Կատարը կոչ է արել միջազգային հանրութեանը ՄԱԳԱՏԷ-ի հսկողութեան տակ առնել Իսրայէլի միջուկային օբիեկտները
«ԱԼԻՔ» – Կատարը շաբաթ օրը (մարտի 9-ին- ԽՄԲ.) կոչ է արել միջազգային հանրութեանը ջանքեր գործադրել Իսրայէլի բոլոր միջուկային օբիեկտները Ատոմային էներգիայի միջազգային գործակալութեան վերահսկողութեան տակ դնելու համար, հաղորդում է Arab News-ը:
Կատարի ԱԳՆ-ն նաեւ կոչ է արել Իսրայէլին «իր բոլոր միջուկային օբիեկտները դնել ՄԱԳԱՏԷ-ի երաշխիքների ներքոյ» եւ միանալ Միջուկային զէնքի չտարածման պայմանագրին (NPT):
Յայտարարութիւնը յաջորդել է Վիեննայում ՄԱԳԱՏԷ-ի ղեկավարների հանդիպմանը, որին մասնակցել է Վիեննայում Կատարի դեսպան եւ ՄԱԿ-ում մշտական ներկայացուցիչ Ջասիմ Եակուբ Ալ-Համադին:
Հանդիպմանը քննարկւել են օկուպացւած պաղեստինեան տարածքներում տիրող իրավիճակը եւ Իսրայէլի միջուկային ներուժը։
Հանդիպման ընթացքում Ալ-Համադին նշել է, որ «այս բանաձեւերից մի քանիսը պարունակում են ուղղակի կոչ Իսրայէլին միանալ NPT-ին՝ որպէս միջուկային զէնք չունեցող պետութիւն»: Նա նաեւ նշել է, որ «մերձաւորարեւելեան բոլոր երկրները, բացառութեամբ Իսրայէլի, NPT-ի մասնակիցներ են եւ գործակալութեան հետ արդիւնավէտ երաշխիքային համաձայնագրեր ունեն»:
Նա նաեւ նշել է, որ Իսրայէլը շարունակում է իր ագրեսիւ քաղաքականութիւնը, ինչպիսիք են Գազայի հատւածից պաղեստինցիներին բռնի տեղահանման կոչերը եւ Արեւտեան ափում ռազմական գործողութիւնների ակտիւացումը, ինչպէս նաեւ «Գազա մարդասիրական օգնութեան առաքման խոչընդոտումը եւ UNRWA-ի գործողութիւնների շարունակւող սահմանափակումները»:
Կատարը Գազայում հրադադարի շուրջ Իսրայէլի եւ պաղեստինեան ՀԱՄԱՍ խմբաւորման միջեւ բանակցութիւնների միջնորդն է։ Հաղորդում է news.am–ը:
