Տիգրան Աբրահամեան. «Պարոնայք, դուք դեռ ժամանակ ունէք յետ կանգնելու քաղաքական մեծամասնութեան մահակը լինելու անպատիւ դերից»
«ԱԼԻՔ» – ՀՀ ԱԺ «Պատիւ ունեմ» խմբակցութեան պատգամաւոր Տիգրան Աբրահամեանը «Ֆէյսբուք»-ի իր էջում անդրադարձել է ոստիկանութեանը վարկաբեկելու մասին ՀՀ Ներքին գործերի նախարարութեան տարածած յայտարարութեանը։
«Ոստիկանութիւնը հաղորդագրութիւն է տարածել, որում մասնաւորապէս նշւում է, թէ «որոշ շրջանակներ, այդ թւում՝ նաեւ ԶԼՄ-ներ, սոցհարթակներում անհիմն եւ համակարգւած եղանակով թիրախաւորում են ՆԳՆ Ոստիկանութեանը՝ փորձեր անելով տարածել կառոյցի հեղինակութեանը վնասող ապատեղեկատւութիւն եւ ուղղորդւած սխալ տեղեկութիւններ»:
Ոստիկանական կառոյցին հեղինակազրկում են իր պահպանութեան տակ գտնւող անձի առեւանգումն ու բռնութեան օրինակը, ստորացման ենթարկումը, պաշտօնատար անձանց կարգավիճակ ունեցող անձանց տգէտ ու փողոցայինին յատուկ պահւածքն ու բառապաշարը, ոստիկանութեան որոշ ստորաբաժանումների, աշխատակիցների ոչ համաչափ գործողութիւնները եւ անհարկի դաժանութիւնը: Կարող եմ երկար շարունակել:
Ոստիկանութիւնն այսօր յանձն է առել քաղաքական իշխանութեան հակապետական գործունէութեան ակտիւ սատարողի դեր:
Նշածս եւ բազմաթիւ պատճառներն են, որը ահռելի վնաս են հասցնում ոստիկանութեանը` որպէս ինստիտուտի եւ երկրի ներքին անվտանգութեամբ զբաղւող կառոյցի:
Այնպէս որ պարոնայք, դուք դեռ ժամանակ ունէք յետ կանգնելու քաղաքական մեծամասնութեան մահակը լինելու անպատիւ դերից եւ վերադառնալու օրէնքի դաշտ»,- գրել է նա։
