Ռէյիսին եւ Պուտինը քննարկել են իրավիճակը հարաւային Կովկասում եւ Արցախի շուրջ
«ԱԼԻՔ» – Երէկ՝ սեպտեմբերի 26-ին Հանրապետութեան նախագահ այաթ. Սէյէդ Էբրահիմ Ռէյիսին հեռախօսազրոյց է ունեցել Ռուսաստանի Դաշնութեան նախագահ Վլադիմիր Պուտինի հետ:
Հեռախօսազրոյցի ընթացքում երկու գործընկերները դիտարկելով տարածաշրջանային զարգացումների վերջին իրավիճակն ընդգծել են Հարաւկովկասեան տարածաշրջանի խնդիրները երկխօսութեան միջոցով, «3+3» ձեւաչափի շրջանակում կարգաւորելու անհրաժեշտութիւնը, բացառելով արտատարածաշրջանային ուժերի միջամտութիւնը տարածաշրջանին առնչւող հարցերում:
«Մտքերի հանգամանալից փոխանակում է տեղի ունեցել Լեռնային Ղարաբաղի շուրջ ստեղծւած իրավիճակի եւ Ադրբեջանի ու Հայաստանի միջեւ յարաբերութիւնների կարգաւորման հարցի շուրջ։ Պուտինը տեղեկացրել է ռուսական խաղաղապահ զօրակազմի գործունէութեան, այդ թւում՝ խաղաղ բնակչութեանը մարդասիրական օգնութեան տրամադրման, Լեռնային Ղարաբաղի հայ բնակչութեան իրաւունքների եւ անվտանգութեան պաշտպանութեան մասին։ Ռուսաստանի եւ Իրանի նախագահներն ընդգծել են բոլոր հարցերը բացառապէս խաղաղ, քաղաքական եւ դիւանագիտական ճանապարհով լուծելու կարեւորութիւնը։ Երկկողմ շահագրգռւածութիւն է յայտնւել «3+3» խորհրդատւական հարթակի (Հայաստան, Վրաստան, Ադրբեջան, Ռուսաստան, Իրան, Թուրքիա) ակտիւացման հարցում»,- ասւած է հեռախօսազրոյցի վերաբերեալ Կրեմլի մամլոյ ծառայութեան հրապարակած հաղորդագրութիւնում:
