցախեան հարցի, հայրենիքի գաղափարի, Արցախեան շարժման, Հայոց Ցեղասպանութեան իրողութեան եւ ազգային խնդիրների արծարծումներում ՀՀ գործող իշխանութիւնների մօտեցումներին եւ դրանց ազդեցութեանը Հայաստանի ինչպէս արտաքին, այնպէս էլ ներքաղաքական իրավիճակի վրայ: Կարէն Խանլարեանի համոզմամբ՝ Գիւմրու աւագանու ընտրութիւնները լաւագոյնս ցոյց տւեցին, որ ՀՀ իշխանութիւնների որդեգրած մօտեցումներն ու յայտարարութիւնները հիմնազուրկ են եւ միանշանակ ընկալում չունեն հանրութեան շրջանում:

Խօսելով Արցախեան շարժումը չշարունակելու, այդ շարժումը Հայաստանի պետականութեան «չկայացման» պատճառ համարելու Փաշինեանի վերջին յայտարարութիւնների, ինչպէս նաեւ պատմական եւ իրական հայրենիքների հակադրութեան փորձերի մասին՝ Կարէն Խանլարեանը նշել է, որ դրանք որեւէ լուրջ հիմնաւորում չունեն եւ ընդամէնը արտաքին ճնշումներով պայմանաւորւած կեղծ յայտարարութիւններ են: «Արցախեան շարժումը սկսել է հայ ժողովուրդը ի Հայաստան եւ ի սփիւռս աշխարհի, եւ այդ շարժման իրաւատէրը ոչ Փաշինեանն է, ոչ էլ որեւէ գործող իշխանութիւն, եւ նրանք չէ, որ պէտք է իրենց իրաւունք տան որոշելու՝ ժողովուրդը շարունակի կամ չշարունակի շարժումը: Ժամանակին մեր ժողովուրդը հէնց այս շարժման միջոցով տեսաւ Արցախի հարցի լուծման ճանապարհը, հիմա էլ, կանցնեն տարիներ, կը լինեն այլ աշխարհաքաղաքական իրավիճակներ եւ ժողովուրդը կը գտնի պայքարը շարունակելու իր նախընտրութիւնները»,- նշել է Կարէն Խանլարեանը:

Անդրադառնալով Արեւմտեան եւ Արեւելեան Գերմանիայի վերամիաւորման հարցի պատմութեանը՝ Կարէն Խանլարեանն ընդգծել է, որ այդ վերամիաւորումը արդիւնք է Գերմանիայի իշխող սոցիալ-դեմոկրատական կուսակցութեան եւ հետագայ իշխանութիւնների վարած ճիշտ քաղաքականութեան եւ համոզմունքի, որ առանց Գերմանիայի վերամիաւորման հնարաւոր չէ ոչ խաղաղութիւն ոչ էլ Գերմանացի ժողովրդի ազատ ինքնորոշման իրաւունքի իրացում:

Arfd.am