Ի՞նչ բովանդակութեամբ է Ս. Բաբայեանը բանակցել Բաքւի հետ

Հակարիի կամրջից գրեթէ ուղիղ Հ1-ի տաղաւարում յայտնւած Արցախի անվտանգութեան խորհրդի նախկին քարտուղար Սամուէլ Բաբայեանի յայտարարութիւնների հիման վրայ՝ Քրէական օրէնսգրքի երկու յօդւածով, ՀՀ գլխաւոր դատախազութիւնը քրէական գործ է յարուցել։

Ս. Բաբայեանը՝ մի շարք լրատւամիջոցներով նոյնպէս, առիթը բաց չի թողնում Բաքւում գտնւող Արցախի ռազմաքաղաքական ղեկավարութեան հասցէին մեղադրանքներ հնչեցնելու հարցում, զուգահեռաբար ինքն իրեն առաջադրելով որպէս Հայաստանում բռնի տեղահանւած Արցախահայերի առաջնորդ։

Զուգահեռներն ու պատճառահետեւանքային կապերն աւելի քան խօսուն են եւ ակնյայտ: Իսկ միջազգային հարթակներում Ադրբեջանի մաս ճանաչելն ու Արցախի Հանրապետութեան նկատմամբ իրագործւած տիեզերական դաւաճանութիւնը վերջին եօթ-ութ օրերի մէջ տեղաւորելը մեղմ ասած՝ անբարոյական է։

Ինչեւէ, ես՝ աներեւակայելիօրէն ոգեւորւած ՀՀ Գլխաւոր դատախազութեան օպերատիւ գործունէութիւնից, յանցագործութեան մասին հաղորդում եմ ներկայացնում՝ երկու դրւագով։

1. Ո՞ւմ անունից, ի՞նչ մանդատով, լիազօրութիւններով եւ ի՞նչ բովանդակութեամբ է Սամուէլ Բաբայեանը բանակցել Բաքւի հետ։ Ի՞նչ պայմանաւորւածութիւններ են ձեռք բերւել։

2. Քրէական գործ յարուցել եւ վարոյթ իրականացնել Նիկոլ Փաշինեանի եւ այն պաշտօնատար անձանց նկատմամբ, ովքեր ձախողել են Սահմանադրութեամբ եւ Անկախութեան Հռչակագրով իրենց վերապահւած պարտականութիւններն ու յանձնառութիւնները, շեղւել են վերոյիշեալ փաստաթղթերում ամրագրւած Հայոց պետականութեան հիմնարար սկզբունքներից եւ համազգային նպատակներից, տապալել են Հայաստանի Հանրապետութեան պաշտպանութիւնը, անվտանգութիւնը, տարածքային ամբողջականութիւնը եւ սահմանների անձեռնմխելիութիւնը:

ՀՀ ԱԺ պատգամաւոր՝ ԼԻԼԻԹ ԳԱԼՍՏԵԱՆ

16.10.2023, Երեւան

«Yerkir.am»