Թունաքիմիկատների ազդեցութիւնն օրգանիզմի վրայ համեմատւել է ծխելու հետեւանքների հետ

Ապացուցւել է, որ պեստիցիդները՝ գիւղատնտեսութեան մէջ ակտիւօրէն օգտագործւող թունաքիմիկատները ոչ պակաս վտանգաւոր են մարդու օրգանիզմի համար, քան ծխելը։ Այս երկու գործօնների ազդեցութիւնը քաղցկեղի առաջացման վտանգի նկատմամբ համեմատել են ԱՄՆ գիտնականները,- գրում է naked-science-ը։

Թունաքիմիկատները նիւթեր են, որոնք սպանում են վնասատուներին եւ բոյսերը հիւանդացնող պաթոգեններին, ինչպէս նաեւ մակաբոյծներին, հացահատիկի եւ փայտի վնասատուներին եւ մարդկանց եւ կենդանիների համար վտանգաւոր հիւանդութիւնների կրողներին: Հերբիցիդները, որոնք դասակարգւում են որպէս թունաքիմիկատներ, ոչնչացնում են մոլախոտերը, միջատասպանները (ինսեկտիցիդները) ոչնչացնում են վնասատու միջատներին, ֆունգիցիդները ոչնչացնում են ախտածին սնկերը, իսկ զոոցիդները ոչնչացնում են վնասակար ջերմարիւն կենդանիներին: Բացի թունաւոր նիւթերից, քիմիական նիւթերի այս խումբը ներառում է անպտղութիւն եւ աճի արգելակիչներ առաջացնող մանրէազերծող նիւթեր, որոնք արգելափակում են վնասակար օրգանիզմների զարգացումը:

Ժամանակակից գիւղատնտեսութեան մէջ թունաքիմիկատներն օգնում են բաւականաչափ բարձր բերքատւութիւն եւ պարէնային անվտանգութիւն ապահովել: Սակայն դրանք կարող են ազդել ոչ միայն «թիրախի» վրայ, որին սպանում կամ զրկում են կենսական անհրաժեշտ գործառոյթներից, այլ նաեւ այլ բոյսերի, կենդանիների եւ մարդկանց վրայ: Վերջին տարիներին աւելացել է այն մարդկանց թիւը, որոնց առողջութեան վրայ թունաքիմիկատներմ ազդեցութիւն են թողնում։

ԱՄՆ մի քանի բժշկական դպրոցների հետազօտողները ուսումնասիրել են, թէ ինչպէս են թունաքիմիկատներն ազդում քաղցկեղի առաջացման վտանգի վրայ եւ արդիւնքները համեմատել են ծխելու հետեւանքով առաջացած վնասի հետ: Համապատասխան գիտական​յօդւածը հրապարակել է Frontiers in Cancer Control and Society հանդէսը։

Գիտնականները բացայայտել են, որ գիւղատնտեսական թունաքիմիկատների պատճառով մեծացած քաղցկեղի որոշ տեսակների վտանգը համեմատելի է ծխելու վտանգի հետ: Պարզւել է, որ ոչ հոջկինեան լիմֆոմայի (արեան չարորակ նորագոյացութիւնների խումբ, որում ընդգրկւած են լիմֆոմաների բոլոր տեսակները, բացի Հոջկինի լիմֆոմայից), սպիտակարիւնութեան եւ միզապարկի քաղցկեղի զարգացումը թունաքիմիկատների ազդեցութեանը ենթարկւողների շրջանում նոյնիսկ աւելի հաւանական է, քան ծխողների շրջանում:

News.am