Վարդան Օսկանեան. «Օրւայ իշխանութիւնը չպէտք է որեւէ դեր ունենայ Հայաստանի ապագան ձեւաւորելու հարցում»
«ԱԼԻՔ» – ՀՀ նախկին ԱԳ նախարար Վարդան Օսկանեանի կարծիքով՝ ՀՀ գործող իշխանութիւնները չպէտք է որեւէ դեր ունենան Հայաստանի ապագան ձեւաւորելու հարցում:
«Անցած շաբաթ Նիկոլ Փաշինեանը հանդիպել է Ադրբեջանի նախագահ Իլհամ Ալիեւի հետ Աբու Դաբիում։ Թէեւ հանդիպումը ներկայացւել է մշուշոտ դիւանագիտական բառապաշարով եւ մշակւած պաշտօնական յայտարարութիւններով, դրա հետեւանքները սկսում են արդէն պարզ դառնալ։ Ամէն ինչից ակնյայտ է՝ Փաշինեանը համաձայնել է այսպէս կոչւած «միջանցքին»՝ Սիւնիքի մարզով անցնող մի նախագծի, որը փաստացի նշանակում է հայկական տարածքի ինքնիշխան վերահսկողութեան փոխանցում արտաքին ուժի։ Սա մանրուք չէ, այլ լուրջ ռազմավարական ու քաղաքական զիջում՝ ուղիղ հարւած Հայաստանի տարածքային ամբողջականութեանը եւ հերթական ճեղք՝ մեր պետութեան արդէն իսկ փխրուն հիմքերում։
Այժմ Փաշինեանը մեկնել է Բրիւսէլ եւ Փարիզ՝ ենթադրաբար այս խիստ խնդրայարոյց գործարքի համար եւրոպական աջակցութիւն ստանալու նպատակով։ Սակայն ոչ մի արեւմտեան ժպիտ կամ բեմադրւած լուսանկար չի կարող փոխել այս նախաձեռնութեան էութիւնը։ Իր բովանդակութեամբ այն աղէտ է Հայաստանի երկարաժամկէտ ինքնիշխանութեան եւ ազգային անվտանգութեան համար։
Փաշինեանի մղումը պայմանաւորւած չէ խաղաղութեան համարձակ տեսլականով կամ տարածաշրջանային հաշտեցման սկզբունքային յանձնառութեամբ։ Այն շատ աւելի ցինիկ է՝ եւ շատ աւելի անձնական։ Նրա հիմնական նպատակն 2026-ի ընտրութիւններից առաջ Ադրբեջանի հետ «խաղաղութեան համաձայնագրի» ապահովումն է։ Այս նեղ քաղաքական նպատակին հասնելու համար նա պատրաստ է զոհաբերել ոչ միայն տարածք, այլեւ արժանապատւութիւն, արդարութիւն եւ հայ ժողովրդի պատմական յիշողութիւնը։ Այն, ինչ նա կոչում է «խաղաղութիւն», դիւանագիտական ձեռքբերում չէ, այլ՝ պետական ձախողման պաշտօնական փաստաթուղթ։ Ձախողում՝ Արցախը պաշտպանելու։ Ձախողում՝ հայ կեանքերը պաշտպանելու։ Ձախողում՝ ազգային շահը պաշտպանելու։
Նոյնիսկ եթէ նման համաձայնագիրը կարող է ժամանակաւոր հանգստութիւն ապահովել՝ ինչը խիստ կասկածելի է, այն չի կարող փոխհատուցել արդէն կրած տարածքային, մարդկային եւ բարոյական ահռելի վնասները։
Իրականում, այն 7 տարիներին, ինչ Նիկոլ Փաշինեանը իշխանութեան է, նա առաջնորդել է Հայաստանի նորագոյն պատմութեան ամենամեծ ազգային աղէտը։ Նրա ղեկավարութեամբ Հայաստանը ոչ միայն հող է կորցրել, այլ նաեւ վստահութիւն, ռազմավարական խորութիւն եւ դիրք միջազգային ասպարէզում։
Ինչ էլ որ բերեն առաջիկայ ամիսները, մէկ բան ակնյայտ է եւ անխուսափելի՝ օրւայ իշխանութիւնը չպէտք է որեւէ դեր ունենայ Հայաստանի ապագան ձեւաւորելու հարցում։ Նրանք բազմիցս ապացուցել են՝ անկարող են առաջնորդել հայ ժողովրդին»,- իր ֆէյսբուքեան էջում գրել է նա:
