Իրանի արտգործնախարարը ՄԱԿ-ի գլխաւոր քարտուղարի հետ քննարկել է Գազայի հատւածում տիրող աղէտալի իրավիճակը

Իրանի արտաքին գործերի նախարար Հոսէյն Ամիր Աբդօլլահեանը Իսրայէլի իշխանութիւնների վրայ է դրել Գազայում իրավիճակի վատթարացման աղէտալի հետեւանքների պատասխանատւութիւնը,- գրում է «Tasnim»-ը։

Իրանի ԱԳ նախարարը ՄԱԿ-ի գլխաւոր քարտուղար Անտոնիօ Գուտերեշի հետ հեռախօսազրոյցում ասել է, որ «Սիոնիստական ​​ռեժիմը ռազմական յանցագործութիւններ է կատարում՝ դադարեցնելով էլեկտրաէներգիայի եւ ջրի մատակարարումը Գազայում եւ կանխելով տարածաշրջան դեղորայքի ու սննդի առաքումը»։

Ամիր Աբդօլլահեանը նաեւ յայտնել է Գազա մարդասիրական օգնութիւն ուղարկելու Իրանի պատրաստակամութիւնը՝ յայտարարելով, որ ակնկալւում է, որ ՄԱԿ-ը հրատապ քայլեր կը ձեռնարկի Գազայի պաղեստինցիներին ջուր, սնունդ եւ մարդասիրական բեռներ ուղարկելու համար:

Իր հերթին ՄԱԿ-ի ղեկավարն ասել է, որ Գազայում ՄԱԿ-ի հարիւրաւոր աշխատակիցներ գտնւում են սարսափելի պայմաններում, իսկ նրանցից  շատերը զոհւել են Իսրայէլի հարւածների հետեւանքով:

Գուտերեշն ասել է, որ ՄԱԿ-ը խորհրդակցութիւններ է անցկացնում այլ երկրների հետ՝ նւազեցնելու Գազայի ռմբակոծութեան ինտենսիւութիւնը եւ կանխելու մեծ աղէտը տարածաշրջանում։

Արտայայտելով ՄԱԿ-ի անհամաձայնութիւնը իսրայէլցի պաշտօնեաների քաղաքականութեան հետ՝ նա ընդգծել է պաղեստինցիների՝ իրենց ճակատագիրը որոշելու եւ անկախ պետութիւն ստեղծելու իրաւունքը ճանաչելու անհրաժեշտութիւնը, նշում է լրատւամիջոցը։