Գիտնականները գրանցել են «քաղաքներ կործանող» աստղակերպ, որը կարող է Երկրին հարւածել 2032 թ.
«ԱԼԻՔ» – ՆԱՍԱ-ի գիտնականները վերջերս նկատել են աստղակերպ, որը կարող է 2032 թ. բախւել Երկրին: Եւ չնայած այն դժւար թէ ոչնչացնի մարդկութեանը, կարող է աւերել մի ամբողջ քաղաք: Տեղեկացնում է Live Science-ը։
2024 YR4 անւանումը ստացած աստղակերպը յայտնաբերւել է ՆԱՍԱ Asteroid Terrestrial-impact Last Alert System-ի կողմից 2024 թ. դեկտեմբերի 27-ին։ ՆԱՍԱ վերջին գնահատականների համաձայն՝ 2032 թ. մեր մոլորակին նրա բախման հաւանականութիւնը 1-ը 43-ի է։
Սակայն կայ նաեւ լաւ նորութիւն Երկրի համար. 2024 YR4-ն ունի ընդամէնը 55 մետր լայնութիւն, ինչը նշանակում է, որ այն չափազանց փոքր է մարդկային քաղաքակրթութիւնը ոչնչացնելու համար, եթէ հարւածի Երկրին:
Գիտնականների հաշւարկներով՝ բախման դէպքում այն կարձակի մօտ 8 մեգատոն էներգիա՝ աւելի քան 500 անգամ աւելի, քան Հիրոսիման ոչնչացրած ատոմային ռումբը:
Չնայած աստղակերպը ներկայում հեռանում է մեզանից, Երկիրը մի քանի անգամ կը մօտենայ տիեզերական օբիեկտին յաջորդ կէս դարի ընթացքում: Նրա յաջորդ մերձեցումը տեղի կունենայ 2028 թ. վերջին, որին կը յետեւեն եւս վեց մերձեցումներ 2032-2074 թթ.: ՆԱՍԱ տւեալներով՝ աստղակերպն ամենայն հաւանականութեամբ Երկրին կը բախւի 2032 թ. դեկտեմբերի 22-ին։
Աստղակերպի մօտենալուց ելնելով՝ գիտնականներն աւելի լաւ կը հասկանան նրա յետագիծը եւ Երկրին բախւելու հաւանականութիւնը:
Այս բոլոր գործօնները 2024 YR4-ը դնում են Տորինոյի ազդեցութեան վտանգի սանդղակի 3-րդ մակարդակում, համակարգ, որը գիտնականներն օգտագործում են աստղակերպի վտանգի աստիճանը որոշելու համար: Այս մակարդակի օբիեկտների համար «հանրութեան եւ պետական պաշտօնեաների ուշադրութիւնը երաշխաւորւած է, եթէ ազդեցութիւնը տասը տարուց պակաս է մնում»: Այնուամենայնիւ, այս կատեգորիայի աստղակերպերի մեծ մասն ի վերջոյ իջեցւում է մինչեւ 0 մակարդակ, ինչը նշանակում է, որ «ազդեցութեան հաւանականութիւնը զրօ է կամ այնքան ցածր, որ փաստացի հաւասար է զրոյի»:
