Ահմադեան. «Տարածաշրջանի աշխարհագրութեան ցանկացած փոփոխութիւն յանգեցնում է ապահովութեան բացակայութեան ու անկայունութեան»
«ԱԼԻՔ» – Իսլ. յեղափոխութեան առաջնորդի ներկայացուցիչ, Իրանի Ազգային անվտանգութեան Գերագոյն խորհրդի քարտուղար Ալի Աքբար Ահմադեանը երէկ՝ երեկոյեան ընդունել է ՀՀ Անվտանգութեան խորհրդի քարտուղար Արմէն Գրիգորեանին:
Հանդիպման ընթացքում Ահմադեանը յատուկ կարեւորել է բոլոր կողմերի ջանքերի անհրաժեշտութիւնը՝ Հարաւային Կովկասում խաղաղութիւն եւ անվտանգութիւն հաստատելու համար՝ զգուշացնելով տարածաշրջանի աշխարհագրութեան փոփոխութիւններից:
Ներկայացնելով Իրանի Իսլամական Հանրապետութեան սկզբունքային եւ անփոփոխ քաղաքականութիւնը հարեւան երկրների հետ փոխգործակցութեան զարգացման, եւ լարւածութիւնից ու հակամարտութիւնից զերծ տարածաշրջան ստեղծելու գործում, Ահմադեանը նշել է, որ տարածաշրջանի երկրների միջեւ բաց եւ կառուցողական երկխօսութիւնները հիմք են հանդիսանում կայուն անվտանգութեան, համաչափ զարգացման եւ տարածաշրջանի բնակիչների բարեկեցութեան համար:
Անդրադառնալով տարածաշրջանի վերջին զարգացումներին եւ ընդգծելով տարածաշրջանում խաղաղութեան եւ կայունութեան հաստատման անհրաժեշտութիւնը, Իրանի Ազգային անվտանգութեան Գերագոյն խորհրդի նախագահը շեշտել է. «Տարածաշրջանի աշխարհագրութեան ցանկացած փոփոխութիւն յանգեցնում է ապահովութեան բացակայութեան ու անկայունութեան եւ խորացնում է ճգնաժամը»։
