Ադրբեջանում բացւել է «Արեւմտեան Ադրբեջան հեռուստատեսութեան» շէնքը
«ԱԼԻՔ» – «Ադրբեջանական պաշտօնական կայքը՝ Oxu.Az նշում է, որ մայիսի 1-ին Ադրբեջանում բացւել է «Արեւմտեան Ադրբեջան հեռուստատեսութեան» շէնքը։ Այս մասին ահազանգում է Monument Watch-ը։
«Յիշեցնենք, որ Ադրբեջանում «Արեւմտեան Ադրբեջան» ասելով, նկատի ունեն ներկայիս Հայաստանի ողջ տարածքը։ Այս միտքը շէնքի բացման արարողութեան ժամանակ հաստատել է «Արեւմտեան Ադրբեջան համայնքի» վարչութեան նախագահ, պատգամաւոր Ազիզ Ալեքբերլին։
Նրա խօսքով՝ հեռուստաալիքը «հետապնդում է վեր հանել հայրենի հողերից վերջին 200 տարիներին ադրբեջանցիների տեղահանման եւ Արեւմտեան Ադրբեջանում ադրբեջանական ժառանգութեան ոչնչացման մասին ճշմարտութիւնը։ Հեռուստաալիքը ակտիւօրէն պաշտպանելու է «բնիկ հողեր» ադրբեջանցիների խաղաղ եւ անվտանգ վերադարձի ապահովմանն ուղղւած ջանքերը»։ Պետպատւէրով աշխատող այս հեռուստատեսութիւնը հեռարձակելու է 3 լեզւով՝ ադրբեջաներէն, ռուսերէն եւ անգլերէն։
Հեռուստաալիքը եթեր դուրս կը գայ շաբաթը վեց անգամ երկու ժամով, երեք անգամ ադրբեջաներէն եւ երեք անգամ՝ ռուսերէն։ Բացի այդ, շաբաթւայ ընթացքում եթեր դուրս կը գայ կէսժամեայ տեսութիւն անգլերէն։ Յաւելենք, որ մինչ հեռուստատեսութեան պաշտօնական բացումը, ադրբեջանական մեդիա տիրոյթում բազմաթիւ նոր հարթակներ են ստեղծւել «Արեւմտեան Ադրբեջան» անւանումով, որոնք նոյն քարոզչական թեզն են առաջ քաշում:
Իսկ հեռուստատեսութիւնը ունեցել է եւ շարունակում է ունենալ իւթուբեան ալիք, որտեղ բազմաթիւ տեսանիւթեր կան Հայաստանի տարածքը որպէս ադրբեջանական ներկայացնելու, ռասսայական խտրականութիւն տարածելու եւ հայկական մշակոյթը որպէս աղւանական եւ թուրքական ներկայացնելու։
Հայաթափման, հայերին իրենց պատմական հայրենիքում ցեղասպանելու եւ բռնի տեղահանութեան քաղաքականութեանը զուգահեռ Ադրբեջանը շարունակում է տարածքային, պատմական եւ մշակութային հաւակնութիւնների քաղաքականութիւնը ՀՀ սուվերեն տարածքի, հայ ժողովրդի պատմական հայրենիքի եւ մշակութային ժառանգութեան նկատմամաբ։ Սրանք անընդունելի գործողութիւնների ամբողջութիւն են, որոնց նպատակը հայկական հետքի բնաջնջումն է։
«Արեւմտեան Ադրբեջանի համայնք» կոչւող կազմակերպութիւնը դիմել է ԻՒՆԵՍԿՕ-ին՝ «Արեւմտեան Ադրբեջանի» մշակութային ժառանգութեան ոչնչացման կանխման առաջարկով:
Յիշեցնենք, որ Ադրբեջանը նախաձեռնել է հայկական պատմական-մշակութային ժառանգութեան բռնի իւրացման նոր փորձեր: Երեւանը, Սեւանն ու Սիւնիքը Ադրբեջանը հռչակում է որպէս «ադրբեջանական ժառանգութիւն»:
