Լիլիթ Գալստեան. «Պատասխան տալու ժամանակը գալու է, անգամ՝ մօտ է»
«ԱԼԻՔ» – ՀՅԴ Հայաստանի ԳՄ անդամ, ՀՀ ԱԺ «Հայաստան» խմբակցութեան պատգամաւոր Լիլիթ Գալստեանը ֆէյսբուքեան իր էջում գրառում է կատարել՝ անդրադառնալով ՔՊ-ականների կողմից այսպէս կոչւած «իրական Հայաստան» արտայայտութեան շրջանառութեան փորձերին:
«Բոլոր ՔՊ-ականները յանձնարարութիւն են ստացել․ ցանկացած համատեքստում շրջանառել «իրական Հայաստան» արտայայտութիւնը։
«Յեղափոխութիւն» եւ «նախկիններ» կոնտենտը մաշւել է։
Ու հիմա՝ վեցամեայ իշխանութեան հանրագումար պարտութիւնը, հազարաւորների մահերը, կորսւած Արցախը, օկուպացւած Հայաստանը, պատերազմի սպառնալիքը, ներազգային թշնամանքը, արցախահայութեան նկատմամբ գեներացւող ատելութիւնը, մազից կախւած պետականութեան ապագան փաթեթաւորում են որպէս «իրական Հայաստան»։
Իրականում «իրական Հայաստանը» թշնամու պատկերացրած ու սրանց պարտադրւող Հայաստանն է, անհեռանկար եւ անողնաշար մի գոյութիւն…
«Իրական Հայաստանը» իզմեր եւ կարմիր գծեր չունեցող Նիկոլ Փաշինեանի քաղաքական սնանկութեան, վախերի ու ցինիզմի արտայայտութիւնն է, Հայաստանի եւ մեզանից իւրաքանչիւրի ապագայի գնով աթոռը պահելու գինը։
Եւ, այդուհանդերձ, պատասխան տալու ժամանակը գալու է, անգամ՝ մօտ է…
Գնահատել իրականութիւնն ու կազմակերպւել…»,- գրել է նա:
