Բագրատ Սրբազան. «Այս սահմանազատումը ուղղակիօրէն դառնալու է մեծ գերեզմանաքար Հայաստանի համար»
«ԱԼԻՔ» – «Այս սահմանազատումը մեր երկրի համար ուղղակիօրէն դառնալու է մեծ գերեզմանաքար, զրկելու է կենսունակութիւնից, ապրելու իրաւունքից, գոյութեան իրաւունքից»: Այս մասին իր հերթական տեսաուղերձի ժամանակ ասել է «Սրբազան պայքար» շարժման առաջնորդ Բագրատ Սրբազանը՝ անդրադառնալով Հայաստանի եւ Ադրբեջանի միջեւ ընթացող սահամանազատման եւ սահմանագծման ընթացող գործընթացին:
«Այս աբսուրդի թատրոնը, որը ուղղակիօրէն դարձել է մեր կեանքի սղոցարանը, վերջ է գտնելու շատ շուտով։ Կան մարդիկ, որոնք ուղղակի սրտով են գոհ, որովհետեւ զանազան շահերի են սպասարկում, զանազան տարբեր տեսակի նիւթական շահեր ունեն, կապւածութիւններ ունեն: Ժամանակը մօտեցել է այս չարիքի իշխանութեանը հեռացնելու, ուղարկելու իր բնական միջավայրը, որն է Սանդարամէտը»,- ասել է նա:
Բագրատ Սրբազանն անդրադարձել է նաեւ սահմանազատման ու սահմանագծման թեմային:
«Վերջերս նաեւ յայտարարութիւն եղաւ այսպէս կոչւած սահմանազատման եւ սահմանագծման վերաբերեալ, յատկապէս շեշտադրում էր, որ այն պէտք է սկսի Հայաստանի հիւսիսային շրջաններից։ Այս պատճառով է սկսել «Տաւուշն յանուն հայրենիքի» շարժումը, որը վերածւել է Սրբազան պայքարի, ստեղծւել է այն միտումով, որպէսզի կասեցւի այս աղէտալի գործընթացը, որը ուղղակիօրէն դառնալու է մեր երկրի համար մի մեծ գերեզմանաքար, զրկելու է կենսունակութիւնից, ապրելու իրաւունքից, գոյութեան իրաւունքից»,- ասել է նա:
