«ԱԼԻՔ» – Իսլ. յեղափոխութեան առաջնորդ այաթ. Սէյէդ Ալի Խամենէին երէկ՝ փետրւարի 18-ին հանդիպել է պաղեստինեան «Իսլամական Ջիհադ» շարժման գլխաւոր քարտուղար Զիաբ Նոխալէի եւ նրան ընկերակցող պատւիրակութեան հետ:
Շնորհաւորելով Գազայում Դիմադրութեան շարժման յաղթանակի կապակցութեամբ, այաթ. Խամենէին ասել է. «Պաղեստինեան դիմադրութեան առաջնորդների ու մարտիկների միասնութեան եւ համախմբւածութեան, թշնամու դէմ դիմակայելն ու բանակցութիւնների բարդ գործընթացն առաջ մղելու մեծ աշխատանքը, ինչպէս նաեւ ժողովրդի համբերութիւնն ու տոկունութիւնը տարածաշրջանում Դիմադրութեան հպարտութեան ու պարծանքի պատճառն են դարձել:
Այս յաղթանակը նոր չափորոշիչներ է սահմանել Դիմադրութեան պայքարում»:
Իսլ. յեղափոխութեան առաջնորդն ակնարկելով Գազայի եւ Պաղեստինի հետ կապւած ԱՄՆ ինչ-որ յիմար ծրագրերին՝ նշել է. «Այս ծրագրերը ոչ մի տեղ չեն հասնի, եւ նրանք, ովքեր մէկուկէս տարի առաջ յոխորտում էին կարճ ժամանակում Դիմադրութեանը ոչնչացնելու մասին, այժմ իրենց գերիներին փոքր խմբերով յետ են ստանում Դիմադրութեան մարտիկներից՝ փոխարէնը ազատելով մեծ թւով պաղեստինցի գերիների:
Այժմ միջազգային հանրային կարծիքը կողմ է Պաղեստինին, եւ այս իրավիճակում ոչ մի ծրագիր չի արդիւնաւորւի առանց Դիմադրութեան եւ Գազայի ժողովրդի համաձայնութեան»:
Զիադ Նոխալէն իր հերթին շնորհաւորելով Իսլ. յեղափոխութեան առաջնորդին Դիմադրութեան շարժման յաղթանակի կապակցութեամբ, երախտագիտութիւն է յայտնել Իրանի Իսլամական Հանրապետութեան ժողովրդին եւ ղեկավարութեանը՝ ցուցաբերած աջակցութեան առիթով՝ նշելով, որ յաղթանակը չէր գոյանայ, եթէ չլինէր Իրանի անվերապահ զօրակցութիւնը:
