Չափից շատ սպիտակուցային սալիկներ ուտելը կարող է վնասակար լինել երիկամների համար

Սպիտակուցի սալիկների եւ շէյքերի չափից աւելի օգտագործումը կարող է մեծացնել ատամների քայքայման վտանգը եւ վատթարացնել երիկամների աշխատանքը: Այս մասին Daily Mail-ին յայտնել են բրիտանացի ատամնաբոյժ Ռաջի Մունջալը եւ ուրոլոգ Բհասկար Սոմանին։

Մունջալը բացատրեց, որ շիճուկի սպիտակուցի համը բարելաւելու համար (սպիտակուցային սալիկների եւ շէյքերի հիմնական բաղադրիչը), յաճախ շիճուկի սպիտակուցի արտադրանքին մեծ քանակութեամբ շաքար են աւելացնում: Ատամնաբոյժի խօսքով՝ նման մթերքների կանոնաւոր օգտագործումը կարող է մեծացնել ատամի կարիեսի առաջացման վտանգը այնպէս, ինչպէս ամէն օր շոկոլադ ուտելը։

Շատ մարդիկ ուտում են սպիտակուցային սալիկներ եւ խմում շէյք՝ որոշակի մարզական արդիւնքի հասնելու եւ իրենց մարզավիճակը բարելաւելու համար: Նշւում է, որ մկանները պահպանելու եւ տոկունութիւն զարգացնելու համար վարժութիւնները յաջողութեամբ կատարելու համար մարդը պէտք է օրական օգտագործի 1,2-ից 2 գ սպիտակուց, իսկ մկանների ծաւալն ու ուժը բարձրացնելու համար՝ 1,6-ից մինչեւ 2,8 գ: Սակայն, ըստ ուրոլոգ Սոմանիի, կարեւոր է «չչարաշահել» սպիտակուցները։

Բժիշկը բացատրեց, որ աւելցուկային սպիտակուցը չի ներծծւում օրգանիզմի կողմից, այլ քայքայւում ու դուրս է գալիս նիւթափոխանակութեան ընթացքում։ Ձեր սննդակարգում աւելի շատ սպիտակուցներ աւելացնելն աւելի շատ լարում է ձեր երիկամները, քանի որ նրանք պէտք է զտեն աւելի շատ մուտքային նիւթեր: Եթէ ​​դուք սխալ էք խմում (հեղուկի պակաս), ապա աւելորդ սպիտակուցը մեծացնում է երիկամներում քարերի առաջացման վտանգը:

«Քարերը կարող են արգելափակել միզածորանները՝ երիկամներից դէպի միզապարկ տանող խողովակները՝ յանգեցնելով վարակի: Միզուղիների խանգարումը չբուժւելու դէպքում կարող է առաջացնել երիկամների ֆունկցիայի կորուստ եւ նոյնիսկ երիկամային անբաւարարութիւն»,- եզրափակեց բժիշկը:

NEWS.am Medicine