«Ժամանակի զուր վատնում» 

«ԱԼԻՔ» – Աշխարհի առաջնորդները, բանակցողները, լաբբիստները եւ ոչ կառավարական կազմակերպութիւնների ներկայացուցիչներ կը հաւաքւեն Ադրբեջանի մայրաքաղաք Բաքւում՝ COP29 համաժողովին մասնակցելու։ Այս մասին ըստ News.am-ի՝ յայտնում է  Euronews-ը։

ՄԱԿ-ի կլիմայի այս համաժողովը կոչւում է «ֆինանսական», քանի որ այս տարի ակնկալւում է, որ երկրները կը սահմանեն կլիմայի ֆինանսաւորման նոր գլոբալ թիրախ:

Յաջորդ տարի Բրազիլիայում անցկացւելիք COP30-ից առաջ, դրանք նաեւ պայմանաւորւած են «Ազգային մակարդակով սահմանւած ​​ներդրումներ» անունով յայտնի կլիմայական ներկայ ազգային պարտաւորութիւններով (NDCs):

ՄԱԿ-ի տւեալներով՝ հաստատել են իրենց մասնակցութիւնը համաժողովին աւելի քան 100 պետութիւնների եւ կառավարութիւնների ղեկավարներ։

Սակայն աշխարհի մի շարք առաջնորդներ ու պետական ​​պաշտօնեաներ արդէն յայտարարել են, որ չեն մեկնելու Բաքու։ Պարզաբանենք՝ ով չի մեկնի Բաքու եւ ինչու:

Վերջին մի քանի շաբաթների ընթացքում մի շարք եւրոպական առաջնորդներ յայտարարեցին, որ չեն մասնակցի COP29-ին:

Այս շաբաթւայ սկզբին Եւրայանձնաժողովի նախագահի խօսնակը Euronews-ին հաստատեց, որ Ուրսուլա ֆոն դեր Լայենը չի մասնակցի համաժողովին:

Քանի որ Եւրայանձնաժողովը անցումային փուլում է, «նախագահը կը կենտրոնանայ իր ինստիտուցիոնալ պարտականութիւնների վրայ»,-յայտարարել է ֆոն դեր Լայենի խօսնակը։ Ուրսուլա ֆոն դեր Լայենի երկրորդ ժամկէտը ԵՀ-ի ղեկավարի պաշտօնում սկսւում է դեկտեմբերի 1-ին։

Փոխարէնը ԵՄ-ն կը ներկայացնեն Եւրոպական խորհրդի նախագահ Շառլ Միշէլը, ինչպէս նաեւ կլիմայի հարցերով եւրայանձնակատար Վոպկէ Հոկստրան եւ էներգետիկ եւրայանձնակատար Կադրի Սիմսոնը:

Ֆրանսիայի նախագահ Էմմանուէլ Մակրոնը եւս բաց կը թողնի կլիմայական համաժողովը, ըստ տեղեկութիւնների՝ դրա գտնւելու վայրի պատճառով: Ֆրանսիայի յարաբերութիւններն Ադրբեջանի հետ սրւել են անցեալ տարւանից, երբ Փարիզը դատապարտեց Բաքւի գործողութիւնները Ղարաբաղում։

Գերմանիայի կանցլեր Օլաֆ Շոլցը յայտարարել է, որ չի մասնակցելու COP29-ին՝ ներքաղաքական խնդիրների պատճառով. չորեքշաբթի Գերմանիայում իշխող կոալիցիան փլուզւեց։ Նա ծրագրել էր Բաքւում մասնակցել կլիմայի վերաբերեալ բանակցութիւններին, սակայն ստիպւած եղայ չեղարկել ուղեւորութիւնը։

Քանի որ COP29-ը տեղի կունենայ ԱՄՆ ընտրութիւններից մի քանի օր անց, նախագահ Ջօ Բայդէնը եւս չի մասնակցի համաժողովին: Նա երկրորդ տարին անընդմէջ բաց է թողնում կլիմայի վերաբերեալ գլոբալ բանակցութիւնները: ԱՄՆ պատւիրակութիւնը կը գլխաւորի կլիմայի միջազգային քաղաքականութեան գծով նախագահի ներկայիս աւագ խորհրդական Ջոն Պոդեստան։

Բրազիլիայի նախագահ Լուիս Ինասիօ Լուլա դա Սիլւան եւս չեղեալ է յայտարարել իր ուղեւորութիւնը՝ անցեալ ամիս գլխի վնասւածք ստանալուց յետոյ: Յաջորդ տարի երկիրը կը հիւրընկալի COP30-ը Բելեմում:

Չարլզ Երրորդ թագաւորը եւս չի մասնակցի համաաժողովին, իսկ Մեծ Բրիտանիայի կառավարութիւնը որոշել է չուղարկել նրան որպէս ներկայացուցիչ, քանի որ նա շարունակում է ապաքինւել հիւանդութիւնից: Թագաւորը երկար ժամանակ եղել է կլիմայի փոփոխութեան ջատագով եւ մասնակցել է ՄԱԿ-ի նախկին համաժողովներին:

ՌԴ նախագահ Վլադիմիր Պուտինը չի մեկնի ՄԱԿ-ի կլիմայի համաժողովին, իսկ COP29-ում երկրի պատւիրակութիւնը կը գլխաւորի վարչապետ Միխայիլ Միշուստինը։ Հոկտեմբերին ԵՄ-ում Ուկրաինայի դեսպան Վսեւոլոդ Չենցովը Politico-ին յայտնել էր, որ միջազգային հանրութիւնը պէտք է հրաժարւի բանակցութիւններին մասնակցելուց, եթէ Պուտինը մասնակցի:

Կանադայի վարչապետ Ջասթին Թրիւդօն, Հնդկաստանի վարչապետ Նարենդրա Մոդին, Չինաստանի նախագահ Սի Ծինպինը, Հարաւային Աֆրիկայի վարչապետ Սիրիլ Ռամաֆոսան եւ Աւստրալիայի վարչապետ Էնթոնի Ալբանեզէն նոյնպէս բաց կը թողնեն այս տարւայ կլիմայի համաժողովը:

Օգոստոսին Պապուա Նոր Գւինեայի վարչապետ Ջէյմզ Մարապեն յայտարարեց, որ երկիրը չի մասնակցի COP29-ին՝ ի նշան բողոքի խոշոր երկրներից «կլիմայի փոփոխութեան զոհերին արագ աջակցութեան» բացակայութեան դէմ: Մարապեն յայտարարեց, որ նման քայլի է դիմում՝ ելնելով բոլոր փոքր կղզի պետութիւնների շահերից:

Շրջապատւած ովկիանոսով եւ ունենալով մոլորակի երրորդ արեւադարձային անտառներով ամենամեծ տարածքը՝ Պապուա Նոր Գւինեան չափազանց խոցելի է կլիմայի փոփոխութեան հետեւանքների հարցերում: Երկիրը տառապում է ծովի մակարդակի բարձրացումից եւ բնական աղէտներից։

Ընդամէնը մի քանի շաբաթ է մնացել, արտգործնախարար Ջասթին Տկաչենկօն հաստատել է, որ երկիրը դուրս է գալիս կլիմայի գագաթնաժողովում բարձր մակարդակի բանակցութիւններից։ Բաքւում անկացւելիք COP29-ը նա «ժամանակի զուր վատնում» է որակել:

Տկաչենկօն յայտարարել է, որ Պապուա Նոր Գւինեան «այլեւս չի հանդուրժի դատարկ խոստումները եւ անգործութիւնը», մինչ նրա ժողովուրդը տառապում է կլիմայի փոփոխութեան կործանարար հետեւանքներից: Նա յաւելել է, որ երկրների ներկայացուցիչների վերջին երեք հանդիպումները փոքր կղզի պետութիւնների համար առանց որեւէ շօշափելի արդիւնքի են անցնում։

Պապուա Նոր Գւինեան  պետական ​​պաշտօնեաների փոքր պատւիրակութիւն կուղարկի, սակայն բանակցութիւններին նախարարներ չեն մասնակցի։