Պաշտօնական Երեւանից մինչեւ օրս Սամուէլ Շահրամանեանին շնորհաւորական ուղերձ չի յղւել
Հայաստանի Ազգային ժողովի աշնանային նստաշրջանի առաջին նիստում, սեպտեմբերի 11-ին, ՀՅԴ Հայաստանի ԳՄ անդամ, «Հայաստան» խմբակցութեան պատգամաւոր Գեղամ Մանուկեանը խօսք ուղղեց Արցախի Հանրապետութեան ժողովրդին։
«Այս դժւարին օրերին սեփական հայրենիքում ազատ ապրելու, ինքնորոշման իրաւունքը պաշտպանելու եւ դժւարին մարտահրաւէրները դիմագրաւող Արցախի Հանրապետութեան սիրելի հայրենակիցներ:
Ազգային ժողովի մեկնարկող նստաշրջանի օրակարգում թերեւս կարող էր առաջին կէտը լինել շաբաթ, սեպտ. 9-ին Արցախի Ազգային ժողովում Արցախի Հանրապետութեան նախագահ Սամուէլ Շահրամանեանի ընտրութեան հետ կապւած Հայաստանի խորհրդարանի կողմից ողջոյնի ուղերձ յղելու հարցը։
Ամէն դէպքում Հայաստանի Ազգային ժողովի այս բարձր ամբիոնից ցանկանում եմ մեր գործընկերների, հայրենակիցների անունից ողջունել Արցախի մեր քաղաքացիներին, հայրենակիցներին, որոնց ներկայացնող մարմինը՝ Ազգային ժողովը, հանդէս բերեց վճռականութիւն, միասնականութիւն, պահի թելադրանքն ամբողջութեամբ գիտակցնելով՝ առաջին իսկ քւէարկութեամբ 22 կողմ ձայնով Արցախի նախագահ ընտրեց Սամուէլ Շահրամանեանին։
Շատ պատասխանատու փուլ Արցախի համար, երբ որ երկիրը դիմագրաւում է լուրջ մարտահրաւէրների՝ քաղաքական, ռազմաքաղաքական, ներքին, հումանիտար, բայց Արցախում ընտրւեց նախագահ, որից հայ ժողովուրդն ակնկալում է վճռականութիւն, որոշում կայացնելու ունակութիւն, հանրութեանը համախմբելու եւ բոլոր այս մարտահրաւէրները դիմագրաւելու յամառութիւն եւ կամք։
Հայաստանի հասարակութիւնը, հայ ժողովուրդը շնորհաւորել է Սամուէլ Շահրամանեանին, որոշ երկրներ՝ Ուկրաինա, Թուրքիա, դատապարտել են այս ընտրութիւնը, որքան էլ զարմանալի է՝ պաշտօնական Երեւանից մինչ օրս որեւէ շնորհաւորական ուղերձ Արցախի նորընտիր նախագահ Սամուէլ Շահրամանեանին, չի յղւել»։
«Arfd.am»
